Mikiyaasa 6 - ጌሻ ማፃፋ

ጎዳይ እስራኤለራ ሞተቴስ

¹ ጎዳይ እስራኤለ አሳስ ኦደይሳ ስእተ። አቤት ጎዳዉ፥ ደንዳዳ ቃ ደረታ ስንን ፕርደታ፤ ኔኒ ኦድያባ ዙማት ስኦ።

² ህንተ ደረት፥ ህንተ ምኖ ሳኣ ባሶት፥ ጎዳይ ሞትያ ሞቱዋ ስእተ። ጎዳይ ባ አሳራ ሞተቴስ፤ እስራኤለ አሳራ ፓላሜስ።

³ ጎዳይ፥ “ታ አሳዉ፥ ታኒ ህንተና አይ ቆሀድና? ታኒ ህንተዉ ዋናዳ ቶሆ ግዳድና? አነ ታዉ ኦድተ!

⁴ ታኒ ህንተና ግብፀ ቢታፈ ከሳስ፤ ታ ህንተና አይለተ ቢታፈ ዎዛስ። ህንተና ካለና መላ ሙሰ፥ አሮናነ ማይራሞ ህንተዉ እማስ።

⁵ ታ አሳዉ፥ ሞአበ ካዋ ባላቅ ነዉ ቆፕዳባነ ብኦራ ናአይ ባላም እያዉ ዎይግድ ዛርዳኮ አኬክተ። ኔኒ ሴፅማፐ ጋልጋላ ብያ ዎደ፥ ኦገን ሀንዳባ አነ ቆፕተ። ሄሳ ህንተ ቆፕኮ ታኒ ጎዳይ ህንተና አሻናዉ ኦዳባ ኡባ ህንተ አኬካና” ያጌስ።

⁶ ጎዳ፥ ቃ በሳን ደእያ ፆሳ ስንን ጎይናናዉ ያሸ ታኒ አይ ኤካዳ ሺቆ? እያዉ ፁሳ ያርሾ ግዳና መላ እስ ላይ ዎፋኖ ኤካዳ ዮ?

⁷ ጎዳይ ሙኩሉ ዶርሳ ማራዘታን ዎይኮ ታሙ ሙኩሉ ሻፋን ደእያ ሃ መላ ሻማሆ ዛይተን ኡፋይታንዴ? ታ ናቁዋ ግሾ፥ ታ ባይራ ናኣ፥ ታ ሸምፑዋ ናጋራ ግሾ ታ የሉዋ እሞ?

⁸ አሳ ናኦ፥ ጎዳይ ነዉ ሎኦባ ኦድ ዎስ። ጎዳይ ኔፐ ኮየይ አይቤ? ኔኒ ሱረ ፕርዳና መላ፥ ማሮታ ዶሳና መላነ አሽከተን ነ ፆሳራ ዳና መላ ግደኔ?

እስራኤለ ናቆነ ፕርደተ

⁹ ጎዳይ፥ “የሩሳላመ ካታማ ፄግድ፥ ‘እያ ሱንስ ያሸተ ጭንጫተ’ ሴራ ፃምአነ እያ ጊግስዳይ ኦነኮ አኬክተ።

¹⁰ ናጋራንቾይ ገነን ባ ሶን ሺሽዳ ሻሉዋነ እፀትዳ ዎርዶ ማካ ሚሸታ ታኒ ዶጋነዬ?

¹¹ ያትን፥ ታኒ ዎርዶ ምዛነን ዎርዶ ማካ ሚሸታ ዋታዳ አቶ ጎ?

¹² ሄ ካታማ ዱረት ጌላተን ኩምዳይሳታ። እያን ደእያ አሳ ኡባይ ዎርዳንቾ፤ ኤንታ እንፃርሳይ ኢታ።

¹³ ሄሳ ግሾ፥ ታኒ ህንተ ናጋራ ግሾ ህንተና ይሳናዉ ደንዳስ።

¹⁴ ህንተ ማና፥ ሽን ካለከታ፤ ኮሽ ህንተፈ ዱፀና። ህንተ ቡርድ ሺሻና፥ ሽን ህንተዉ አደና፤ ህንተ ዳጋያባ ታኒ ማሻን ይሳና።

¹⁵ ህንተ ካ ዘራና፥ ሽን ጫከከታ፤ ሻማሆ ቴራ ጉምአና፥ ሽን ጎኤተከታ፤ ዎይነ ቴራ ጉምአና፥ ሽን እያ ኡየከታ።

¹⁶ ህንተ ካዋ ኦምራ ዎጋ፥ እያ ናኣ ካዋ አካባ ሶ ኢታ ኦሱዋነ ኤንታ ዞርያ ካልዳ ግሾ፥ ታኒ ህንተና ይሳና፤ ህንተና አስ ኡባይ ቦራና መላ ኦና። አሳይ ህንተና ጫይያ ጫሻ ህንተ ቶካና” ያጌስ።