Medhetethi 44 - ጌሻ ማፃፋ

ይዳ ዋንጫ

¹ ዮሰፍ ባ ኬ ካፑዋ፥ “ኔኒ ሀ አሳት ቶካናዉ ደንዳእዳ ኬና ኤንታ ኦጎሩዋን ካ ኩን። ኤንታ ኡባ ሚሽያ ኤንታ ኦጎሩዋ ዶናን ዶናን የጋ።

² ያታዳ ዉርሰ ካሉዋ ኦጎሩዋ ዶናን ታ ብራ ዋንጫነ እ ሻማናዉ ኤህዳ ሚሽያ የጋ” ያግድ ኪትስ። እ ዮሰፍ ግዳይሳዳ ኦስ።

³ ሳእ ዎንትን ሄ አሳት ባንታ ሀረታ ኤክድ ባናዉ ደንድዶሶና።

⁴ ኤንቲ ሄ ካታማፐ ከይድ ሃክ ቦና ደእሽን፥ ዮሰፍ ባ ኬ ካፑዋኮ፥ “ሀ አሳታ ጌዶ ካላ። ኔኒ ኤንታ ጋክዳ ዎደ ኤንታኮ፥ ‘ህንተ አይስ ኬሀ ኢታን ዛርደቲ?

⁵ ሀይስ ታ ጎዳይ ኡየይሳነ ፁራባ ደምያ ዋንጫ ግደይሳ ኤረከቲ? አይስ ካይሶትደቲ? ሀይስ ህንተ ኦዳባይ ዳሮ ኢታባ’ ያጋ” ያግስ።

⁶ ያትን እ ኤንታ ጌዶ ካል ጋክድ፥ ሄ ግዳይሳዳካ ኤንታዉ ኦድስ።

⁷ ሽን ኤንቲ፥ “ጎዳዉ ሀይሳ መላባ አይስ ኦደታይ? ሄሳ መላባ ኦሶይ ኑፐ ነ አይለታፐ ሃኮ።

⁸ ኑኒ ሀር አቶሽን፥ ኑ ኦጎሩዋ ዶናፐ ደምዳ ሚሽያ ካናነ ቢታፈ ጉየ ዛሪድ ነዉ ኤህዳይሳ ኤራሳ። ነ ጎዳ ኬፈ ኑኒ ዎርቃ ዎይኮ ብራ ዋት ካይሶታኔ?

⁹ ነ አይለታ ግዶን ሄ ዋንጫይ በንትዳ ኡራይ ሀይቆ። ቃስ አትዳ ኑካ ኑ ጎዳስ አይለ ግዳና” ያግዶሶና።

¹⁰ እ ኤንታኮ፥ “ሄሳ ግድኮ ሎኦ፥ ህንተ ግዳይሳዳ ሀኖ። ዋንጫ ኤክዳ ኦንካ ታ አይለ ግዳና፤ አትዳይሳት ሳሮን ቤታ” ያግስ።

¹¹ ሄሳፈ ጉየ፥ ኤንቲ ኤለስድ ባንታ ኦጎሩዋ ኦጎሩዋ ሳአን ዎድ ብልዶሶና።

¹² ሄ ካፖይ ኡባፈ ባይራ ኦጎሩዋፐ ዶምድ ዉርሰ ካሉዋይሳ ጋካናስ ኮይድ፥ ሄ ዋንጫ ብንያመ ኦጎሩዋፐ ደምስ።

¹³ ሄሳን ኤንቲ አዛንድ፥ ባንታ ማኡዋ ፔዶሶና። ባንታ ኦጎሩዋ ሀረታ ቦላ ጫንድ፥ ጉየ ካታማ ስምዶሶና።

¹⁴ ይሁድ ባ እሻታራ ዮሰፋኮ ገልያ ዎደ ዮሰፍ ሶን ደኤስ፤ ኤንቲ እያ ስንን ሳአን ጉፋንዶሶና።

¹⁵ ዮሰፍ ኤንታኮ፥ “ህንተ አይብ ፓላባ ኦደቲ? ታ መላ አስ ፁራባ ደማናዉ ዳንዳኤይሳ ህንተ ኤረከትዬ?” ያግስ።

¹⁶ ይሁድ፥ “ታ ጎዳስ ኑኒ አይ ጋኔ? ኑኒ አይ ኦደትያባይ ደኢ? ኑ ፅሎተ ኑኒ ዋት በሳኔ? ፆሳይ ነ አይለታ ናቁዋ ቆንጭስስ። ህዛ ኑኒካ ሄ ዋንጫይ በንትዳ ኡራይካ ታ ጎዳስ አይለ ግድዳ” ያግስ።

