Mikiyaasa 5 - ጌሻ ማፃፋ

ካለይስ ቤተለመፐ ያና

¹ ህንተኖ፥ የሩሳላመ አሳዉ፥ ህንተ ኦላንቾታ ሺሽተ! ኑ ሞርከት ኑና ተቅዶሶና፤ ኤንቲ እስራኤለ ካለይሳ ጋጩዋ ፃምአን ሾጫና ሀኖሶና።

² ጎዳይ፥ “ኤፍራታን ደእያ ቤተለመ ካታማዉ፥ ኔኒ ይሁዳ ካታማታ ግዶን ጉ፤ ሽን እያዉ ደንዶይ በንፐ ዶምድ፥ መርናዉ ግድዳይስ፥ እስራኤለ ሃራናይስ ታዉ ኔፐ ከያና” ያጌስ።

³ ሄሳ ግሾ፥ እቀ ኦይክዳ ማጫስያ ናኣ የላና ጋካናዉ፥ ጎዳይ እስራኤለ ሞርከታስ አድ እማና። ሄሳፈ ጉየ፥ ድኤትድ ደእያ እያ እሻት ስሚድ፥ ባንታ አሳራ ዋላከታና።

⁴ እ ጎዳ ምኖተን ይድ፥ ጎዳ ባ ፆሳ ሱን ዎልቃን ባ አሳ ሄማና። እ ሳኣ ጋፃ ጋካናዉ ግታ ግድያ ግሾ፥ ኤንቲ ሳሮተን ዳና።

⁵ እ ኤንታዉ ሳሮተ ግዳና። አሶረ ቢታ አሳት ኑ ቢታ ኦይክያ ዎደነ ኑ ሚፃታ የድ ገልያ ዎደ ኑኒ ላፑን ናገይሳታነ ሆስፑን ካለይሳታ ኤንታ ቦላ ደንና።

⁶ ኤንቲ ናምሩደይ ደእያ አሶረ ቢታ ኦላን ፆንድ ሃራና። አሶረ ቢታ አሳት ኑ ቢታ ኦልድ ኦይክያ ዎደነ ኑ ዛዋ የያ ዎደ እ ኑና ኤንታ ኩሸፐ አሻና።

⁷ አትዳ ያይቆባ ዛረት ዳሮ ደርያ ግዶን ጎዳይ ኪትዳ ፃሳ መላነ ማታ ቦላ ዎያ አካ መላ ግዳና። ኤንቲ አማነትድ ናገይ ጎዳፐ አትሽን፥ አሰ ግደና።

⁸ አትዳ ያይቆባ ዛረት ካዎተታ ግዶንነ ዳሮ አሳ ግዶን፥ ባዞን ዶአታ ግዶን ጋሞ መላነ ዶርሳ ዉደ ግዶን ጉፕ ዎያ ዎዳላ ጋሞ መላ ግዳና። እ ያራ አያ ዎደ የረስነ መንረስ፤ ኦንካ አሻናዉ ዳንዳኤና።

⁹ ህንተ ኩሸይ ህንተራ ኤቀተይሳታ ቦላ ደንዳና፤ ህንተ ሞርከት ኡባይ ያና።

¹⁰ ጎዳይ፥ “ሄ ጋላስ ታኒ ህንተ ፓራታ ህንተ ግዶፈ ይሳና፤ ህንተ ፓራ ጋረታ መንረና።

¹¹ ታኒ ህንተ ቢታን ደእያ ካታማታ ይሳና፤ ህንተ ሚፃ ኡባ ላላና።

¹² ህንተ ማሮታ ታኒ ይሳና፤ ህዛፐ ጉየ ሙሩነይሳት ህንተ ግዶን ዶኮና።

¹³ ታኒ ህንተ ኤቃ ምስለታነ ህንተ ጎይናናዉ ኤስዳ ሹቻታ ህንተ ግዶፈ ይሳና፤ ህዛፐ ጉየ ህንተ ህንተ ኩሸን መዳባ ጎይነከታ።

¹⁴ ታኒ አሼራ ኤቃ ፆሳታ ህንተ ግዶፈ ሾዳና፤ ህንተ ካታማታ ይሳና።

¹⁵ ታዉ ኪተትቦና ካዎተታ ቦላ ይሎንነ ሀንቆን ሀሎ ከያና” ያጌስ።