Medhetethi 43 - ጌሻ ማፃፋ

ዮሰፋ እሻት ናምአን ግብፀን

¹ ካናነ ቢታን ኮሻይ ሀእካ ካሰይሳፈ አድ ዎልቃምስ።

² ያንን፥ ኤንቲ ግብፀፈ ኤህዳ ካ ኡባ ምድ ኦንግን፥ ኤንታ አዋይ፥ “ቃስካ ግብፀ ብድ ኑስ ጉ ካ ሻምተ” ያግስ።

³ ሽን ይሁድ፥ “ሄ ኡራይ ኑና፥ ‘ህንተ እሻይ ህንተራ ዮና እፅኮ፥ ታ ሶምኡዋ ዛር በኤከታ’ ያግድ ምንድ ኦድስ።

⁴ ኔኒ ኑ እሻ ኑራ የድኮ፥ ኑኒ ግብፀ ብድ ነዉ ካ ሻማና።

⁵ ሽን ሄ ኡራይ፥ ‘ህንተ እሻይ ህንተራ ዮና እፅኮ ህንተ ታ ሶምኡዋ ዛር በኤከታ’ ” ያግዳ ግሾ፥ ኔኒ እያ የዶናባ ግድኮ ኑኒ ቦኮ።

⁶ ያትን እስራኤለይ፥ “ህንተ፥ ‘ኑስ ሀራ እሽ ደኤስ’ ግድ ኦድድ ሀ መቱዋ ታ ቦላ አይስ ኤህደቲ?” ያግስ።

⁷ ኤንቲ ዛሪድ፥ “ሄ ኡራይ ኑባነ ኑ ሶ አሳባ ምንድ ኦይችስ። እ ኑኮ፥ ‘ህንተ አዋይ ፓፃ ደኢ? ህንተዉ ሀራ እሽ ደኢ?’ ያግድ ኦይችስ። ኑኒ እ ኦይችዳይሳ እያዉ ዛርዳ። እ ኑና፥ ‘ህንተ እሻ ኤክ ዪተ’ ጋናባ ኑ አዉደ ኤርዶ?” ያግዶሶና።

⁸ ይሁድ ባ አዋ እስራኤለኮ፥ “ኑኒ፥ ኔንነ ኑ ናይት ኮሻን ሀይቃናፐ ናኣ ታራ የዳ፥ ኑኒ ባና።

⁹ ናአ ታ ዋሰተን እማ፤ እያባ ታና ኦይቻ። ታኒ እያ ነዉ ሳሮ ዛራዳ ኤሆና እፅኮ፥ ታ ደኦ ኡባን ነ ባደይ ታና ጋኮ።

¹⁰ ኑ ጋምኦናባ ግድያኮ፥ ሀኖደ ናምአን ያ ስማና ሽን” ያግስ።

¹¹ ኤንታ አዋይ እስራኤለይ፥ “ሄሳ ግድኮ ሃረይሳስ ኩሸ ገንያባ፥ ሀ ቢታን ካፅያባ ኡባፈ ሎኦባ ዶርተ። ሄስካ፥ ቅባተ፥ ሽቶ፥ ዱማ ዱማ ሳዎ፥ ኤስነ፥ ኦቾሎነ ህንተ ኦጎሩዋን የግድ፥ ኤክድ ቢተ።

¹² ህንተ ኦጎሩዋ ዶናን ስምዳ ሚሸይ ባለትዳባ ግዳናዉ ዳንዳእያ ግሾ፥ ሚሽያ ናምኡ ኩሸ ኦድ ኤክ ቢተ።

¹³ ህንተ እሻ ኤክድ፥ ሄ ኡራኮ ኤለስድ ጉየ ቢተ።

¹⁴ እ ሀንኮ ህንተ እሻነ ብንያመ ህንተራ የዳና መላ ኡባ ዳንዳእያ ፆሳይ ሄ ኡራይ ህንተዉ ቃታናዳ ኦ። ታና ግድኮ፥ ታ ናይታፐ መላ አትኮካ አታስ” ያግስ።

¹⁵ ሄሳ ግሾ፥ እሻንት ዎላ ባንታ እምያባታ፥ ናምኡ ኩሸ ሚሽያነ ብንያመ ባንታራ ኤክድ ብዶሶና። ኤንቲ ግብፀ ጋክድ፥ ዮሰፋ ስን ሺቅዶሶና።

¹⁶ ዮሰፍ ብንያመ ኤንታራ በእዳ ዎደ ባ ኬ ካፑዋኮ፥ “ሀ አሳታ ታ ሶ ኤካዳ ባ። እስ መሄ ሹካዳ ጊግሳ፤ ኤንቲ ካ ታራ ማና” ያግድ ኪትስ።

