Medhetethi 34 - ጌሻ ማፃፋ

ሴከማነ ዲና

¹ ልያ ያይቆባስ የልዳ ናእያ ዲና፥ ሄ ዎደ ካናነ ማጫሳታ በአናዉ ከያሱ።

² ሄ ቢታ ሃርያ ህወ አድያ ሀሞራ ናአ ሴከም እዮ በእድ፥ ዳፍድ ኢስስ።

³ እያ ዎዛናይ ያይቆባ ናእዉ ዲናስ ቃትስ። እ እዉ ምሸትዳ ግሾ ሎኦ ቃላራ እዮ ኦድስስ።

⁴ ሴከም ባ አዋ ሀሞራ፥ “ታዉ ሀ ናእዉ ማቾ ኦይቻርክ” ያግስ።

⁵ ያይቆብ ባ ናእዉ፥ ዲና፥ አዝን ዳፍዳይሳ ስእዳ ዎደ እያ አደ ናይት መሄራ ባዞን ደኦሶና። ሄሳ ግሾ፥ ኤንቲ ያና ጋካናስ ስእ ግስ።

⁶ ሄሳፈ ጉየ፥ ሴከማ አዋ ሀሞር ያይቆባ ኦድሳናዉ ይስ።

⁷ ያይቆባ አደ ናይት ባዞፈ ይድ ሄሳ ስእዶሶና። ኤንቲ ሴከም ያይቆባ ናእዉ ዳፍድ፥ ኢስድ እስራኤለ ዬላይዳ ግሾ ዳሮ ይሎትዶሶና።

⁸ ሽን ሀሞር ኤንታኮ፥ “ታ ናአይ ሴከም ህንተ ናኤስ ዳሮ ምሸቴስ፥ ሀያና እዮ እያዉ ማቾ እመርከት።

⁹ ኑራ ኤከትተነ ገለትተ፥ ህንተ ማጫ ናይታ ኑስ እምተ፥ ኑ ማጫ ናይታካ ህንተዉ ኤክተ።

¹⁰ ህንተ ኑ ግዶን ዳናዉ ዳንዳኤታ። ቢታይ ዳሮ ዳልጋ፥ እያ ኦድ ዛልእድ ህንተዉ አቆ ደማናዉ ዳንዳኤታ” ያግስ።

¹¹ ሄ ዎደ ሴከም ዲና አዋነ እ እሻታ፥ “ታኒ ህንተ ስንን ሳበትኮ፥ ህንተ ኮይያባ አይብባ ግድኮካ እማና።

¹² ህንተ ምሽራ ናኤስ እሞታነ ኮይታ ህንተ ኮይዳ መላ ታና ኦይችተ። ታኒ ህንተ ታና ኦይችዳባ ኡባ እማና። ሽን ታኒ ማቻናዉ ናእዉ ታዉ እመርከት” ያግስ።

¹³ ባንታ ምችዉ ዲና ሴከም ቱንስዳ ግሾ፥ ያይቆባ አደ ናይት ሴከማስነ እያ አዋ ሀሞራስ ዎርዶትዶሶና።

¹⁴ ኤንታኮ፥ “ኑኒ ሄሳ መላ ፓላባ ኦናዉ ዳንዳኦኮ፥ ኑኒ ኑ ምችዉ ቃፃረትቦና አሳስ እሞኮ፥ ሄስ ኑና ካዉሽያባ።

¹⁵ ህንተ ኑስ እስባ ኤሮ ጊኮ ኑ ህንተዉ ኤሮ ጋና። ሄስካ፥ ህንተ ቢታ አደ አሳ ኡባይ ቃፃረትድ ኑዳ ሀንኮ፥

¹⁶ ኑኒ ኑ ማጫ ናይታ ህንተዉ እማናዉ ኤሮ ጋና። ህንተ ማጫ ናይታካ ኑስ ኤካና። ኑኒ ህንተ ግዶን ደእድ ህንተራ እስ አሰ ግዳና።

