Medhetethi 38 - ጌሻ ማፃፋ

ይሁዳነ ትማሮ

¹ ሄ ዎደ ይሁድ ባ እሻታፐ ሻከትድ፥ አዱላማ ካታማን ደእያ ህራ ጌተትያ ኡራራ ዳናዉ ብስ።

² ያን ይሁድ ሹአ ጌተትያ ካናነ ኡራ ናእዉ ማችስ።

³ እያ ይሁዳስ ቃንታዳ አደ ናአ የላሱ። እ ሄ ናአ ኤራ ግድ ሱንስ።

⁴ ቃስካ ቃንታዳ አደ ናአ የላሱ። እያ ሄ ናአ ኦናና ጋዳ ሱንሱ።

⁵ ዛራዳካ ሀራ አደ ናአ የላሱ። እያ ሄ ናኣ ሴላ ጋዳ ሱንሱ። ሄ ናአይ የለትያ ዎደ ይሁድ አክዚባ ቢታና።

⁶ ይሁድ ባ ባይራ ናአ ኤራስ ትማሮ ጌተትያ ማቾ እሚስ።

⁷ ይሁዳ ባይራ ናአይ፥ ኤር፥ ጎዳ ስንን ኢታ አስ ግድያ ግሾ፥ ጎዳይ እያ ዎስ።

⁸ ይሁድ ኦናናኮ፥ “ዎጋይ ነና ኪተይሳ መላ ነ እሻ ማቸራ አቃ። ነ እሻስ ናአ የላዳ እያ ሱን ፄግሳ” ያግስ።

⁹ ሽን ኦናን የለታና ናይት እያባ ግዶናይሳ ኤርዳ ግሾ፥ ባ እሻ ማቸራ አቅያ ዎደ ባ እሻስ ናእ የለቶና መላ ባ አቱን ሳአን ጉሴስ።

¹⁰ እ ኦዳባይ ጎዳ ስንን ኢታባ ግድዳ ግሾ፥ ጎዳይ እያካ ዎስ።

¹¹ ሄሳፈ ጉየ፥ ይሁድ ባ ናኣ ማችዉ ትማሮ፥ “ታ ናአይ ሴል ድጫና ጋካናስ ነ አዋ ሶ ባዳ፥ አምኤተን ደኣሻ” ያግስ። ሄሳ እ ግዳይ፥ እካ ባ እሻታዳ ሀይቃነኮነ ግድ ህርግዳ ግሾሳ። ሄሳ ግሾ፥ ትማራ ባዳ ባ አዋ ሶን ደአሱ።

¹² ዳሮ ዎደፐ ጉየ፥ ይሁዳ ማችያ፥ ሹአ ናእያ ሀይቃሱ። ይሁድ ባ ካዮ ዎድያ ኦንግድ፥ ባ ዶርሳታ እክስያ ሜድያ አሳታኮ ትምና ጌተትያ በሲ ባ ላግያ አዱላማ አድያ ህረራ ብስ።

¹³ አሳይ ትማሮ፥ “ሄኮ፥ ነ አዝና አዋይ ይሁድ፥ ባ ዶርሳታ እክስያ ሜዳናዉ ትምና ቤስ” ያግድ ኦድዶሶና።

¹⁴ እያ ባ አምኤተ ማኡዋ ላማዳ፥ ባና ባለናዉ ሻሸ ኤካዳ ጉሉንታሱ። ያታዳ፥ ትምና ኤፍያ ኦግያ ዶናን ደእያ ኤናይመ ካታማ ጋፃን ኡታሱ። ሄሳ እያ ኦዳይስ፥ ሴል ድጭድ ጋክንካ እያዉ ማቾ ግዳዳ እመቶናይሳ እያ ኤርዳ ግሾሳ።

¹⁵ እያ ባ ሶምኡዋ ጉሉንትዳ ግሾ፥ ይሁድ እዮ በእዳ ዎደ፥ ላይማ ማጫስ ግድ ቆፕስ።

¹⁶ ባ ናኣ ማችዉ ግደይሳ ኤሮና ደእሸ፥ ኦግያ ጋፃ ኢኮ ሺቅድ “ታራ አቃኔ?” ያግድ ኦይችስ። እያ፥ “ታኒ ኔራ አቅኮ፥ ነ ታዉ አይ እማኔ?” ጋዳ ኦይቻሱ።

