Medhetethi 31 - ጌሻ ማፃፋ

ያይቆብ ላባፐ ባቃቱዋ

¹ ላባ አደ ናይት፥ “ያይቆብ ኑ አዋባ ኡባ ኤክድግስ። ሀ ሻሎ ኡባ ኑ አዋባፐ ደምስ” ያግሽን ያይቆብ ስእስ።

² ያይቆብ ላባ ሶምኦይ እያዉ ካሰ መላ ግዶናይሳ በእስ።

³ ሄ ዎደ ጎዳይ ያይቆባ፥ “ኔኒ ነ አዋታ ቢታ፥ ነ ዳቦታኮ ጉየ ስማ። ታኒ ኔራ ግዳና” ያግስ።

⁴ ያይቆብ ራሄሎነ ልያ ባ ዉደይ ሄመትያ በሳ ያና መላ ኪትድ ፄግስስ።

⁵ እ ኤንታኮ፥ “ህንተ አዋ ሶምኦይ ታዉ ካሰ መላ ግዶናይሳ ታኒ በአይስ። ሽን ታ አዋ ፆሳይ ታራ ደኤስ።

⁶ ታኒ ታ ኩመ ዎልቃን ህንተ አዋስ ኦዳይሳ ህንተ ኤሬታ።

⁷ ሽን ህንተ አዋይ ታና ጭምድ፥ ታ ዳሞዝያ ታሙ ቶሆ ላምስ። ግድኮካ ፆሳይ ታና እ ቆሆናዳ ድግስ።

⁸ እ፥ ‘ፑንጫረት ነ ዳሞዘ ግዶ’ ግን ዉደ ኡባይ ፑንጫረ የልስ። ቃስ እ፥ ‘ካላደት ነ ዳሞዘ ግዶ’ ግን ዉደ ኡባይ ካላደ የልስ።

⁹ ፆሳይ ሄሳን ህንተ አዋ መህያ ዎ ኤክድ ታዉ እሚስ።

¹⁰ “መሄት ብራይሳስ ከይያ አጌናን ታኒ እስ አሙሆ አሙሀስ። ሄ አሙሁዋን ታኒ ፄልያ ዎደ መህያ ብራይስያ ዴሻ ኡርገት ካላደ፥ ፑንጫረነ ጋዛ።

¹¹ ፆሳ ኪታንቾይ አሙሆን ታና፥ ‘ያይቆባ’ ያግስ። ታኒ፥ ‘ዬ’ ጋዳ ኮያስ።

¹² እካ፥ ‘ቁ ጋዳ መህያ ብራይስያ ዴሻ ኡርገ ኡባ ካላደ፥ ፑንጫረነ ጋዛ በአ። ላቢ ነ ቦላ ኦያባ ኡባ ታኒ በእዳ ግሾ ሄሳ ኦስ።

¹³ ኔኒ ኤስዳ ሹቻ ዛይተ ትያዳ ታዉ ጫቅዳ ቤተለ ፆሳይ ታና። ሀእ ደንዳዳ ሀ ቢታፈ ከያ። ጉየ ነ የለትዳ ቢታ ስማ’ ግስ” ያግስ።

¹⁴ ሄሳፈ ጉየ፥ ራሄልራነ ልያራ “ኑ አዋባፐ ኑና ጋክያባይ አይቤ?

¹⁵ እ ኑና አላጋዳ ፄሌስ ግደኔ? እ ኑና ባይዝ ኤክስ። ባይዝ ኤክዳባ ኡባ ምድ ይስስ።

¹⁶ ፆሳይ ኑ አዋፐ ዎ ኤክዳ ሻሎ ኡባይ ቱማካ ኑባነ ኑ ናይታባ። ሄሳ ግሾ፥ ፆሳይ ነዉ ኦድዳባ ኡባ ኦ” ያግ ዛርዶሶና።

^17-18 ያይቆብ ካናነ ቢታን ደእያ ባ አዋ ይሳቃኮ ባናዉ ደንድስ። እ ባ ናይታነ ባ ማቸታ ግማለ ቶግስስ። ዉደ ኡባ ላግድ፥ ማሰጰፆመን ደእሸ ሺሽዳ ሻሎ ኡባ ኤክድ ብስ።

