Milalsa 4 - ጌሻ ማፃፋ

ጌሻ ሹቻት ላለትዶሶና

¹ ዎርቀይ ጶለይሳ ዋንድ አግዴ? ጌሻ ዎርቃይ ዋንድ ዳምዴ? ፆሳ ኬይ ግምበትዳ ሹቻይ ኦገ ዶናን ላለትስ።

² ካሰ አልኦ ዎርቃ መላ ቦንቸትዳ ፅዮነ ናይት ሀእ ቢታፈ መትዳ ኦቶ ግድዶሶና።

³ ሀር አቶሽን ዎራካን ባ ማር ንዉሱ፤ ሽን ታ አሳይ ባዞን ደእያ ያንቾዳ፥ ባ ናይታስ ኢታ ግድስ።

⁴ ሳሞ ጋሶን ዮጋ ናይታ እንፃርሳይ ኮቶኖራ ኦይከትስ፤ ናይት ካ ዎሶሶና፤ ሽን ኤንታዉ እምያ ኦንካ ባዋ።

⁵ ካሰ ማልኦ ካ ፃላላ መይሳት ሀእ ኦገ ዶናን ኮሻን ዉርዶሶና። ካሰ ሊኖ ማእድ ድጭዳይሳት ሀእ ብዶ ቦላ ዝንእዶሶና።

⁶ ታ አሳ ናጋራይ፥ ኦደ ኩሸይካ እዮ ቦቾና፥ ቆፖና ሽረትድ ዎዳ ሶዶመ አሳ ናጋራፐ ዳሮ።

⁷ ይሁዳ ሀላቃት ሻቻፈ አዳ ጌሽ፥ ማፈ አዳ ቦ። ኤንታ አሳተይ ዞኦ እንቆፈ አዳ አርሰ፤ ኤንታ መይ ሳንፓረ አልኦ ሹቻ መላ።

⁸ ሽን ሀእ ኤንታ ሶምኦይ ሻላፐ አድ ካሬፅስ፤ አስ ኦገን ኤንታ በእድ ኤረና፤ ኤንታ ጎጋይ መቀራ ኦይከትድ ምዳ መልስ።

⁹ ምያባ ይድ፥ ኮሻን ሀይቅዳይሳታፐ ኦላን ሀይቅዳይሳት ሎኦ።

¹⁰ ታ አሳ ቦላ ይዳ ዩዋ ጋሶን፥ ቃትያ አየት ባንታ ናይታ ዶይስድ ምዶሶና።

¹¹ ጎዳ ሀንቆ ፁአይ ኩምስ፤ እ ባ ሱልያ ሸንያ ትግስ። የሩሳላመ ባሱዋ ታማ ኦይስ።

¹² ሀ ሳአ ካዎታፐ ዎይኮ ካዎተታን ደእያ አሳፐ ኦንካ ሞርከይ የሩሳላመ ፐንግያራ ገላና ግድ አማንበና።

¹³ ሽን ሀይስ ሀንዳይ እያ ናበታ ናጋራስነ እያ ካህነት ኦዳ ናቁዋሳ፥ ፅሎታ ሱ እያ ግዶን ጉስዳ ግሾሳ።

¹⁴ ኤንቲ ቆቀ አሳዳ፥ ኦገ ታታፎሶና፤ ኤንቲ ሱን ቱንዳ ግሾ ኤንታ ማኡዋ ኦንካ ቦቻናዉ ኮየና።

¹⁵ ሄሳ ግሾ፥ አሳይ፥ “ክችተ! ህንተ ቱና ግድያ ግሾ፥ ኑና ቦቾፍተ!” ያግድ ኤንታ ቦላ ዋስዶሶና። ኤንቲ ባቃትድ ቶይላትያ ዎደ፥ ካዎተታን ደእያ አሳይ፥ “ህንተ ኑራ ሀይሳን ዳናዉ ዳንዳኤከታ” ያግዶሶና።

¹⁶ ጎዳይ ኤንታ ላልስ፤ እ ኤንታባ ዛሪድ ቆፐና፤ ኤንታ ካህነት ቦንቸቶኮና፤ ኤንታ ጭማት ናሸቶኮና።

¹⁷ ኑ አይፈይ ማዶ ደማናዉ ፄልሸ ጮ ዳቡርስ፤ ኑና አሻናዉ ዳንዳኦና ካዎተታፐ ማዶ ናግዳ።

¹⁸ አሳይ ኑ ገዳ ካልያ ግሾ፥ ኑ ካታማ ኦገራ ሄመታናዉ ዳንዳእቦኮ። ኑ ዉርሰይ ማትስ፤ ኑ ላይይ ዉርስ፤ ኑስ ዮ ዎደይካ ጋክስ።

¹⁹ ኑና የደይሳት ፕራያ አርጋንፈ አድ ኤሶቶሶና፤ ኤንቲ ኑና ደረ ሁጰራ የደዶሶና፤ ባዞን ሆክድ ኑና ናግዶሶና።

²⁰ ጎዳይ ትይዳ ካዎይ፥ ኑ ደኡዋስ ሸምፖይ፥ ኤንታ ፅህያን ኦይከትስ። ኑ እያ ኩያ ጋርሳን ኡትድ፥ ካዎተታ ግዶን ዳና ግድ ቆፕዳ።

²¹ ህንተኖ፥ ኡፃ ቢታን ደእያ ኤዶመ አሳዉ፥ ኡፋይትተ፤ ሀሹ ጊተ። ሽን ፁአይ ህንተ ቦላ ያና፤ ህንተ ማትድ ካሎ አታና።

²² ህንተኖ፥ ፅዮነ አሳዉ፥ ህንተ ሴራይ ግዳና፤ እ ህዛፐ ህንተና ድኦ ቢታን ዎና። ሽን ኤዶመ አሳዉ፥ ህንተ ሴረታና፤ ህንተ ናጋራይካ ቆንጫና።