Medhetethi 37 - ጌሻ ማፃፋ

ዮሰፋነ እያ እሻታ

¹ ያይቆብ እያ አዋይ ይሳቅ ደእዳ ካናነ ቢታን ደእስ።

² ያይቆባ የለተ ታርከይ ሀይሳፈ ካልድ ፃፈትዳይሳ። ዮሰፍ ታማነ ላፑን ላይ ናአ ግድዳ ዎደ ባ አዋ ማቸታፐ፥ ባልፐነ ዝልፓፈ የለትዳ ባ እሻታራ መሄ ሄሜስ። እ ባ አዋስ ባ እሻት ኦዳ ኢታባታ ኦዴስ።

³ እስራኤለይ ዮሰፋ ጭምድ የልዳ ግሾ፥ ባ ሀራ አደ ናይታ ኡባፈ አድ ዶሴስ። ሄሳ ግሾ፥ እያዉ አሌቀትዳ ማኦ ጊግስስ።

⁴ እያ እሻት ኤንታ አዋይ እያ ኤንታፈ አድ ዶሰይሳ በእዳ ዎደ እያ እፅዶሶና። ማልኦ ቃላካ እያኮ ኦደታናዉ ዳንዳእቦኮና።

⁵ እስ ዎደ ዮሰፍ አሙሆ አሙህድ፥ ባ እሻታስ ኦድን ኤንቲ እያ ካሰይሳፈ አድ እፅዶሶና።

⁶ እ ኤንታኮ፥ “ታኒ አሙህዳ አሙሁዋ ስእተ።

⁷ ኑኒ ጋደን ግስተ ምርቅሽን ታ ምርቀይ ደንድድ ሉለ ኤቅስ። ህንተ ምርቀት ዩይ አድ ታ ምርቅያስ ዝግዶሶና” ያግስ።

⁸ እያ እሻት፥ “ኔኒ ኑ ቦላ ካዎታዳ ኑና ሃራናዉ ቆፓይ?” ያግድ ኦይችዶሶና። ኤንቲ እያ አሙሁዋ ግሾነ እያ ኦዳ ግሾ፥ ካሰይሳፈ አድ እፅዶሶና።

⁹ ቃስካ ዮሰፍ ሀራ አሙሆ አሙህድ ባ እሻታስ ኦድስ። “ሄኮ፥ ታኒ ሀራ አሙሆካ አሙሀስ። ሄ አሙሁዋን አው፥ አጌንነ ታማነ እስ ፆልንቶት ታዉ ዝጎሶና” ያግስ።

¹⁰ ባ እሻታስ ኦድዳ አሙሁዋ ባ አዋስ ኦድዳ ዎደ እያ አዋይ፥ “ሀይስ ዋንዳ አሙሆ? ቱማ ታኒ፥ ነ አያነ ነ እሻት ይድ፥ ነ ስንን ዝጋነዬ?” ያግድ ሀንቀትስ።

¹¹ እያ እሻት እያ ቃናትዶሶና፥ ሽን እያ አዋይ ሄ ኦዳ ባ ዎዛናን ዎስ።

ዮሰፋ ባይዘተ

¹² እስ ጋላስ እያ እሻት ሴከማን ባንታ አዋ መሄታ ሄማናዉ ብዶሶና።

¹³ እስራኤለይ ዮሰፋ፥ “ነ እሻት ሴከማን መሄታ ሄመይሳ ኤራሳ። ሃያ፥ ታኒ ነና ኤንታኮ ኪታና” ያግስ። ዮሰፍካ፥ “ኤሮ” ያግስ።

¹⁴ እ እያኮ፥ “ባዳ ነ እሻትነ መሄይ ሳሮ ግደይሳ በአዳ ኤንታባ ታዉ ያዳ ኦዳ” ያግድ ዮሰፋ ከብሮና ዛንጋራፐ ኪትስ። ዮሰፍ ኪተትድ ሴከማ ብስ።

¹⁵ ያን ደምባ በሳን ኤንታ ኮሻን ያ ሃ ስመረትሽን፥ እስ አስ እያ ደምድ፥ “ላ ናአዉ፥ አይ ኮያይ?” ያግድ ኦይችስ።

¹⁶ እ፥ “ታ እሻታ ኮያይስ፤ ኤንቲ መህያ ሄምያ በሳ በእዳኮ፥ ሀያና ታዉ ኦዳርኪ” ያግስ።

¹⁷ ኡራይ፥ “ሀይሳፈ ብዶሶና፤ ኤንቲ፥ ‘ኑኒ ዶታነ ባና’ ግሽን ስአስ” ያግስ። ሄሳ ግሾ፥ ዮሰፍ ባ እሻታ ጌዶ ካል ብድ፥ ኤንታ ዶታነን ደምስ።

