Medhetethi 35 - ጌሻ ማፃፋ

ያይቆብ ቤተለ ስሙዋ

¹ ሄሳፈ ጉየ፥ ፆሳይ ያይቆባ፥ “ደንዳዳ ፑደ ቤተለ ከያዳ ያን ደአ። ኔኒ ነ እሻ ኤሳዌፐ ባቃትዳ ዎደ ነዉ ቆንጭዳ ፆሳስ ያን ያርሾ በሲ ጊግሳ” ያግስ።

² ሄሳ ግሾ፥ ያይቆብ ባ ሶ አሳነ እያራ ደኤይሳታ ኡባ፥ “ህንተ ግዶን ደእያ አላጋ ፆሳታ ድግተ። ህንተና ጌሽተ፥ ህንተ ማኡዋ ላምተ።

³ ሀይሳፈ ደንድድ ፑደ ቤተለ ቦስ። ታ መቱዋ ጋላስ ታዉ ስእዳ፥ ታኒ ብዳ በሳ ኡባን ታራ ግድዳ ፆሳስ ታኒ ያን ያርሾ በሲ ጊግሳና” ያግስ።

⁴ ኤንቲ ባንታዉ ደእያ አላጋ ፆሳታ ኡባነ ባንታ ሀይን አዳ ዎርቃታ ኡባ ከስድ ያይቆባስ እምዶሶና። ያይቆብ ሄሳታ ሴከማን ደእያ ዎላ ጋርሳን ሞግስ።

⁵ ሄሳፈ ጉየ፥ ያይቆብነ እያ አደ ናይት ደንድድ ብያደ ኤንታ ዩሹዋን ደእያ አሳ ቦላ ፆሳ ያሻይ ዎዳ ግሾ ኤንታና ካልድ ኦይካናዉ ኦንካ ዳንዳእቤና።

⁶ ያይቆብነ እያራ ደእያ አሳ ኡባይ ካናነ ቢታን ደእያ ቤተለ ጌተትያ ሎዛ ጋክዶሶና።

⁷ ያን እ ያርሾ በሲ ጊግስስ። እ ሄ በሳ ኤል-ቤተለ (ቤተለ ፆሳ) ግድ ሱንስ። እ ባ እሻፐ ባቃትድ ብያ ዎደ ፆሳይ እያዉ ቆንጭዳይ ሄ በሳና።

⁸ እርብቃ ድችያ ድቦራ ያን ሀይቃሱ። ቤተለፐ ጋርሳራ ደእያ ዎላ ጋርሳን እያ ሞገታሱ። ሄሳ ግሾ፥ ሄ ም ሱንይ አሎን-ባኩተ (ዬሆ ዎላ) ጌተትስ።

⁹ ያይቆብ ማሰጰፆመፐ ስምዳፐ ጉየ፥ ፆሳይ እያዉ ዛር ቆንጭድ እያ አንጅስ።

¹⁰ ፆሳይ፥ “ነ ሱንይ ያይቆባ። ሽን ህዛፐ ኔኒ ያይቆባ ጌተታካ፥ ነ ሱንይ እስራኤለ ጌተታና” ያግድ እያ “እስራኤለ” ግድ ሱንስ።

¹¹ ቃስ ፆሳይ ያይቆባ፥ “ታኒ ኡባ ዳንዳእያ ፆሳ። ኔኒ የለታ፥ ዳራ። ደረይነ ካዎተት ኔፐ ከዮ። ካዎትካ ነ ጉልባታፐ ከዮ።

¹² ታኒ አብራሃመስነ ይሳቃስ እምዳ ቢታ፥ ነዉ እማና። ኔፐ ጉየ ታኒ ሀ ቢታ ነ ሼሻስ እማና” ያግስ።

¹³ ፆሳይ እያራ ኦደትዳ በሳፈ ፑደ ከይስ።

¹⁴ ያይቆብ ፆሳይ እያራ ኦደትዳ በሳን ቆፍስያ ሹቻ ማላ ኤስድ እያ ቦላ ዎይንያነ ዛይተ ትግስ።

¹⁵ ያይቆብ ፆሳይ እያራ ኦደትዳ በሳ “ቤተለ” ግድ ሱንስ።

ራሄል ሀይቁዋ

¹⁶ ኤንቲ ሄሳፈ ጉየ፥ ቤተለፐ ደንድድ ብዶሶና። ኤንቲ ኤፍራታ ጋካናዉ ጉ አትሽን፥ ራሄሎ እቀ ኦይክን ዳሮ ዋየታሱ።

¹⁷ እቀይ እዮ ዋይስዳ ዎደ እዮ የልስያራ፥ “ባቦፋ፤ ሀይስካ አደ ናአ” ያጋሱ።

¹⁸ ሽን እያ ሀይቆስ ማታዳ ሸምፖይ ከያና ሀንሽን፥ ባ ናአ በኖና (መቶ ናአ) ጋዳ ሱንሱ። ሽን እያ አዋይ ብንያመ (ታ ኡሻቻ) ግድ ሱንስ።

¹⁹ ሄሳፈ ጉየ፥ ራሄላ ሀይቃ አጋሱ። ቤተለመ ጌተትያ ኤፍራታ ኤፍያ ኦግያ ጋፃን ሞገታሱ።

²⁰ ያይቆብ እ ዱፉዋ ቦላ ሀዉልተ ሹቹ ኤስስ። ሄ ሀዉልተይ ሀች ጋካናዉካ ራሄል ዱፉዋ ኤርሴስ።

²¹ እስራኤለይ ሄሳፈ ደንድድ ኤደራ ግምብያፈ ሄፍንን ባ ዱንካንያ ቶክስ።

²² እስራኤለይ ሄ ቢታን ደእሽን፥ ሮቤል ባ አዋስ የልዳ አይለ ባልራ አቅስ። እስራኤለይ ሄ ኦዳ ስእስ። ያይቆባ አደ ናይት ታማነ ናምአ።

²³ ልያ ናይት ያይቆባ ባይራ ናአ ሮቤላ፥ ስሞና፥ ሌወ፥ ይሁዳ፥ ይሳኮራነ ዛብሎና።

²⁴ ራሄል አደ ናይት ዮሰፋነ ብንያመ።

²⁵ ራሄል አይለ ባል አደ ናይት ዳነነ ንፍታለመ።

²⁶ ልያ አይለ ዛላፋ አደ ናይት ጋደነ አሴራ። ሀ ናይት ያይቆባስ ማሰጰፆመን የለትዳ አደ ናይታ።

²⁷ ያይቆብ ከብሮና ጌተትያ ቅርያት-አርባ ማታን ማምረን ደእያ ባ አዋ ይሳቃ ሶ ብስ። ሄ በሳይ ካሰ አብራሃመይነ ይሳቅ ደእዳ በሳ።

²⁸ ይሳቅ ፄታነ ሆስፑን ታሙ ላይ ደእስ።

²⁹ እ ዳሮ ዎድያ ደእድ ሎኦ ጭምድ፥ ሀይቅድ ባ ማይዛታን ጋሄትስ። እያ ናይት ኤሳዌይነ ያይቆብ እያ ሞግዶሶና።