Medhetethi 42 - ጌሻ ማፃፋ

ዮሰፋ እሻት ግብፀ ቢታን

¹ ያይቆብ ግብፀን ካ ደኤይሳ ስእዳ ዎደ ባ አደ ናይታ፥ “ህንተ እሶይ እሱዋ አይስ ፄሌቲ?

² ግብፀን ካ ደኤይሳ ታኒ ስአስ፤ ያ ብድ፥ ኑኒ ሀይቆና መላ ጉ ካ ሻምተ” ያግስ።

³ ያትን፥ ዮሰፋ እሻት ታማት ካ ሻማናዉ ግብፀ ብዶሶና።

⁴ ሽን ያይቆብ እ ቆሄታና ግድ ህርግዳ ግሾ ዮሰፋ እሻ ብንያመ እያ እሻታራ የድቤና።

⁵ ካናነ ቢታን ዎልቃማ ኮሽ ደእያ ግሾ፥ ካ ሻማናዉ በይሳታራ እስራኤለ አደ ናይት ግብፀ ገልዶሶና።

⁶ ሄ ዎደ ዮሰፍ ሄ ቢታ አይስያ ግሾ ቢታን ደእያ አሳ ኡባስ ካ ባይዜስ። ሄሳ ግሾ፥ ዮሰፋ እሻት ያ ጋክዳ ዎደ ባንታ ሶምኡዋ ሳአ ጋድ እያዉ ዝግዶሶና።

⁷ ዮሰፍ ባ እሻታ በእዳ መላካ ኤር አግስ። ሽን እ ኤንታ ኤሮና አሳዳ ሀንድ፤ ኤንታኮ፥ “ህንተ አዉፐ ይደት?” ያግድ ኦይችስ። ኤንቲ፥ “ካ ሻማናዉ፥ ካናነ ቢታፈ ይዳ” ያግዶሶና።

⁸ ዮሰፍ ባ እሻታ ኤርስ፥ ሽን ኤንቲ እያ ኤርቦኮና።

⁹ ዮሰፍ ኤንታባ አሙህዳ ባ አሙሁዋ አኬክድ ኤንታኮ፥ “ህንተ ዎቻናዉ ይዳ አስ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።

¹⁰ ኤንቲ፥ “አካይ፥ ኑ ጎዳዉ፥ ኑኒ ዎቻናዉ ይዳ አስ ግዶኮ። ኑኒ ነ አይለት ካ ሻማናዉ ይዳ።

¹¹ ኑኒ ኡባይካ እስ አዋ ናይታ። ኑኒ ነ አይለት አማነትያ አስ” ያግዶሶና።

¹² ዮሰፍ ኤንታኮ፥ “አካይ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።

¹³ ሽን ኤንቲ፥ “ኑኒ ነ አይለት ካናነ ቢታን ደእያ እስ ኡራ ናይታ፤ ኑኒ ታማነ ናምኡ እሻንታ። ዉርሰ ካሎይ ሀእ ኑ አዋራ ሶን ደኤስ፥ እሶይ ሀይቅስ” ያግዶሶና።

¹⁴ ዮሰፍ ኤንታኮ፥ “ታኒ ህንተዉ ኦድዳይሳዳ ህንተ ቢታ ዎቸይሳታ።

¹⁵ ህንተ ፓጨታናይስ ሀይሳና፤ ቱማ ካዎይ ሀይቆ፥ ህንተ ዉርሰ ካሎ እሻይ ሀይሳ ዮና እፅኮ፥ ህንተ ሀ በሳፈ ቤከታ።

¹⁶ ህንተ ኦደይስ ቱማ ግደይሳ ፓጫናዉ፥ ህንተፈ እሱዋ ኪትተ። እ ህንተ እሻ ኤክድ ዮ፥ አትዳይሳት ቃሾ ኬን ጋምኤታ። ሄስ ሃኖና፥ ካዎይ ሀይቆ፥ ህንተ ቢታ ዎቸይሳታ” ያግስ።

¹⁷ ኤንታና ሄ ጋላስ ቃሾ ኬን ቃችስ።

¹⁸ ሄን ጋላሳን ዮሰፍ ኤንታኮ፥ “ታኒ ፆሰ ያይያ አስ። ያንያ ግሾ፥ ህንተ እስባ ኦኮ ህንተ ሸምፑዋ አሻና።

¹⁹ ህንተ ቱማካ አማነትያ አሰ ግድኮ፥ ህንተ እሻታፐ እሶይ ሀይሳን ቃሾ ኬን ደኦ፤ አትዳይሳት ኮሻትያ ህንተ ሶ አሳስ ካ ኤፍተ፤

²⁰ ሽን ህንተ ዉርሰ እሻ ታኮ ኤህኮ፥ ህንተ ቃላይ ቱማታና፤ ህንተካ ሀይቆና አታና” ያግስ። ኤንትካ እያ ኦዳ ኤሮ ግድ ኤክዶሶና።

²¹ ኤንቲ እሶይ እሱዋኮ፥ “ቱማ ኑኒ ኑ እሻስ ኦዳባይ ኑና ካኤስ። እ ባ ሸምፑዋስ ዋትዋትድ ዎስያ ዎደ ኑኒ ስእሸ እፅዳ። ሄሳ ግሾ፥ ሀ ዋየይ ኑና ጋክስ” ያግዶሶና።

