Medhetethi 9 - ጌሻ ማፃፋ

ፆሳይ ኖሄራ ጫቅዳ ጫቁዋ

¹ ፆሳይ ኖሄነ እያ አደ ናይታ ሀይሳዳ ያግድ አንጅስ፤ “የለትተ፥ ዳርተ፥ ሳአ ኡባ ኩምተ።

² ሳኣ ዶአት፥ ሳሎ ካፎት፥ ቢታን ዎፅ ቃፅያባይነ አባን ደእያ ሞሎት ኡባይ ህንተዉ ያሻንነ ዳጋማን ደኦ። ኤንቲ ህንተዉ ሃረቶ።

³ ታኒ ዶልያ ዱማ ዱማ ጭልኦባታ ህንተዉ እምዳይሳዳ፥ ደኦይ ደእያ ዎፅ ቃፅያ መተ ኡባይ ህንተዉ ካ ግዳና መላ እማስ።

⁴ ሽን ሸምፖይ ግዶን ደእያ ግሾ ሱ እያ ግዶን ደእያ አሾ ሞፕተ።

⁵ ኦንካ ሸምፖ ዎዳይ ፕርደታና። ቃስ አሳ ሱ ጉስያ ዶአካ ሀይቆን ፕርዳና።

⁶ ፆሳይ አሰ ባና ዳንስድ መዳ ግሾ፥ አሳ ሱ ጉስያ ኦና ግድኮካ እያ ሱይካ አሳ ኩሸን ጉካና።

⁷ ህንተ የለትተ፥ ዳርተ፥ ህንተ ሼሻይካ ሳአ ቦላ ዳሮ” ያግስ።

⁸ ሄሳፈ ጉየ፥ ፆሳይ ኖሄነ እያራ ደእያ እያ አደ ናይታ ሀይሳዳ ያግስ፤

⁹ “ህዛ፥ ታኒ ታ ጫቁዋ ህንተራ፥ ህንተ ሼሻራነ ደኦይ ደእያ መተ ኡባራ ጫቃይስ።

¹⁰ ታኒ ታ ጫቁዋ ካፎታራ፥ መህያራ፥ ሳአ ዶአ ኡባራነ፥ ማርካብያፐ ህንተራ ከይዳ፥ ደኦይ ደእያ መተ ኡባራ ጫቃይስ።

¹¹ ታኒ ህንተራ ጫቅዳይሳ መላ ህዛፐ ደኦይ ደእያ መተት ዮ ሃን ዮኮና፤ ሀ ሳኣካ ዛር ዮ ሃ ይሰና” ያግስ።

¹² ቃስካ ፆሳይ፥ “ታኒ ታፐነ ህንተፈ፥ ደኦይ ደእያ መተ ኡባፈ ግዶን ጫቅያ ጫቁዋ ማላይ ሀይሳ፤

¹³ ታኒ ታ ዙላ ሻራን ኤሳስ። እ ታፐነ ሳአ ቦላ ደእያ መተ ግዶን ደእያ ጫቁዋስ ማላ ግዳና።

¹⁴ ታ ሳሉዋ ሻራ ማይዝዳ ዎደነ ሻራን ዙል ኤቅዳ ዎደ፥

¹⁵ ታፐነ ህንተፈ ግዶን፥ ደኦይ ደእያ ዱማ ዱማ መተ ኡባፈ ግዶን ጫቅዳ ታ ጫቁዋ አኬካና። ደኦይ ደእያ መተ ኡባ ይሳናዉ ህዛፐ ጉየ ዮ ሃ ዬና።

¹⁶ ዙል ሻራን ኤቅዳ ዎደ ታ እያ በአዳ ታፐነ ሳአ ቦላ ደእያ ዱማ ዱማ መተ ኡባፈ ግዶን ጫቅዳ መርና ጫቁዋ አኬካና” ያግስ።

¹⁷ ፆሳይ ኖሄ፥ “ታኒ ታፐነ ሳአ ቦላ ደኦይ ደእያባ ኡባፈ ግዶን ጫቅዳ ጫቁዋ ማላይ ሀይሳ” ያግስ።

ኖሄነ እያ ናይታ

¹⁸ ማርካብያፐ ከይዳ ኖሄ አደ ናይት ሴማ፥ ካማነ ያፈታ፤ ካም ካናነ አዋ።

¹⁹ ሀ ሄት ኖሄ ናይታ፤ ሳአ ኡባን ደእያ አሳይ ኤንታፈ የለትዶሶና።

²⁰ ኖሄይ ጎሻንቾ፤ እ ዎይነ ቶከን ኮይሮ አስ።

²¹ እስ ጋላስ ኖሄይ ሄ ዎይንያፐ ኡይድ ማትድ ባ ዱንካንያ ግዶን ፅረ ካሎ ዝንእስ።

²² ካናነ አዋ ካም ባ አዋ ካሉዋ በእድ፥ ካረ ከይድ፥ ባ ናምኡ እሻታስ ኦድስ።

²³ ሽን ሴምነ ያፈት አፍላ ኤክድ፥ ናምአይካ ባንታ ሀሽያራ ሀሽያራ ጋ ኦይክድ፥ ጉየ ጉ ሄመት ገልድ፥ ባንታ አዋ ካሉዋ ካምዶሶና። ኤንቲ ባንታ አዋ ካሉዋ በኦና መላ ባንታ አይፍያ ሀራሶ ዛርዶሶና።

²⁴ ኖሄይ ማይ አን፥ ባርክድ፥ እያ ካሎ ናአይ ኦዳባ ኤርስ።

²⁵ ኖሄይ እያኮ፥ “ካናነይ ባደትዳባ ግዶ! እ ባ እሻታስ ዉርሰ አይለ ግዶ” ያግስ።

²⁶ ቃስካ ኖሄይ፥ “ጎዳይ፥ ሴማ ፆሳይ ጋላተቶ! ካናነይ ሴማ አይለ ግዶ፤

²⁷ ፆሳይ ያፈታ ቢታ አሶ። ያፈታ ሼሻይ ሴማ ሼሻራ ዎላ ደኦና፤ ካናነይ ያፈታ አይለ ግዶ” ያግስ።

²⁸ ዮ ሃፈ ጉየ፥ ኖሄይ ሄ ፄታነ እሻታሙ ላይ ደእስ።

²⁹ ኖሄይ ኡዱፉን ፄታነ እሻታሙ ላይ ደእድ ሀይቅስ።