Medhetethi 4 - ጌሻ ማፃፋ

ቃየላነ አበላ

¹ አዳመይ ባ ማቸ ሄዋንራ አቅስ። እያ ቃንታዳ አደ ናአ የላሱ። “ጎዳይ ታና ማድን አደ ናአ ደማስ” ጋዳ ቃየላ ጋዳ ሱንሱ።

² እያ እሻ አበላ የላሱ። አበል ዶርሰ ሄሜስ ቃስ ቃየል ቢታ ኦስ።

³ ኡንደና ዎደፐ ጉየ፥ ቃየል ባ ጋደን ካፅዳ ካፈ ጎዳስ ያርሾ ያርሽስ።

⁴ ሽን አበል ባ ዶርሳ ዉድያ ግዶን ባይራ የለትዳይሳ ሹክድ እያ አሹዋፐ ሞ ባጋ ያርሽስ። ጎዳይ አበላነ እያ ያርሹዋ ኤክስ።

⁵ ሽን ቃየላነ እያ ያርሹዋ ኤክቤና። ሄሳ ግሾ፥ ቃየል ዳሮ ይሎትስ፤ እያ ሶምኦይ ምስ።

⁶ ጎዳይ ቃየላኮ፥ “አይስ ይሎታይ? ነ ሶምኦይ አይስ ምዴ?

⁷ ኔኒ ሎኦ ኦዳባ ግድያኮ፥ ነ ሶምኦይ ፓሽካ ግደኔ? ሽን ኔኒ ሎኦ ኦና እፅኮ፥ ናጋር ዶአዳ ነ ፐንገን ናጌስ። እ ነና ሃራናዉ ኮዬስ፥ ሽን ኔኒ እያ ፆናናዉ በሴስ” ያግስ።

⁸ ሄሳፈ ጉየ፥ ቃየል ባ እሻ አበላኮ፥ “አነ ደምባ በሲ ቦስ” ያግስ። ኤንቲ ደምባን ደእሽን፥ ቃየል ባ እሻ አበላ ቦላ ደንድድ እያ ዎስ።

⁹ ጎዳይ ቃየላ፥ “ነ እሻይ አበል አዉኔ?” ያግድ ኦይችስ። ቃየል ዛሪድ፥ “ታኒ ኤርከ፤ ታ እሻ ናገይ ታነዬ?” ያግስ።

¹⁰ ጎዳይ ቃየላ፥ “ሀይሳ አይስ ኦዲ? ሄኮ፥ ነ እሻ ሱይ ቢታፈ ታኮ ፅሎ ፕርዳስ ዋሴስ።

¹¹ ኔኒ ባደትዳባ ግድያ ግሾ ቢታ ዛራዳ ኦናዉ ዳንዳአካ። ነ እሻ ዎዳሳ እያ ሱካ ቢታን ጉሳዳሳ።

¹² ኔኒ ኦንካ ቢታይ ነዉ አይፈና፤ በተ አሳዳ ኔኒ ሳአ ቦላ ቶይላታዳ ዳቡራና” ያግስ።

¹³ ቃየል ጎዳኮ፥ “ነ ታ ቦላ ፕርድዳ ፕርዳይ ታ ዎልቃፈ ቦላ።

¹⁴ ኔኒ ታና ሀች ቢታፈ የደሳ፤ ነ ስንፈካ ሃሳሳ። በተ አሳዳ ታኒ ሳአ ቦላ ዳቡራና፤ ታና ደምያ ኦንካ ዎና” ያግስ።

¹⁵ ጎዳይ እያ፥ “ነና ኦንካ ዎና፤ ዎኮ፥ ታኒ ላፑን ቶሆ ሀሎ ከያና” ያግስ። ሄሳ ግሾ፥ እያ ደምያ ኦንካ ዎና መላ ጎዳይ እያ ቦላ ናግሶ ማላ ዎስ።

¹⁶ ቃየል ጎዳ ስንፈ ከይድ፥ ኤደነ ባጋፈ ዶሎሀ ባጋን ደእያ ኖዳ፥ ቢታን ደእስ።

ቃየላነ እያ የለታ

¹⁷ ቃየል ባ ማቸራ አቅስ፤ እያ ቃንታዳ ሄኖከ የላሱ። ሄ ዎደ ቃየል ካታማ ኬፅድ፥ ሄ ካታማ ባ ናኣ ሱንን “ሄኖከ” ግድ ሱንስ።

¹⁸ ሄኖከይ ጋይዳ የልስ። ጋይድ ማኤላ የልስ። ማኤል ማቱሳኤላ የልስ። ማቱሳኤል ላመሀ የልስ።

¹⁹ ላመህ አዶነ ሲሎ ጌተትያ ናምኡ ማቾ ኤክስ።

²⁰ አዳ ያባላ የላሱ። ያባል መሄ ሃርያነ ዱንካነን ደእያ አሳታ አዋ።

²¹ እያ እሻ ሱንይ ዩባላ። ዩባል ቃስ ዲ ዲፀይሳታነ ሱሱልኤ ፑንያ አሳታ ኡባ አዋ።

²² ሲላ ቃስ ቱባልቃይና ጌተትያ ናኣ የላሱ። ቱባልቃይን ናሰ ብራታፐነ ብራታፐ ዱማ ዱማ ሚሸታ ቆፀይሳታ አዋ። ቱባልቃይና ምችያ ናእሞ።

²³ እስ ጋላስ ላመህ ባ ማቸታ፥ “አደ፥ ሲለ፥ ስእተ፤ ታ ማቸቶ፥ ታኒ ኦድያባ ሀይዝተ። እስ ፓን አደይ ታና ደችድ ማዱንፅስዳ ግሾ፥ ታኒ እያ ዎስ።

²⁴ ቃየላ ሃሉዋ ከያናው ላፑን ኩሸ ኮሽኮ፥ ላመሀ ሃሉዋ ከያናው ላፑን ታማነ ላፑን ኩሸ ኮሼስ” ያግስ።

ሴታነ ሄኖሳ

²⁵ አዳመ ማችያ ሀራ አደ ናኣ የላሱ። ያታዳ፥ “ቃየል ዎዳ አበላ ግሾ ፆሳይ ታዉ ሀራ ናአ እሚስ” ጋዳ እያ ሴታ ጋዳ ሱንሱ።

²⁶ ሴት አደ ናአ የልድ እያ “ሄኖሳ” ግድ ሱንስ። አሳይ ጎዳ ሱን ፄግድ ጎይኖ ዶምዳይ ሄ ዎደ።