Mikiyaasa 1 - ጌሻ ማፃፋ

¹ እዮአታም አካዝነ ህዝቅያስ ካል ካልድ ይሁዳን ካዎትዳ ዎደ ሞረሴታ ካታማ አስ ግድዳ ምክያሳኮ ይዳ ጎዳ ቃላይ ሀይሳ፦ እ ሳማረባነ የሩሳላመባ ቆንጨ በእስ።

² ህንተ፥ አሳ ኡባይ ስእተ፤ ሳእነ እያ ደእያ ኡባይ ሀይሳ ሀይዝድ ስእተ። ኡባ ሃርያ ጎዳይ፥ ባ ጌሻ ኬፈ ህንተ ቦላ ማርካቴስ።

የሩሳላመነ ሳማረ ዮ

³ ሄኮ፥ ጎዳይ ባ ደእያ በሳፈ ዬስ፤ ቢታ ቃ በሳታ ቦላ ሄመቴስ።

⁴ ሙቃድ ታማን ትልኤይሳዳ፥ ሃ ደረፐ ዱገ ጎገይሳዳ፥ ደረት እያ ቶሁዋፐ ጋርሳን ትልአና፤ ዛንጋራት ጳልቀታና።

⁵ ሄስ ኡባይ ሀንዳይ ያይቆባ ቆሁዋ ግሾነ እስራኤለ ናጋራ ግሾሳ። ያይቆብ ባለታና መላ ጋሶ ግድዳይ ኦኔ? ኤንታ ካታማ ሳማረ ግደነዬ? ይሁዳ አሳይ ኤቃ ጎይናና መላ ጋሶ ግድዳይ ኦኔ? የሩሳላመ ግደነዬ?

⁶ ሄሳ ግሾ፥ ጎዳይ፥ “ታኒ ሳማረ፥ ደንባን ኬለትዳ ሹችነ ዎይነይ ቶክያ በሳ መላ ኦና። ታኒ እያ ሹቻ ዛንጋራን ሆላና፤ እያ ባሱዋ ካሎያና።

⁷ እያ ኤቃ ምስለት ኡባይ ትንቸታና፤ እያ ኤቃ ኬን ኦያ ላይማታስ እመትዳ ጋተይ ኡባይ ፁገታና፤ ታኒ እያ ኤቃታ ኡባ ይሳና። ሄ ጋተ ኡባይ ላይማን ደምዳባ ግድያ ግሾ፥ እካ ስሚድ፥ ሀራ ላይማስ እመታና” ያጌስ።

ዋሶነ ዬሆ

⁸ ሄሳ ግሾ፥ ታኒ ዬካናነ ዋሳና፤ ፅረ ካሎነ መላ ቶሆን ሄመታና። ዎርካናዳ ዋሳና፤ ቃስ ያንቾዳ ዪ ጋና።

⁹ ሳማረ ማዱንይ ፓፃናዉ ዳንዳኤና። ሄ ዋየይ ይሁዳ ቢታ ጋክስ፤ ታ አሳይ ደእያ የሩሳላመ ካታማ ፐንግያኮ ጋክስ።

¹⁰ ጋተ ካታማን ደእያ ኑ ሞርከታስ ሄሳ ኦዶፕተ፤ ኤንታ ስንን ዬኮፍተ። ቤት-ኦፊራ ካታማን ባናን ጎንዶረትድ ዬክተ።

¹¹ ህንተኖ፥ ሻፍራ ካታማን ደኤይሳቶ፥ ካሎ ዬላትሸ፥ ድኤትድ ቢተ። ፃናና ካታማን ደኤይሳት ያፐ ከያናዉ ፃሎኮና። ቤት-ኤፀላ ካታማይ ዬሆይ ደእያ በሲ ግድያ ግሾ፥ እ ህንተዉ አትያ በሲ ግዳናዉ ዳንዳኤና።

¹² መቶይ ጎዳፐ የሩሳላመ ፐንገ ጋካናዉ ይዳ ግሾ፥ ማሮታን ደእያ አሳይ፥ “ሎኦባይ ያንዴሻ!” ግድ ናግሸ ዳቡርስ።

¹³ ፅዮነ አሳ ናጋራይ ኮይሮ ህንተ ቦላ በንትዳ ግሾነ የሩሳላመ አሳ ናጋራይ ህንተናን በንትዳ ግሾ፥ ህንተኖ፥ ላክሶ ካታማን ደኤይሳቶ፥ ጋረ ፓራታ ኮርተ።

¹⁴ ሄሳ ግሾ፥ ህንተኖ ይሁዳ አሳቶ፥ ህንተ ብድ፥ ሞረሴት-ጋተ ካታማ አሳስ እሞታ እማና። አክዚባ ካታማ አሳይ እስራኤለ ካዎታ ጭማና።

¹⁵ ህንተኖ፥ ማረሻ ካታማን ደኤይሳቶ፥ ጎዳይ ህንተና ኦልድ ኦይክያ ኦላንቾታ ህንተ ቦላ ኤሀና፤ ቦንቸትዳ እስራኤለ ሀላቃት አዱላማ ጎንጎሉዋን ቆሰታና።

¹⁶ ህንተኖ፥ ይሁዳ አሳቶ፥ ህንተ ዶስያ ናይት ህንተፈ ድኤትድ ባናዉ ደእያ ግሾ፥ ህንተ ሁጵያ ሜደትተ፤ ህንተ ሁጵያ ቆራሰ ሁጰዳ ቦሮቆ ኦተ።