¹⁷ ሽን ዮሰፍ፥ “ሄሳ መላባ ኦናይስ ታፐ ሃኮ፤ ታ ዋንጫይ እያፐ በንትዳ ኡራ ፃላል ታ አይለ ግዳና። ሀንኮ ህንተ ህንተ አዋኮ ጉየ ሳሮ ስምተ” ያግስ።

¹⁸ ይሁድ እያኮ ሺቅድ “ታ ጎዳዉ፥ ኔኒ ካዋ መላ ግድኮካ ታኒ ኔራ ኦደታናዉ ነና ዎሳይስ። ታና ነ አይልያ ሀንቀቶፋ።

¹⁹ ኔኒ ታ ጎዳይ ኑና ነ አይለታ፥ ‘ህንተዉ አው ዎይኮ እሽ ደኢ?’ ጋዳ ኦይቻዳሳ።

²⁰ ኑኒካ፥ ‘ኑስ ጭምዳ አዋይ ደኤስ። እ ጭማተን የልዳ ካሎ ናአይካ ደኤስ። ሄ ናኣ እሻይ ሀይቅስ፥ ባ አየን እስኖ፥ እያ አዋይ እያ ዳሮ ዶሴስ’ ያግዳ።

²¹ “ኔኒ ኑኮ፥ ‘ታኒ እያ በአና መላ ታዉ ኤህተ’ ያጋዳሳ።

²² ያትን ኑኒ፥ ‘ሄ ናአይ ባ አዋፐ ሻከታናዉ ዳንዳኤና፤ ሻከትኮ እያ አዋይ ሀይቃና’ ያግዳ።

²³ ሽን ኔኒ፥ ‘ህንተ ካሎ እሻይ ህንተራ ዮና እፅኮ፥ ታ አይፍያ ዛር በኤከታ’ ያጋዳሳ።

²⁴ ኑኒ ኑ አዋኮ ስሚድ ብዳ ዎደ ነ ግዳይሳ እያዉ ኦድዳ።

²⁵ “ኑ አዋይ፥ ‘ጉየ ብድ ጉ ካ ሻምተ’ ያግን፥

²⁶ ኑኒ እያኮ፥ ‘ኑ ካሎ እሻይ ኑራ ቦና እፅኮ፥ ኡራ አይፍያ በአናዉ ዳንዳኦኮ። ኑ ካሎ እሻይ ኑራ ብያባ ግድኮ፥ ኑኒ ያ ባና’ ያግዳ።

²⁷ “ያትን ኑ አዋይ ኑና፥ ‘ታ ማችያ ራሄላ ታዉ ናምኡ አደ ናይታ የልዳይሳ ህንተ ኤሬታ።

²⁸ ኤንታፈ እሶይ ታፐ ሻከትድ ብን፥ እያ ዶእ ሞና አገና ያጋስ። ሀች ጋካናዉ ታኒ እያ በአብከ።

²⁹ ሀይሳ ቃስ ታፐ ህንተ ሻክ ኤፍን፥ ኢታባይ እያ ጋክኮ፥ ህንተ ታና ታ ጭማተን አፉ ሙዝሸ ታ ሀይቁዋ ማታየታ’ ” ያግስ።

^30-31 “ሄሳ ግሾ፥ ሀእ ታኒ ጉየ ታ አዋኮ ብያ ዎደ ብንያመይ ታራ ባናዉ በሴስ። ታ አዋይ ናኣ ሸምፖፈ ዶስያ ግሾ፥ ናአይ ኑራ ባይናይሳ በእኮ ሀይቃና። ኑኒ ነ አይለት ኑ አዋ ጭማተ አፉን ዱፎ ገልሶስ።

³² ታኒ ነ አይለይ ናኣ ታ ዋሰተን ኤካስ። ቃስ፥ ‘ታ አዋዉ፥ ታኒ እያ ነዉ ሳሮ ዛራዳ ኤሆና እፅኮ ታ ደኡዋ ኡባን ነ ባደይ ታና ጋኮ’ ያጋስ።

³³ “ያንያ ግሾ፥ ታኒ ነ አይለይ ናኣ ግሾ አይለታዳ ሀይሳን አታና ናአይ ባ እሻታራ ጉየ ስሞ።

³⁴ ናአይ ባይና ታኒ ዋናዳ ጉየ ታ አዋኮ ስማኔ? ታና ታ አዋይ ሴለታና ሴላ በሶፎ” ያግስ።