Medhetethi 33 - ጌሻ ማፃፋ

ያይቆብ ኤሳዌራ ጋሄተ

¹ ያይቆብ ቁ ግድ ፄልያ ዎደ ኤሳዌይ ባ ኦይዱ ፄቱ አሳራ የይሳ በእስ። ሄሳ ግሾ፥ ናይታ ልያስ፥ ራሄልስነ ናምኡ አይለታስ ሻክ እሚስ።

² አይለታነ ኤንታ ናይታ ስንን፥ ልያነ እ ናይታ ኤንታ ጌዶን፥ ራሄሎነ ዮሰፋ ዉርሰን ዎስ።

³ ሽን እ ባዉ ስን አድ ባ እሻኮ ማትሸ ሳአ ጋክ ጋክ ላፑንቶሆ ዝግስ።

⁴ ሽን ኤሳዌይ እያራ ጋሄታናዉ ዎፅ ይድ እያ ቆያ ቆምድ ዬርስ። ናምአይካ ዬክዶሶና።

⁵ ኤሳዌይ ቁ ግድ ፄልድ ማጫሳታነ ናይታ በእድ፥ “ሀ ኔራ ደኤይሳት ኦናንቴ?” ያግድ ኦይችስ። ያይቆብ፥ “ታ ጎዳዉ፥ ሀይሳቲ ፆሳይ ነ አይልያስ ባ ኬሀተን እምዳ ናይታ” ያግስ።

⁶ አይለት ባንታ ናይታራ ሺቅድ እያዉ ዝግዶሶና።

⁷ ካልድ ልያራነ እ ናይታራ ይድ ዝግዶሶና። ዉርሰን ዮሰፋራነ ራሄልራ ይድ ዝግዶሶና።

⁸ ኤሳዌይ፥ “ሀ ስንን ብሸ ታራ ጋሄትዳ ዉደይ ኡባይ አይቤ?” ያግድ ኦይችስ። ያይቆብ፥ “ታ ጎዳዉ፥ ሄስ ታኒ ነ ስንን ሳባ ደማናዉ የድዳይሳታ” ያግስ።

⁹ ሽን ኤሳዌይ፥ “ታ እሻዉ፥ ታዉ ግድያ ሻሎይ ደኤስ፥ ነባይ ነዉ ግዶ” ያግስ።

¹⁰ ያይቆብ፥ “ሀያና፥ ሀእ ታኒ ነ ስንን ሳባ ደምዳባ ግድኮ፥ ሀ ታኒ እመይሳ ኤካ። ኔኒ ታና ሞካ ኤክዳ ግሾ፥ ታ ነ ሶምኡዋ በኤይስ ፆሳ ሶምኦ በኤይሳ መላ።

¹¹ ታኒ ነዉ ኤህዳ ሀ እሞታ ኤካ። ፆሳይ ታዉ ኬህ እምዳ ግሾ ኩምስ” ያግስ። ያይቆብ ዎስድ አጎና እፅዳ ግሾ፥ ኤሳዌይ እያ እሞታ ኤክስ።

¹² ኤሳዌይ፥ “አነ የ፥ ታኒ ኔራ እስፈ ባና” ያግስ።

¹³ ሽን ያይቆብ፥ “ታ ጎዳዉ፥ ናይት ሹጎ ግደይሳ ኤራሳ። ቃስ ታኒ ጋሎ ማራታ ንያ ዶርሳታነ ሚዛ ናጋናዉ ኮሼስ። አሳይ ኤንታ ሀር አቶሽን፥ እስ ጋላስ ምን ላግኮ፥ መሄ ኡባይ ሀይቃና።

¹⁴ ሄሳ ግሾ፥ ታ ጎዳዉ፥ ነ አይለታፐ ስንታዳ ባ። ታኒ ሳይረን ታ ጎዳ ጋካናስ፥ ታ ስንን ደእያ መህያነ ናይታ ሄመ መላ ሎዳን ካላዳ ታ ጎዳ ታኒ ኤዶመን ጋካና” ያግስ።

¹⁵ ኤሳዌይ፥ “ያንኮ፥ ታኒ ታ አሳፐ ጉራ ነዉ አሾ” ያግስ። ሽን ያይቆብ፥ “ኮሸና፤ ታኒ ታ ጎዳ ስንን ሳበትዳይስ ታዉ ግዳና” ያግስ።

¹⁶ ሄሳ ግሾ፥ ኤሳዌይ ሄ ጋላስ ኦገን ዎድ ሳይረ ስምስ።

¹⁷ ሽን ያይቆብ ሱኮታ ብስ። ያን ባዉ ኬ ኬፅስ፥ ባ መሄታስ ሻቃራ ሻቃርስ። ሄሳ ግሾ፥ ሄ በሳ ሱኮታ (ኩያ ዎይኮ ጋባ) ግድ ሱንስ።

¹⁸ ያይቆብ ማሰጰፆመፐ ስሚድ ካናነ ቢታን ደእያ ሴከማ ካታማ ሳሮን ጋክስ። እ ሄ ካታማስ ስን ባጋራ ዱንካነ ቶክድ ኡትስ።

¹⁹ ባ ዱንካንያ ቶክዲ ኡትዳ ጋድያ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ።

²⁰ ያን ያርሾ በሲ ጊግስድ፥ “ጎዳ፥ እስራኤለ ፆሳ” ግድ ሱንስ።