¹⁸ ሽን እ ሃሆን ደእሽን፥ ኤንቲ እያ በእዶሶና። እ ኤንታኮ ጋኮና ደእሽን፥ ኤንቲ እያ ዎናዉ ማቀትዶሶና።

¹⁹ ኤንቲ እሶይ እሱዋኮ፥ “ህን በእተ፥ አሙሁዋ ጎዳይ ዬስ።

²⁰ ሃይተ፥ እያ ዎድ፥ ሀ ኦላታፐ እሱዋን የጎስ። ሄሳፈ ጉየ፥ ‘ዶእ እያ ምስ’ ያጋና። ያትድ፥ እያ አሙሁዋ ዉርሰ በአና” ያግዶሶና።

²¹ ሮቤል ሄሳ ስእዳ ዎደ፥ ኤንታ ኩሸፐ እያ አሻናዉ ኮይድ፥ “እያ ዎኮ፤

²² እያ ዎናፐ መላ ቢታን ደእያ ሀ ኦላን የግተ፤ እያ ቦላ ኩሸ ዎፍተ” ያግስ። ሮቤል ሄሳ ግዳይ፥ እያ ኤንታ ኩሸፐ አሽድ ጉየ አዋኮ ዛራናሳ።

²³ ዮሰፍ ባ እሻታኮ ጋክዳ ዎደ እ ማእዳ አሌቀትዳ ማኡዋ እያፐ ቃር ኤክዶሶና።

²⁴ እያ ኤፍድ ሃ ባይና መላ ኦላን የግዶሶና።

²⁵ ኤንቲ ካ ምሽን ሀሳዮና እስማኤላ አሳት ጋላዳፐ ግብፀ ብሽን፥ ቁ ግድ በእዶሶና። ኤንቲ ባንታ ግማለታ ቦላ ሳዉዋ፥ ማድያነ ካርብያ ጫንዶሶና።

²⁶ ይሁድ ባ እሻታ፥ “ኑኒ ኑ እሻ ዎድ፥ እያ ሱ ቆትኮ ኑና አይ ማዳኔ?

²⁷ ሃይተ፥ እያ እስማኤላ አሳስ ባይዞስ። እ ኑ እሻ፥ ኑ ሱነ ኑ አሾ ግድያ ግሾ እያ ቦላ ኑ ኩሽያ ዎኮ” ያግስ። እያ እሻት እያ ኦዳ ማእዶሶና።

²⁸ ሄሳ ግሾ፥ ምድያመ ቢታ ዛልአንቾት ያራ አሽን፥ እያ እሻት ዮሰፋ ኦላፈ ከስድ፥ እስማኤላ አሳታስ ላታሙ ብራ ሳንትመን ባይዝዶሶና። ኤንቲ ዮሰፋ ግብፀ ቢታ ኤፍዶሶና።

²⁹ ሮቤል ኦላኮ ስሚድ፥ ዮሰፍ ያን ባይናይሳ በእዳ ዎደ፥ አዛንድ ባ ማኡዋ ዳክስ።

³⁰ እ ጉየ ባ እሻታኮ ብድ፥ “ናአይ ያን ባዋ፤ ህዛ፥ ታኒ አይ ሀኖሻ?” ያግስ።

³¹ ኤንቲ ዮሰፋ ማኡዋ ኤክድ፥ እስ ዴሸ ሹክድ፥ ሄ ሱን ናቅዶሶና።

³² አሌቀትዳ እያ ማኡዋ ባንታ አዋኮ ኤፍድ “ኑኒ ሀይሳ ደምዳ፤ ሀይስ ነ ናአ ማኡዋኮነ አነ በአ” ያግዶሶና።

³³ ያይቆብ ማኡዋ ኤርድ፥ “ሀይስ ታ ናኣ ማኡዋ፤ ታ ናኣ ዶእ ምስ። ዮሰፍ ቱማካ ዛዘትስ” ያግስ።

³⁴ ያይቆብ አዛንድ፥ ባ ማኡዋ ፔስ። ካዮ ማኦ ማእድ፥ ባ ናኣስ ዳሮ ጋላስ ዬክስ።

³⁵ እያ አደ ናይትነ ማጫ ናይት ኡባይ እያ ምንናዉ ይዶሶና። ሽን እ ምነቶና እፅድ፥ “አካይ፥ ታኒ ዬሆይ ዬሆሽን ዱፎ ገላና” ያግድ፥ ዮሰፋስ ዬክስ።

³⁶ ሄ ዎደ ምድያመ ቢታ አሳት ዮሰፋ፥ ግብፀ ካዋ ሞርናታነ ካዋ ናገይሳታ ሀላቃ ግድዳ ጶፅፋራስ ባይዝዶሶና።