Milalsa 3 - ጌሻ ማፃፋ

ፆሳይ አማንስ

¹ ጎዳ ሸነ ፃምአን መቶ በእዳ አስ ታና።

² ታና ባ ስንፈ ከስድ፥ ፖኦይ ባይና ማን ዎስ።

³ ጋላስ ኩመ ታና ሾጫናዉ ዛር ዛር ባ ኩሽያ ደንስ።

⁴ እ፥ ታ ጋልባነ ታ አሹዋ ጭምስስ፤ ታ መቀ መንስ።

⁵ እ፥ ታ ዩሹዋ መቶንነ ዳቡራን ድርስ።

⁶ በን ሀይቅዳ አሳዳ ታና ማን ዎስ።

⁷ ታ ከሳ ኤኮና መላ፥ ታ ዩሹዋ ድርስ፤ ዴፆ ዱን ታና ዱፅስ።

⁸ ታኒ ማደ ኮያዳ እያ ፄግን፥ እያኮ ዋስን፥ ታና ስኦና እፅስ።

⁹ ታ ኦግያ ዎልቃማ ሹቻን ጎርድስ፤ ታ ኦግያ ጌላይስ።

¹⁰ እ፥ ታዉ ዙግድ ናግያ ባባን መላ፥ ቆሰትድ ናግያ ጋሞ መላ ግድስ።

¹¹ እ፥ ታና ታ ኦግያፐ ከስድ ዱሰረስ፤ ታና አስ ባይና በሳን የግ አግስ።

¹² ባ ዶንግያ ዳፍድ፥ ታና ዱካናዉ ማልስ።

¹³ ባ ዶንግያ ዳፍድ፥ ታ ዎዛና አይፈን ጫድስ።

¹⁴ ታኒ አሳ ኡባስ ሚቻስ አታስ፤ ጋላስ ኩመ ቦረ የስ ግዳስ።

¹⁵ እ፥ ታና መቶን ጫምስስ፤ ጫሞ ጎዳረ ኡ ታና ኡሽድ ካልስስ።

¹⁶ እ፥ ታ አቻ አጨን መንስ፤ ታና ባናን የስ።

¹⁷ ሳሮይ ታፐ ሃክስ፤ ታኒ እንጀ ዱሱ ዶጋስ።

¹⁸ ሄሳ ግሾ፥ “ታ ዎልቃይ ታፐ ኤከትስ፤ ታኒ ጎዳን ዎዳ ኡፋይሳ ኡባይ ይስ” ያጋስ።

¹⁹ ታ መቱዋነ ታ ኡንኣ ሀሳይን ደኦይ ታና ጫምስ።

²⁰ ታ ሄሳ ኩመ ዶግከ፤ ታ ሸምፖይ አዛኔስ።

²¹ ግዶሽን፥ ታ እስባ ታ ዎዛናን ቆፕያ ዎደ ታ ኡፋይሳን ኩማይስ።

²² ሄስካ፥ ኑኒ ይቦናይ ጎዳ ሲቁዋፐ ደንዶይሳና፤ እያ ቃይ ዉር ኤረና።

²³ ኤንቲ ዎንታ ዎንታ ኦራ፤ ነ ዳሮ አማንሳ።

²⁴ ጎዳይ ታ ሳማ፤ ሄሳ ግሾ፥ ታ እያን ኡፋይስ ዎና።

²⁵ እያን ባንታ ኡፋይሳ ዎይሳታስነ እያ ኮየይሳታስ ጎዳይ ሎኦ።

²⁶ አስ ስእ ግድ ጎዳ አቶተን ናግኮ ሎኦ።

²⁷ አስ ባ ናአተን መቶ ዳንዳአ ታማርኮ ሎኦ።

²⁸ ጎዳይ መቶ ኤህያ ዎደ ስእ ግድ ኡቶ።

²⁹ እያዉ ስንፈ ኡፋይስ ዳናዉ ዳንዳእያ ግሾ ባና ዝቅ ኦ።

³⁰ እ ባ ሻካላ ባቀይሳስ እሞ፤ ጫሸ ካሎ።

³¹ ጎዳይ አሰ መርናዉ የገና።

³² እ አሳ ቦላ መቶ ኤህኮካ፥ ባ መርና ሲቁዋ ዳሮተን ዛሪድ ቃቴስ።

³³ እ አሳ ቦላ መቶ ዎይኮ ኡንአ ኤህድ ኡፋይተና።

³⁴ ብታን ደኢያ ቃሾ አሳታ የያ ዎደ፥

³⁵ ኡባፈ ዎልቃማ ፆሳ ስንን አሳ ማት የትያ ዎደ፥

³⁶ ፅሎ ፕርድ ይያ ዎደ ጎዳይ ሄሳ ኡባ በኤነዬ?

