Medhetethi 47 - ጌሻ ማፃፋ

^1-2 ዮሰፍ ባ እሻታፐ እቻሻታ ዶርድ ግብፀ ካዋኮ ገልድ ሀይሳዳ ያግስ፤ “ታ አዋይነ ታ እሻት፥ ባንታ ዶርሳ፥ ባንታ ዴሻ፥ ባንታ መህያነ ባንታዉ ደእያባ ኡባ ኤክድ ካናነ ቢታፈ ይድ፥ ሀእ ጌሳመን ደኦሶና” ያግስ።

³ ካዎይ ሄ እሻታኮ፥ “ህንተ ኦሶይ አይቤ?” ያግድ ኦይችስ። ኤንቲ ካዋኮ፥ “ኑኒ ነ አይለት ኑ አዋታዳ ዶርሰ ሃርያ አሳታ” ያግድ ዛርዶሶና።

⁴ ቃስካ ኤንቲ እያኮ፥ “ካናነ ቢታን ኮሽ ከይዳ ግሾነ ኑ መህያስ ምያባይ ይዳ ግሾ፥ ኑኒ ሀይሳን ዳናዉ ይዳ። ሀያና ኑና ነ አይለታ ጌሳመ ቢታን ደኦ ጋርክ” ያግዶሶና።

⁵ ካዎይ ዮሰፋኮ፥ “ነ አዋይነ ነ እሻት ኔኮ ይዶሶና።

⁶ ህዛ ግብፀ ቢታይ ነ ኩሸና። ሀ ቢታን ኡባፈ አድ ሎእያ በሳን ነ አዋነ ነ እሻታ ዎ፤ ኤንቲ ጌሳመ ቢታን ደኦና። ኤንታ ግዶፈ ዱማ ቃራተ ደኤይሳት ደእኮ፥ ሄሳታ ታ መህያ ቦላ ሹማ” ያግስ።

⁷ ሄሳፈ ጉየ፥ ዮሰፍ ባ አዋ ያይቆባ ገልስድ፥ ካዋ ስን አስ። ያይቆብ ግብፀ ካዋ አንጅዳፐ ጉየ፥

⁸ ካዎይ ያይቆባ፥ “ነዉ አፑን ላይ?” ያግድ ኦይችስ።

⁹ ያይቆብ ካዋኮ፥ “ታኒ ዳቡርሳን ደእዳ ላይይ ፄታነ ሀስታማ። ታ ላይይ በን ታ አዋት ዳቡርሳን ደእዳ ላይፈ ጉነ መቶይ ዳርዳ ላይ” ያግስ።

¹⁰ ሄሳፈ ጉየ፥ ያይቆብ ካዋ አንጅድ፥ እያ ስንፈ ካረ ከይስ።

¹¹ ዮሰፍ ካዎይ ኪትዳይሳዳ ባ አዋነ ባ እሻታ ግብፀ ቢታን ራምሰ ካታማ ማታን ደእያ ኡባፈ አዳ አራዳ ቢታን ኤንታ ዎስ።

¹² ዮሰፍ ባ አዋስ፥ ባ እሻታስነ ባራ ደእያ ኡባስ ኤንታ ናይታ ታይቡዋዳ ካ እሚስ።

ግብፀ ኮሻ

¹³ ቢታ ኡባን ኮሽ ሱልዳ ግሾ ቢታን ኡባን ካ ባዋ፤ ግብፀይነ ካናነ ቢታይ ቆሄትዶሶና።

¹⁴ ዮሰፍ ግብፀ ካ ባይዝድ፥ ግብፀንነ ካናነ ቢታታን ደእያ ሚሽያ ኡባ ሺሽድ ግብፀ ካዋ ኬ ገልስስ።

¹⁵ ግብፀ ሚሸይነ ካናነ ሚሸይ ዉርዳ ዎደ ግብፀ አሳ ኡባይ ዮሰፋኮ ይድ “ኑስ ካ እማ። ኑ ሚሸይ ዉርዳ ግሾ ኑኒ ነ ስንን አይስ ኮሻን ሀይቃኔ?” ያግዶሶና።

¹⁶ ዮሰፍ ኤንታኮ፥ “ህንተ መህያ ኤክ ዪተ። ህንተ ሚሸይ ዉርዳባ ግድኮ፥ ታኒ ካ ህንተ መህያራ ላማና” ያግስ።

¹⁷ ሄሳ ግሾ፥ ኤንቲ ባንታ መህያ ዮሰፋስ ኤህዶሶና። ዮሰፍ ኤንታ ፓራ፥ ዶርሳ፥ ዴሻ፥ ሚዛነ ሀርያ ካራ ላምስ። እ ሄ ላይ ኤንታ መህያ ኡባራ ካ ላምድ፥ ኤንታ ሙዝድ ሻችስ።