¹⁷ ያትን ካፖይ፥ ዮሰፍ ኪትዳይሳዳ ሄ አሳታ እያ ሶ ኤፍስ።

¹⁸ ኤንቲ ዮሰፋ ሶ ብሸ፥ ያይድ፥ “ኤንቲ ኑና ሀይሳ ኤህዳይ ኮይሮ ኑ ኦጎሩዋን ስምዳ ሚሽያ ግሾ ግዶና አገና። ኤንቲ ኑና ቆህድ አይለተን ሃሮናነ ኑ ሀረታ ኤኮና አጎኮና” ያግ ህርግዶሶና።

¹⁹ ሄሳ ግሾ፥ ኤንቲ ዮሰፋ ሶ ፐንገ ጋክድ፥ ኬ ካፑዋ ኦድስዶሶና።

²⁰ “ጎዳዉ፥ ኑኒ ኮይሮ ካ ሻማናዉ ሀይሳ ይዳ።

²¹ ጉየ ስምሸ ኑኒ ቃማ አቅያ በሳን ኦጎሩዋ ብልያ ዎደ ሁጰን ሁጰን ኑ ሚሸይ ፓጮና ኑ ኦጎሩዋን ደኤይሳ ደምዳ። ሄኮ፥ ኑኒ ሄ ሚሽያ ጉየ ኤክ ይዳ።

²² ሀእ ኑኒ ካ ሻማናዉ ሀራ ሚሸ ኦይክ ይዳ። ኑ ሚሽያ ኑ ኦጎሩዋን ኦን የግዳኮ ኤሮኮ” ያግዶሶና።

²³ እ ዛሪድ፥ “አይኮይ ባዋ፥ ያዮፍተ፤ ህንተ ፆሳይ፥ ህንተ አዋ ፆሳይ፥ ህንተ ኦጎሩዋን ህንተዉ ሚሸ እሚስ። ታኒ ህንተ ጭግዳ ሚሽያ ኩመ ኤካስ” ያግስ። ሄሳፈ ጉየ፥ ስሞና ኤንታኮ ከስስ።

²⁴ ሄ ኡራይ ሄ አሳታ ዮሰፋ ሶ ኤፍድ፥ ኤንታ ቶሁዋስ ሃ ኤህን፥ ኤንቲ ሜጨትዶሶና። ኤንታ ሀረታስካ ምያባ የግስ።

²⁵ ኤንቲ ዮሰፋራ ካ ማናይሳ ስእዳ ግሾ ባንታ እማናባታ ዮሰፋስ ጊግስዶሶና።

²⁶ ዮሰፍ ባ ሶ ገልዳ ዎደ ኤንቲ ኤህዳ ባንታ እምያባታ እያዉ እምድ፥ እያ ስንን ሳአ ጋክድ ዝግዶሶና።

²⁷ እ ኤንታ ሳሮተ ኦይች ስሚድ፥ “ህንተ ታዉ ኦድዳ ህንተ ጭምዳ አዋይ ሎኦ ደኢ? ሀእካ እ ፓፃ ደኢ?” ያግስ።

²⁸ ኤንቲ፥ “ኤ፥ ነ አይለይ፥ ኑ አዋይ ፓፃ ደኤስ፤ እ ሎኦ” ያግድ፥ ሆክድ እያዉ ዝግዶሶና።

²⁹ እ ባ አየ ናኣ ብንያመ በእዳ ዎደ ኤንታኮ፥ “ህንተ ኦድዳ ዉርሰ ህንተ እሻይ ሀይሴ?” ያግስ። ብንያመ፥ “ታ ናአዉ፥ ነና ፆሳይ አንጆ” ያግስ።

³⁰ ዮሰፍ፥ እያ እሻባይ እያዉ ጎምፓን ሴልዳ ግሾ፥ ኤለስድ፥ ቆልአ ገልድ ያን ዬክስ።

³¹ እ ባ ሶምኡዋ ሜጨትዳፐ ጉየ ከይድ ባና ምንድ፥ ካ አና መላ ኪትስ።

³² ኤንቲ ዮሰፋስ ዱማ፥ እያ እሻታስ ዱማ አዶሶና። ግብፀ አሳይ እብራወ አሳታራ እስፈ መይስ ባንታና ካዉሽያባ ኦ ፄልያ ግሾ እያራ ምያ ግብፀ አሳታስ ዱማ አዶሶና።

³³ ኤንቲ ዮሰፋ ስንን ባይራይ ባ ባይራተን፥ ካሎይ ባ ካሎተን ማራን ኡትዶሶና። ኤንቲ እሶይ እሱዋ ፄልድ፥ ኤንታ ዋትድ ኡትስዳኮ በእድ ማላለትዶሶና።

³⁴ ዮሰፋ ጋይታፐ ኤንታዉ ቁም ግሸቴስ፥ ሽን ብንያመስ ሀራታፐ አድ እቻሹ ኩሸ እሚስ። ያንድ፥ ኤንቲ ዮሰፋራ ምድ ኡይድ ኡፋይትዶሶና።