¹⁹ ላቢ ባ ዶርሳታ እክስያ ቃንፃናዉ ብዳሽን፥ ራሄላ ባ አዋ ሶ ኤቃ ምስለታ ካይሶታሱ።

²⁰ ቃስ ያይቆብ አራመ አድያ ላባስ ባ ቡሳ ኦዶና እፅድ ጭምስ።

²¹ እ ባዉ ደእያባ ኡባ ኤክድ ኤለስድ ኤፍራፂሳ ሻፋ ፕንድ፥ ደረይ ዳርያ ጋላዳ ቢታ ብስ።

ላቢ ያይቆባ ካልድ ቡሳ

²² ሄ ጋላሳፐ ጉየ፥ ያይቆቢ ባቃትድ ብዳይሳ ላቢ ስእስ።

²³ ባ ዳቦታ ባራ ኤክድ፥ ላፑን ጋላሳ ኦገ ያይቆባ ጌዶ ካልድ ደረይ ዳርያ ጋላዳ ቢታን እያ ጋክስ።

²⁴ ሄ ዎደ ፆሳይ ቃማ ሶረ ላባኮ አሙሆን ቆንጭድ፥ “ኔኒ ያይቆባ ቦላ ኢታባ ግድን ሎኦባ፥ አይብባካ ኦደትኮ ነና ኤራ” ያግስ።

²⁵ ላቢ ጋክያ ዎደ ያይቆብ ደረይ ዳርያ ጋላዳ ቢታን ዱንካነ ቶክድ ኡትስ። ላብካ ዳቦታራ ያን ዱንካንዶሶና።

²⁶ ሄሳፈ ጉየ፥ ላቢ ያይቆባ፥ “ኔኒ ሀይሳዳ ታና አይስ ጭማዲ? ታ ማጫ ናይታካ ኦላን ድኤትዳባዳ አይስ ላጋ ከሳዲ?

²⁷ ኔኒ አይስ ቆሳን ታፐ ከሳ ኤካዳ ታና ጭማዲ? ታኒ ነና ኡፋይሳንነ የን፥ ካራቦንነ ዲን ሞይዛና መላ አይስ ታዉ ኦዳብኪ?

²⁸ ኔኒ ሀር አቶሽን፥ ታ ናይታ ናይታነ ታ ማጫ ናይታ ታኒ ዬራ ኤኮና መላ ድጋዳሳ። ኔኒ ኢታ ኦዳሳ።

²⁹ ታኒ ነና ገናናዉ ታዉ ዎልቅ ደኤስ ሽን ነ አዋ ፆሳይ ዝነ ቃማ ታኮ፥ ‘ያይቆባ ቦላ ኢታባ ግድን ሎኦባ አይብባካ ኦደቶናዳ ነና ኤራ’ ያግድ ታዉ ኦድስ።

³⁰ ሀእ ኔኒ ነ አዋ ሶ ባናዉ ዳሮ ላሞትዳ ግሾ ከያዳሳ። ሽን ታ ሶ ኤቃ ምስለታ አይስ ካይሶታዲ?” ያግስ።

³¹ ያይቆብ ላባ፥ “ኔኒ ነ ናይታ ታፐ ዎልቃን ዎስሳ ኤካነኮነ ጋዳ ቆፕዳ ግሾ ያያዳ ሀይሳዳ ኦስ።

³² ሽን ነ ሶ ኤቃ ምስለታ ኤክዳ አስ ኦናካ ኔኒ ደምኮ፥ ሄ ኡራይ ሀይቆ። ኑ ዳቦታ ስንን ነባ ግድዳባ ኡባ ኮያዳ ኤካ” ያግስ። ያይቆብ ራሄላ ባ አዋ ሶ ኤቃ ምስለታ ካይሶትዳይሳ ኤርቤና።

³³ ሄሳ ግሾ፥ ላቢ ያይቆባ ዱንካንያ ግዶ፥ ልያ ዱንካንያ ግዶነ ናምኡ አይለታ ዱንካንያ ግዶ ገልድ ኮይስ። ሽን አይኮካ ደምቤና። ልያ ዱንካንያፐ ከይድ፥ ራሄል ዱንካንያ ገልስ።

³⁴ ራሄላ ሶ ኤቃ ምስለታ ኤካዳ ግማለ ኮራ ጋርሳን ቆሳዳ እያ ቦላ ኡታሱ። ላቢ ዱንካንያን ደእያባ ኡባ ፕልግድ ኮይስ። ሽን አይኮካ ደምቤና።

³⁵ ራሄላ ባ አዋ፥ “ታ ጎዳዉ፥ ታና ሀንቀቶፋ። ታኒ ነዉ ደንዳ ኤቃናዉ ዳንዳእከ፥ ታ ኩሸ መቶራ ደአይስ” ያጋሱ። እ ኮይድ ሶ ኤቃ ምስለታ ደምቤና።

³⁶ ያይቆብ ይሎትድ ላባኮ፥ “ታኒ አይ ኢሳድና? ሀይሳ ኔኒ ታና ካላናዉ ታ አይ ቆሆ ኦድና?

