Medhetethi 6 - ጌሻ ማፃፋ

አሳ ኢታተ

¹ አሳይ ሳአ ቦላ ዳርዳ ዎደ ኤንታዉ ማጫ ናይት የለትዶሶና።

² “ፆሳ ናይታ” ጌተትያ መተት ሄ ማጫ ናይት ማላ ሎኦ ግደይሳ በእድ ኤንታፈ ባንታዉ ዶርዳይሳታ ማችዶሶና።

³ ጎዳይ፥ “አሳስ ደኦ እምያ ታ አያናይ አሳን መርናዉ ዴና። አስ ሀይቀይሳ ግድያ ግሾ፥ ህዛፐ እያ ላይይ እስ ፄታነ ላታማ ግዳና” ያግስ።

⁴ ሄ ዎደነ ሄሳፈ ጉየ፥ ፆሳ ናይት አሳ ማጫ ናይታ ኤክን፥ ናይት የለትዳ ዎደ፥ ዎጋ አዱሳ አሳት ሳአ ቦላ ደእዶሶና። ኤንቲ በን ዎደ ኦላስ ምኖነ ኤረትዳ አሳታ።

⁵ ጎዳይ ሄ ዎደ ሳአ ቦላ ደእያ አሳ ኢታተ ዳርዳይሳነ ኤንታ ዎዛናይ ኡባ ዎደ ቆፕያባይ ኢታ ፃላላ ግድዳይሳ

⁶ በእድ፥ አሰ ሀ ሳአ ቦላ መዳይሳን አዛንስ፤ ባ ዎዛናን ዳሮ ቂሮትስ።

⁷ ታኒ አሰ አይስ መድና ጋዳ ቂሮታስ። ሄሳ ግሾ፥ ጎዳይ፥ “ታኒ መዳ አሰ፥ መሄ፥ ዶአ፥ ሳአራ ጎሸትያ መተታነ ሳሎ ካፎታ ሳአ ቦላፈ ይሳና” ያግስ።

⁸ ሽን ኖሄይ ጎዳ ስንን ሳባ ደምስ።

ኖሄ

⁹ ኖሄ ታርከይ ሀይሳፈ ካልድ ፃፈትዳይሳ። ኖሄይ ባ ዎደ ደእያ አሳ ግዶፈ ፆሳ ኡፋይስያነ ሱረ አስ።

¹⁰ ኖሄይ ሴማ፥ ካማነ ያፈታ ጌተትያ ሄ አደ ናይታ የልስ።

¹¹ ሄ ዎደ ቢታይ ኩመ ፆሳ ስንን ቱንስ፤ ቢታ ኡባይ ጌላተን ኩምስ።

¹² ፆሳይ ሀ ቢታ ፄልያ ዎደ ሳአን ደእያ አሳ ኡባይ ባንታ ኦግያ ቱንስድ ደኤይሳ በእስ።

¹³ ሄሳ ግሾ፥ ፆሳይ ኖሄ ሀይሳዳ ያግድ ኪትስ፤ “ታኒ አሳ ኡባ ይሳና ሀናይስ። ኤንታ ጋሶን ቢታይ ጌላተን ኩምዳ ግሾ፥ አሰ ቢታፈ ይሳና።

¹⁴ ሄሳ ግሾ፥ ምኖ ምፈ ነዉ ማርካበ ኬፃ። ሄ ማርካብያ ግዶን ዳሮ ቆልአታ ከሳ። ያታዳ ሶራነ ካረራ ማደ መላባን ሜሻ።

¹⁵ ማርካብያ ሀይሳዳ ያታዳ ኬፃ፤ አዱሳተ 300 ዋ፥ ጎምፓ 50 ዋ፥ ጌሳ 30 ዋ ኦ።

¹⁶ ማርካብያስ ካራ መ፤ ካራፐነ ጎዳፐ ግዶን እስ ዋ ግድያ በሲ ዶያ አጋ። ፐንግያ ማርካብያስ ምየ ባጋራ ከሳ፤ ማርካብያ ሄ ፖቀ ከሳዳ ኬፃ።

¹⁷ “ታኒ ሳሎፐ ጋርሳን ሸምፖራ ደእያ መተ ኡባ ይሳናዉ ዮ ሃ የዳዳ ሀ ሳኣ ቦላ ደእያባ ኡባ ይሳና።

¹⁸ ሽን ታኒ ታ ጫቁዋ ኔራ ጫቃና። ኔኒ፥ ነ ማችዉ፥ ነ አደ ናይታነ ኤንታ ማቸታ ኤካዳ ማርካብያ ግዶ ገላ።

¹⁹ ኤንቲ ኔራ ደኦን ዳና መላ፥ ደኦይ ደእያ መተ ኡባፈ ቆሞን ቆሞን አደነ ማጫ ናምአ ናምአ ኦዳ፥ ማርካብያ ግዶ ገልሳ።

²⁰ ዱማ ዱማ ቆሞ ካፎታፐ፥ ዱማ ዱማ ቆሞ መሄታፐነ ሳአራ ጎሸትያ ዱማ ዱማ ቆሞ መተ ኡባፈ ናምአ ናምአ ግድድ ደኦን ዳና መላ ኔኮ ዮ።

²¹ ቃስ ህንተነ ዶአት ማናዉ ዱማ ዱማ ቆሞ ምያ ካ ኤፋዳ፥ ማርካብያ ግዶን ቆላ” ያግስ።

²² ኖሄይ ኡባባካ ፆሳይ ኪትዳይሳዳ ኦስ።