¹⁷ ሽን ህንተ ቃፃረታናዉ ኤሮ ጎና እፅኮ፥ ኑኒ ኑ ምችዉ ኤክ ባና” ያግዶሶና።

¹⁸ ያትን ሀ ኤንቲ ግዳባይ ሀሞራስነ እያ ናአ ሴከማስ ሎኦ ዳንስ።

¹⁹ ሄ ፓንይ ባ አዋ ኬን ደእያ ኡባፈ አድ ቦንቸትዳ ግሾ ኮይዳባ ኦናዉ እያዉ ማት ደኤስ። ያይቆባ ናእዉ ዳሮ ዶስዳ ግሾ፥ ኤንቲ ግዳባ ኦናዉ ጉየ ግቤና።

²⁰ ሄ ዎደ ሀሞርነ እያ ናአይ ሴከም ባንታ ካታማ ዳባባ ብድ፥ ባንታ ካታማ አሳስ ሀይሳዳ ያግድ ኦድዶሶና።

²¹ “ሀ አሳት ኑራ ስጋ ደኦሶና። ቢታይ ዳሮ ዳልጋ ግድያ ግሾ ኤንቲ ሀ ቢታን ጎዮ ዛልኦ። ኤንታ ማጫ ናይታካ ኑኒ ኤካና፥ ኤንትካ ኑ ማጫ ናይታ ኤኮና።

²² ሽን ኑራ ኤንቲ እስ አሳዳ ደአናዉ ኑኒ እስባ ኤሮ ጋናዉ ኮሼስ። ሄስካ፥ ኤንቲ ቃፃረትዳይሳዳ ኑ አደ አሳ ኡባይ ቃፃረታናይሳ።

²³ ኑኒ ሄሳዳ ኦኮ፥ ኤንታ መሄይነ፥ ኤንታ አቆ ኡባይ ኑባ ግደኔ? ሄሳ ግሾ፥ አነ ኑኒ ኤንቲ ገይሳ ኤሮ ጎስ። ኤንትካ ኑ ግዶን ደአና” ያግዶሶና።

²⁴ ካታማ ዳባባ ሺቅዳ አሳት ኡባይ ሀሞራስነ እያ ናአ ሴከማስ፥ “ኤሮ” ግዶሶና። ያትን ሄ ካታማ አደ አሳት ኡባይ ቃፃረትዶሶና።

²⁵ ሄን ጋላስ፥ ኤንቲ ኡባይ ባንታ ቃፃራ ማዱን ሳከትሽን፥ ያይቆባ አደ ናይታፐ ናምአይ፥ ዲና እሻት፥ ስሞናራነ ሌወራ ባንታ ማሻ ኤክድ ኦንካ ኤሮና ካታማ ገልድ አደ አሳ ኡባ ዎዶሶና።

²⁶ ሀሞራነ እያ ናአ ሴከማ ማሻን ዎድ፥ ባንታ ምችዉ ዲና ሴከማ ኬፈ ኤክ ብዶሶና።

²⁷ ያይቆባ ሀራ አደ ናይት አሀታ ቦላ ገልድ ባንታ ምችዉ ዲና ቱንስዳ ካታማ ኡባ ቦንቅዶሶና።

²⁸ ኤንታ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያባነ ጋፃን ደእያባ ኡባ ኤክዶሶና።

²⁹ ኤንታ ኬን ደእያ አቁዋ ኡባ፥ ኤንታ ናይታ ኡባነ ማጫሳታ ኡባ ድእዶሶና።

³⁰ ያይቆብ ስሞናነ ሌወ፥ “ህንተ ታ ቦላ ግታ መቶ ኤህደታ። ሀ ቢታን ደእያ ካናነትነ ፓርዘት ታና እፃና። ኑኒ ታይቦን ጉ፥ ኤንቲ እስፈ ግድድ ታ ቦላ ደንድኮ፥ ታንነ ታ ሶ አሳይ ያና” ያግስ።

³¹ ሽን ኤንቲ፥ “ያትን፥ እ ኑ ምችዉ ላይማ ማጫሳዳ ኦናዉ በሲ?” ያግዶሶና።