¹⁸ ኤንቲ ካልያ ላይን እያኮ ይድ “ኑኒ ኑ ጎዳፐ ቆስያባይ ባዋ፤ ኑ ሚሸይ ኡባይ ዉርስ። ኑ መህያካ ነዉ እም ድግዳ። ኑ ቦላፈነ ኑ ጋድያፐ አትሽን፥ ኑ ጎዳስ እማናባይ ሀራባይ ባዋ።

¹⁹ ኑኒ ነ በእሽን አይስ ኮሻን ሀይቃኔ? ኑ ጋደይካ አይስ ዪ? ኑናካ ኑ ጋድያካ ሻማዳ ኑስ ካ እማ። ኑኒ ካዋስ አይለታና፥ ኑ ጋደይካ እያባ ግዶ። ኑኒ ሀይቆና አታና መላ ኑ ጋደይካ ኦፆና መላ ዘረ ኑስ እማ” ያግዶሶና።

²⁰ ዮሰፍ ግብፀ ቢታ ኡባ ካዋስ ሻምስ። ኮሽ ሱልን፥ ግብፀ አሳይ ኡንኤትድ ባንታ ጋድያ ባይዝን ጋደይ ካዉዋባ ግድስ።

²¹ ዮሰፍ አሳ ኡባ ግብፀስ ሀ ጋፃፐ ህን ጋፃ ጋካናስ ካዋስ አይለ ኦስ።

²² ሽን ካዎይ ካህነታስ ካ እምያ ግሾ ዮሰፍ ኤንታ ጋድያ ሻምቤና። ሄሳ ግሾ፥ ባንታ ጋድያ ባይዝቦኮና።

²³ ዮሰፍ አሳኮ፥ “ህዛ ሀች ታኒ ህንተናነ ህንተ ጋድያ ካዋስ ሻምዳ ግሾ፥ ዘረ ኤፍድ ህንተ ጋደን ዘርተ።

²⁴ ሽን ካ ሺሽያ ዎደ አይፍዳባፐ እቻሹ ኩሽያፐ እስ ኩሽያ ካዋስ እምተ። አትዳ ኦይዱ ኩሸይ ህንተ ጋድያስ ዘረ፥ ህንተዉነ ህንተ ሶ አሳስ ካ ግዶ” ያግስ።

²⁵ ኤንቲ፥ “ኔኒ ኑና አሻዳሳ። ኑ ጎዳ ስንን ኑኒ ሳበትኮ፥ ኑኒ ካዋስ አይለታና” ያግዶሶና።

²⁶ ሄሳ ግሾ፥ ዮሰፍ ግብፀ ቢታን አይፍዳባፐ እቻሹ ኩሽያፐ እሱዋ ካዋስ እመይሳ ህገ ከስስ። ሄ ዎጋይካ ሀች ጋካና ኤቅድ ደኤስ። ካህነታ ጋድያፐ አትሽን፥ ሀር ኡባይ ካዉዋባ ግድስ።

²⁷ እስራኤለት ግብፀ ቢታን ጌሳመ ግያ በሳን ደእዶሶና። ኤንቲ ያን ዱረትዶሶና፤ የለት ዳርዶሶና።

²⁸ ያይቆብ ግብፀ ቢታን ታማነ ላፑን ላይ ደእስ። ያይቆብ ደእዳ ላይይ ፄታነ ኦይታማነ ላፑና።

²⁹ እስራኤለስ ሀይቅያ ዎደይ ማታትን፥ ባ ናኣ ዮሰፋ ፄግስድ ሀይሳዳ ያግስ፤ “ታኒ ነ ስንን ሳበትዳባ ግድኮ፥ ነ ኩሽያ ታ ሸምፑዋ ቦላ ዎ። ኔኒ ታዉ ምሸትያባ ግድኮ ታና ግብፀን ሞግከ ጋዳ ታዉ ጫቃ።

³⁰ ሽን ታኒ ሀይቅያ ዎደ ታና ግብፀፈ ኤፋዳ፥ ታ ማይዛት ሞገትዳሱዋን ሞጋ” ያግስ። ዮሰፍ፥ “ታኒ፥ ነና ነ ግዳይሳዳ ኦና” ያግስ።

³¹ ያይቆብ እያኮ፥ “አነ ታዉ ጫቃ” ያግስ። ዮሰፍ እያዉ ጫቅስ። ሄሳፈ ጉየ፥ እስራኤለይ ባ ጉፍያ ቦላ ካትድ ፆሳ ጎይንስ።