¹⁷ እ፥ “ታኒ ታ መህያፐ እስ ኮለ ነዉ የዳና” ያግስ። እያ፥ “ኔኒ ሄሳ ታዉ የዳና ጋካናስ አይ ኦይኔ?” ያጋሱ።

¹⁸ እ፥ “አይ ኦይ?” ያግስ። እያ፥ “ነ ማታምያ እያ ጎሹዋራነ ነ ኩሽያን ደእያ ፃምአ ኦይ” ያጋሱ። እ ሄሳታ እምድ፥ ኢራ አቅስ፤ እያካ ቃንታሱ።

¹⁹ እያ ሄሳፈ ደንዳዳ ብዳፐ ጉየ፥ ባ ጉሉን ቃራዳ፥ ባ አምኤተ ማኡዋ ማአሱ።

²⁰ ይሁድ ባ ኦይዳባ ሄ ማጫሴፐ ዛር ኤካናዉ ዴሻ ባ ላግያ ህራ ቦላ እዉ የድስ። ሽን እ እዮ ደምቤና።

²¹ እ ሄ ቢታ አሳኮ፥ “ኤናይመ ካታማን፥ ኦገ ዶናን ኡትዳ ላይማ ማጫስያ አዉኔ?” ያግድ ኦይችስ። አሳይ፥ “ላይማ ማጫስ ሀይሳን ኡባካ ባዋ” ያግዶሶና።

²² እ ይሁዳኮ ስሚድ፥ “ ‘ታኒ እዮ ደማብከ፤ ሄሳ ቦላካ ሄ ቢታ አሳይ፥ ላይማ ማጫስ ሀይሳን ኡባካ ባዋ’ ያግዶሶና” ያግስ።

²³ ይሁድ፥ “ባ ኦይክዳይሳ ባዉ ኤኮ፥ አቶ ጊኮ፥ አስ ኑና ሚጫና። ህዛ ታኒ እዉ ዴሸ የዳስ ሽን ኔኒ እዮ ደማባካ” ያግስ።

²⁴ ሄ አጌና ግድሽን አሳይ፥ “ነ ናኣ ማጫስያ ትማራ ላይማታዳ ቃንታሱ” ያግድ ይሁዳስ ኦድዶሶና። ይሁድ፥ “እዮ ካረ ከስድ ታማን ፁግተ” ያግስ።

²⁵ እዮ ካረ ከስያ ዎደ፥ “ታኒ ቃንትዳይ ሀ ሚሸታ ጎዳሳ። ሀ ማታመይነ ፃምአይ ኦደባየኮ ኤራናዉ ዳንዳእኮ ኤራ” ጋዳ ባ አዝና አዋካ ኪታሱ።

²⁶ ይሁድ ሄ ሚሸታ ኤርድ፥ “ታኒ ታ ናኣ ሴላስ እዮ እማቦና ግሾ፥ ታፐ እያ ፅሎ” ያግስ። ሄሳፈ ጉየ፥ እ ኢራ ዛሪድ አቅቤና።

²⁷ እዉ የሎ ቃም ጋክያ ዎደ፥ እ ኡሎን መንተ ናይት ደኤይስ ኤረትስ።

²⁸ እያ ማረትሽን፥ ኤንታፈ እሶይ ባ ኩሽያ ከስን የልስያራ፥ “ሀይስ ኮይሮ ከይስ” ጋናዉ ዞኦ ቃጭና ኤካዳ እያ ኩሸን ቃቻሱ።

²⁹ ሽን እ ባ ኩሽያ ጉየ ኤክዳ ዎደ፥ እያ እሻይ ከይን እያ፥ “ኔኒ ዋናዳ ፖርፁ ጋዳ ከያዲ?” ያጋሱ። ሄሳ ግሾ፥ ፓረሳ (ፖርፁ ግስ) ጋዳ ሱንሱ።

³⁰ ሄሳፈ ጉየ፥ እያ ኩሸን ዞኦ ቃጭን ደእያ እያ እሻይ የለትስ። እያ ሱንይ ዛራ (ዞኦ) ጌተትስ።