²² ሮቤል፥ “ታኒ ህንተና፥ ናኣ ቦላ ናጋራ ኦፍተ ጋዳ ኦዳስ፥ ሽን ህንተ ስኦና እፅደታ። ሀእ እያ ሱይ ኑና አቼስ” ያግስ።

²³ ዮሰፍ ኤንታራ ቱርጁማነን ኦደትያ ግሾ ኤንቲ ግያባ እ ኤረይሳ ኤንቲ አኬክቦኮና፤

²⁴ እ ኤንታፈ ሀራሶ ብድ ዬክስ። ሽን ዛር ኤንታኮ ይድ፥ ኤንታዉ ጉጅድካ ኦድስ። እ ስሞና ኤንታ ግዶፈ ከስድ ኤንቲ በእሽን ቃችስ።

ዮሰፋ እሻት ካናነ ስሙዋ

²⁵ ዮሰፍ ባ አይለታ፥ “ካ ኤንታ ኦጎሩዋን ኩንተ፤ ኤንታ ሚሽያካ ዛሪድ፥ ኤንታ ኦጎሩዋን ኦጎሩዋን የግተ። ኤንታዉ ኦገስ ሽንቀካ እምተ” ያግድ ኪትስ።

²⁶ ኤንቲ እ ግዳይሳዳ ኦዳፐ ጉየ፥ ዮሰፋ እሻት ካ ባንታ ሀረታ ቦላ ጫንድ ብዶሶና።

²⁷ ኤንቲ ቃማ አቅያ በሳን ኤንታፈ እሶይ ባ ሀርያስ ካፈ የጋናዉ ባ ኦጎሩዋ ብልድ፥ ሄ ኦጎሩዋ ዶናን ደእያ ባ ሚሽያ ደምስ።

²⁸ እ ባ እሻታኮ፥ “ታ ሚሸይ ታዉ ስምስ፤ ቱማ ሀይሳ በእተ፤ ታ ኦጎሩዋን ደኤስ” ያግስ። ኤንቲ ዳጋምድ ኮኮርሸ፥ እሶይ እሱዋኮ ስሚድ፥ “ፆሳይ ኑ ቦላ ኦዳባይ ሀይስ አይቤ?” ያግዶሶና።

²⁹ ኤንቲ ካናነ ቢታን ደእያ ባንታ አዋ ያይቆባኮ ይድ፥ ባንታና ጋክዳባ ኡባ እያዉ ኦድዶሶና።

³⁰ ኤንቲ እያኮ፥ “ሄ ቢታ ሃርያ ኡራይ፥ ኑና ሄ ቢታ ዎችያ አሳዳ ኦድ ኑ ቦላ ይሎትድ ኦደትስ።

³¹ ሽን ኑኒ እያኮ፥ ‘ኑኒ አማነትያ አስ፥ ቢታ ዎቸይሳታ ግዶኮ።

³² ኑኒ ታማነ ናምኡ እሻንት እስ አዋ ናይታ። እሶይ ሀይቅስ፤ ዉርሰ ካሎይ ካናነ ቢታን ሀእ ኑ አዋራ ደኤስ’ ያግዳ።

³³ ያትን ሄ ቢታ ሃርያ ኡራይ ኑና፥ ‘ህንተ አማነትያ አሰ ግደይሳ ታኒ ኤራና መላ ህንተ እሻታፐ እሱዋ ሀይሳን ታ ማታን አግድ፥ ኮሻትያ ህንተ ሶ አሳስ ካ ኤክድ ቢተ።

³⁴ ህንተ ቢታ ዎቸይሳታ ግዶና፥ አማነትያ አስ ግደይሳ ታኒ ኤራና መላ፥ ህንተ ዉርሰ እሻ ታኮ ኤክድ ዪተ። ያትኮ፥ ታኒ ሀን አትዳ ህንተ እሻ ህንተዉ ዛራዳ እማና። ህንተካ ሀ ቢታን ደእድ ዛልአናዉ ዳንዳኤታ’ ” ያግዶሶና።

³⁵ ኤንቲ ባንታ ኦጎሩዋፐ ካ ቆልሸ፥ ባንታ ኦጎሩዋን ኦጎሩዋን ባንታ ሚሽያ ቃሹዋራ ኡትዳይሳ ደምዶሶና። ኤንትነ ኤንታ አዋይ ሄ ቃሹዋራ ደእያ ሚሽያ በእድ ያይዶሶና።

³⁶ ኤንታ አዋ ያይቆብ ኤንታኮ፥ “ህንተ ታና ታ ናይታፐ መላ አሽደታ። ዮሰፍ ባዋ፥ ስሞን ባዋ፥ ሀእ ቃስ ብንያመ ኤፋናዉ ኮዬታ። ኡባባይ ታዉ ዞኮ ዛርስ” ያግስ።

³⁷ ሄሳፈ ጉየ፥ ሮቤል ባ አዋኮ፥ “ታኒ ብንያመ ነዉ ዛራዳ ኤሆና እፅኮ፥ ታ አደ ናይታ ናምኣካ ዎ። ታና አማነታዳ እያ ታ ኩሸን የጋ፤ ታኒ እያ ዛራዳ ኤሀና” ያግስ።

³⁸ ሽን ያይቆብ ኤንታኮ፥ “ታ ናአይ ህንተራ ቤና፤ እያ እሻይ ሀይቅን፥ አትዳይ እያ ፃላላ። ህንተ ኤፍሽን፥ ኦገን ኢታባይ እያ ጋክኮ፥ ህንተ ታ ጭማተ አፉ ሙዝሸ ታ ሀይቁዋ ማታየታ” ያግስ።