³⁷ ሀእ ኔኒ ታ ሚሸ ኡባ ፕልጋዳ ኮያዳሳ። ነ ሶ ኤቃ ምስለታፐ አይ ደማዲ? ኤንቲ ኑ ናምአ ግዶን ፕርዳና መላ ነ ዳቦታ ስንንነ ታ ዳቦታ ስንን ሀይሳን ዎ።

³⁸ “ታኒ ኔራ ላታሙ ላይ ኩመ ደአስ። ነ ዶርሳትነ ዴሻት አዉጫይቦኮና ዎይኮ ነ ዉድያፐ እሱዋካ ቆታዳ ማብከ።

³⁹ ዶእ ምዳ ጋዉፃካ ታ ነዉ ኤሀ ኤርከ፤ ታኒ ታፐ ጭጋይስ። ጋላስ ዎይኮ ቃማ ካይሶተትዳይሳታ ቃንፅሳሳ።

⁴⁰ ጋላሳ ሱላን፥ ቃማ ሜጎን ታኒ ቆሄታስ። ማራ ስኮ ስካ ኤርከ።

⁴¹ ታኒ ሀይሳዳ ሀናዳ ነ ሶን ላታሙ ላይ ደአስ። ታማነ ኦይዱ ላይ ነ ናምኡ ማጫ ናይታ ግሾ፥ ኡሱፑን ላይ ነ መህያ ግሾ ነዉ ኦስ። ሽን ኔኒ ታ ዳሞዝያ ታሙ ቶሆ ላማዳሳ።

⁴² ታ አዋ ፆሳይ፥ አብራሃመ ፆሳይ፥ ይሳቃ ፆሳይ ታራ ግዶናባ ግድያኮ፥ ስይ ባይና ኔኒ ታና መላ ኩሸ ከሳ የዳዳሳ። ሽን ፆሳይ ታ መቱዋነ ታ ዳቡርሳ በእድ ዝነ ቃማ ነና ሀንቅስ” ያግስ።

ያይቆባነ ላባ ጫቁዋ

⁴³ ላቢ ዛሪድ ያይቆባ፥ “ማጫሳት ታ ማጫ ናይታ፥ ኤንታ ናይት ታ ናይታ፥ ሀ መሄይካ ታ መህያ፥ ኔኒ በእያ ኡባይ ታባ። ሀች ሀ ማጫ ናይታ ቦላነ ኤንታ ናይታ ቦላ አይ ኦናዉ ዳንዳአይና?

⁴⁴ አነ ሃያ፥ ኔራነ ታራ ዎላ አነ ጫቆስ። ሄስ ነ ግዶንነ ታ ግዶን ማርካ ግዶ” ያግስ።

⁴⁵ ሄሳ ግሾ፥ ያይቆብ እስ ሹቹ ኤክድ ቱሳ ኤስስ።

⁴⁶ ባ ዳቦታ፥ “ሹቹ ሺሽተ” ያግስ። ኤንቲ ሹቹ ሺሽድ ኬልዶሶና። ሄ ኬላ ማታን ካ ምዶሶና።

⁴⁷ ላቢ ሄ ኬላ፥ ይጋር-ሳሀዱታ ግድ ሱንስ። ያይቆብ ቃስ እያ ጋላዳ ግድ ሱንስ።

⁴⁸ ላቢ፥ “ሀ ኬላይ ኔፐነ ታፐ ግዶን ሀች ማርካ” ያግስ። ሄሳ ግሾ፥ እያ ሱንይ ጋላዳ ጌተትስ።

⁴⁹ ላቢ፥ “ኑኒ እሶይ እሱዋፈ ሃክድ ደእያ በሳን ጎዳይ ነናነ ታና ናጎ” ግድ ሄ በሳ ምፅጳ ግድ ሱንስ።

⁵⁰ ላቢ፥ “ኔኒ ታ ማጫ ናይታ ናቅኮ፥ ዎይኮ ኔኒ ታ ማጫ ናይታ ቦላ ሀራ ማቾ ነ ኤክኮ፥ ታ ኤሮና እፅኮካ ነ ግዶንነ ታ ግዶን ፆሳይ ማርካ ግደይሳ አኬካ” ያግስ።

⁵¹ ላቢ ቃስካ፥ “ኬለትዳ ሹቻይነ ታኒ ነ ግዶንነ ታ ግዶን ኤስዳ ሹቻ ቱሳይ ሀይስሽ።

⁵² ታኒ ሀ ኬላፐ ነና ገናናዉ ኔኮ ካንናዳ፥ ነካ ታና ገናናዉ ሀ ኬላፐነ ሀ ሹቻ ቱሳፈ ሀ አናዳ ሀ ኬላይነ ሀ ሹቻ ቱሳይ ማርካ።

⁵³ አብራሃመ ፆሳይ፥ ናኮራ ፆሳይ፥ ኤንታ አዋ ፆሳይ፥ ኑ ግዶን ፕርዶ” ያግስ። ያይቆብ ባ አዋ ይሳቃ ፆሳ ሱንን ጫቅስ።

⁵⁴ ያይቆብ ዙማ ቦላ ያርሾ ያርሽስ። ባ ዳቦታ ካ ማናዉ ፄግስ። ኤንቲ ምድ ዙማ ቦላ አቅዶሶና።

⁵⁵ ዎንተ ጋላስ ጉራ ላቢ ደንድድ ባ ናይታ ናይታነ ባ ማጫ ናይታ አንጅድ፥ ዬርድ ባ ሶ ስምስ።