³⁷ ጎዳይ ኪቶናሽን ኦድድ ፖልሳናዉ ዳንዳኤይ ኦኔ?

³⁸ ኢታባ ግድን ሎኦባ ኦድ ፖለይ ኡባፈ ቃ ፆሳ ግደነዬ?

³⁹ ያትን፥ አስ ደኦን ደእሸ ባ ናጋራ ግሾ ሴረትያ ዎደ አይስ ዙዙሚ?

⁴⁰ አነ ኑ ኦግያ ፓጮስ፤ ጎዳኮ ስሞስ።

⁴¹ ኑ ዎዛና ኑ ኩሽያራ ሳሎን ደእያ ፆሳኮ ደንድ ሀይሳዳ ያጎስ፦

⁴² ኑ ነና ናቅዳ፤ ነዉ ማካልዳ፤ ነካ ኑስ አቶ ጋባካ።

⁴³ ነ ሀንቁዋን ካመታዳ ኑና የደዳ፤ ነ ኑስ ቃቶና ኑና ዎዳሳ።

⁴⁴ ኑ ዎሳይ ኔኮ ጋኮናዳ፥ ነናተ ሻራን ካማዳሳ።

⁴⁵ አሳ ግዶን ኑና ፕቶነ ቡረ ኦዳሳ።

⁴⁶ ኑ ሞርከት ኡባይ ኑ ቦላ ባንታ ዶና ዶይዶሶና።

⁴⁷ ኑ ዳጋማንነ ግተን ገልዳ፤ መቶንነ ኡንአን ላለትዳ።

⁴⁸ ታ አሳ ጋክዳ ዋይያ ጋሶን ታ አይፈፐ አፉ ሻፋዳ ጎጌስ።

⁴⁹ ታ አይፈይ አጎና አፉፄስ።

⁵⁰ ጎዳይ ሳሎፐ ዱገ በአና ጋካናዉ ሄስ ሀኔስ።

⁵¹ ታ ካታማን ደእያ ማጫሳታ ቦላ ጋክዳባ ታ አይፈይ በእዳ ዎደ ታ ዎዛናይ አዛንስ።

⁵² ጮ ታና ሞርከይሳት ካፎ ሻንካትያዳ ታና ሻንካትዶሶና።

⁵³ ታ ፓፃ ደእሽን ታና ኦላን የግድ፥ ኦላ ዶና ሹቻን ጎርድዶሶና።

⁵⁴ ሃ ኩምድ ታ ሁጰራ ጎግያ ዎደ ታ ያስ ጋዳ ቆፓስ።

⁵⁵ አቤት ጎዳዉ፥ ታ ጪሞ ኦላን ደአሸ ነ ሱን ፄጋስ።

⁵⁶ ታ ዋሱዋ ስአናዳ ታ ነና ዎስያ ዎደ ታና ስአዳሳ።

⁵⁷ ታኒ ነና ፄግዳ ዎደ ታኮ ሺቃዳ፥ “ባቦፋ” ያጋዳሳ።

⁵⁸ አቤት ጎዳዉ ነ ታ ሞቱዋ ሞተታዳ ታና ዎዛዳሳ።

⁵⁹ አቤት ጎዳዉ፥ ነ ታ ኡንኣ በአዳሳ፤ ሄሳ ግሾ፥ ነ ታዉ ፕርዳ።

⁶⁰ ኤንቲ ሀሎ ከያናዉ ታ ቦላ ማቀትያ ማቁዋ ኡባ በአዳሳ።

⁶¹ አቤት ጎዳዉ፥ ኤንቲ ታና ጫይያ ጫሻነ ታ ቦላ ማቀትያ ማቁዋ ኡባ ስአዳሳ።

⁶² ታ ሞርከት ጋላስ ኩመ ታ ቦላ ዙዙመይሳነ ካልካሸይሳ ስአዳሳ።

⁶³ ኤንቲ ኡትሸነ ኤቅሸ ታና ቦርድ የፆሶና።

⁶⁴ አቤት ጎዳዉ፥ ኤንቲ ኦዳ ኦሱዋስ በሲያ ዛሩዋ ኤንታዉ ቃንፃ!

⁶⁵ ኤንታ ዎዛና ኤይሳ፤ ነ ባደይ ኤንታ ጋኮ።

⁶⁶ አቤት ጎዳዉ፥ ነ ኤንታ ነ ሀንቁዋን የደ፤ ሳሎፐ ጋርሳን ኤንታ ይሳ።