Milalsa 5 - ጌሻ ማፃፋ

ጎዳዉ፥ ኑና ኔኮ ዛራ

¹ አቤት ጎዳዉ፥ ኑና ጋክዳባ ኡባ ቆፓ፤ ኑ ካዉሻተ በአ!

² ኑ ላታይ አላጋታስ፥ ኑ ኬይካ እማ አሳስ እመትስ።

³ ኑኒ አው ሀይቅዳ ናአ ግድዳ፤ ኑ አየትካ አምኦ ግድዶሶና።

⁴ ኑኒ ኡሻ ሃ ሻምድ ኤኮስ፤ ኤያ ምስ ጋተ ቃንፆስ።

⁵ ኑና የደይሳት ኑ ግንድያ ጋርሳና፤ ኑ ዳቡርዳ ሽን ሸምፓናዉ ዳንዳእቦኮ።

⁶ ኑኒ ካ ካላና ግድ፥ ግብፀታስነ አሶረታስ ኩሸ እምዳ።

⁷ ናጋራ ኦዳይ ኑ ማይዛታ፥ ሽን ኤንቲ ሀእ ዶኮና፤ ኤንቲ ኤካናዉ በሲያ ሴራ ኤክዳይ ኑና።

⁸ ኑና አይለት ሃሮሶና፤ ኤንታ ኩሸፐ ኑና አሽያ ኦንካ ባዋ።

⁹ ማሻን ዎይሳት ባዞን ደእያ ግሾ፥ ኑ ሸምፑዋ ባይዝድ ካ ደምዳ።

¹⁰ ኢታ ኮሻ ጋሶን፥ ኑ ጎጋይ ታማ ጮጨዳ ምቼስ።

¹¹ ማጫሳታ ፅዮነን ጌላኦታ ይሁዳ ካታማታን ዎልቃን ኦይክድ ቱንስዶሶና።

¹² ሀላቃታ ኤፍድ ካቅዶሶና፤ ጭማት ቦንቸትቦኮና።

¹³ ያላጋ አደት ዎፃን ጋጭዶሶና፤ አደ ናይት ዴፆ ም ቶክድ ጋንድጋርዶሶና።

¹⁴ ጭማት ካታማ ፐንገን ፕርዳናዉ ኡተይሳ አግዶሶና፤ ያላጋ አደት ናይት የ ዶግዶሶና።

¹⁵ ኑ ዎዛናፐ ኡፋይስ ክችስ፤ ኑ ዱርሳይ ዬሆን ላመትስ።

¹⁶ ኑ ሁጵያፐ ካላቻይ ኩንድስ፤ ኑ ናጋራ ኦዳ ግሾ ኑና አየ!

¹⁷ ሄሳ ግሾ፥ ኑ ዎዛናይ ዳቡርስ፤ ኑ አይፈይ ተልጁምስ።

¹⁸ ፅዮነ ደረይ ባይሳ ግድዳ ግሾ፥ ዎርካናት ያን ጉፖሶና።

¹⁹ አቤት ጎዳዉ፥ ነ መርናዉ ሃራሳ፤ ነ አራታይ የለታፐ የለታ ጋካናሳ።

²⁰ ኔኒ ኑና አይስ ኡባ ዎደ ዶጋይ? ሀይሳ መላ አዱሳ ዎደ ኑና አይስ አጋይ?

²¹ አቤት ጎዳዉ፥ ኑና ኔኮ ዛራ፤ ኑ ስማና፤ ኑ ዎድያ በንይሳ ዛራዳ ኦራ።

²² ኔኒ ኑና ፖሎ አጋድዬ? ነ ሀንቁዋስ ዛው ባወዬ?