Medhetethi 26 - ጌሻ ማፃፋ

ይሳቃነ አብመለከ

¹ ሄ ቢታን ካሰ አብራሃመ ዎደ ከይዳ ኮሻፐ ሀራ ኮሽ ከይስ። ያንን፥ ይሳቅ ፍልስፄመ ካዋ አብመለከኮ ገራራ ብስ።

² ጎዳይ ይሳቃስ ቆንጭድ “ግብፀ ቢታ ዱገ ቦፓ፥ ታኒ ነዉ ኦድዳ ቢታን ደአ።

³ ሀ ቢታን ጉ ዎድያ ጋምኣሻ፥ ታኒ ኔራ ግዳና፥ ነና አንጃና። ሀ ቢታ ኡባ ታኒ ነዉነ ነ ሼሻስ እማና። ታኒ ነ አዋ አብራሃመስ ጫቅዳ ጫቁዋ ፖላና።

⁴ ነ ሼሻ ሳሎ ፆልንቶዳ ዳርሳና፥ ሀ ቢታ ኡባ ታኒ ኤንታዉ እማና። ሳአ ካዎተት ኡባይ ነ ሼሻ ባጋራ አንጀታና።

⁵ ሄስካ፥ አብራሃመይ ታ ቃላ ስእድ፥ ታ አዋጆታ፥ ታ ኪታታነ ታ ህገታ ናግዳ ግሾሳ” ያግስ።

⁶ ሄሳ ግሾ፥ ይሳቅ ገራራን ደእስ።

⁷ ሄ ቢታ አሳይ እርብቃባ ደንድ፥ “ሀና ነዉ አይቤ?” ግድ ይሳቃ ኦይችዶሶና። እ፥ “ሀና ታዉ ምቾ” ያግስ። ሄሳ እ ግዳይ፥ እርብቃ ዳሮ ማላ ሎኦ ግድያ ግሾ፥ “እያ ታ ማቾ ጊኮ፥ ሀ አሳይ እ ጋሶን ታና ዎና” ያግ ቆፕድ ባብስ።

⁸ ይሳቅ ያን ዳሮ ዎደ ደእዳፐ ጉየ፥ ፍልስፄመ ካዎይ አብመለከይ ማስኮተራ ዱገ ፄልያደ፥ ይሳቅ ባ ማቸ እርብቃራ ካእሽን በእስ።

⁹ ሄሳ ግሾ፥ አብመለከይ ይሳቃ ፄግስድ፥ “ሄኮ፥ እያ ነ ማቾ፤ ኔኒ አይስ እያ ታ ምቾ ጋዲ?” ግድ ኦይችስ። ይሳቅ፥ “እያ ታ ማቾ ጊኮ፥ አሳይ ታና እ ጋሶን ዎና ጋዳ ጋስ” ያግስ።

¹⁰ አብመለከይ፥ “ሀይስ ኔኒ ኑ ቦላ ኦዳባይ አይቤ? ታ አሳፐ እስ አስ ነ ማቸራ አቅስ ሽን አትስ፥ ኔኒ ኑ ቦላ ጎመ ኤሀዳሳ ሽን” ያግስ።

¹¹ ሄሳ ግሾ፥ አብመለከይ ባ አሳ፥ “ሀ ኡራ ዎይኮ እያ ማችዉ ቦችያ ኦንካ ቱማ ሀይቃና” ያግድ ኪትስ።

¹² ይሳቅ ሄ ቢታን ካ ዘርድ፥ ጎዳይ እያ አንጅዳ ግሾ ሄ ላይን ፄቱ ኩሸ ኤክስ።

¹³ እ ዱረተን ኤረታና ጋካናስ ዳሮ ዱረትሸ ብስ።

¹⁴ ይሳቃስ ዶርሳ ዉደይ፥ ሚዛ ዉደይነ አይለት አድ ዳርዳ ግሾ፥ ፍልስፄመ አሳት እያ ቃናትዶሶና።

¹⁵ ሄሳ ግሾ፥ እያ አዋ አብራሃመ ዎደ እያ አዋ አይለት ቦክዳ ሃ ኦላ ኡባ ፍልስፄመት ቢታ ኡሽድ ኩንዶሶና።

¹⁶ ሄ ዎደ አብመለከይ ይሳቃኮ፥ “ኔኒ ኑፐ አዳ ምንዳ ግሾ ኑ ማታፐ ባ” ያግስ።

¹⁷ ይሳቅ ሄሳፈ ደንድድ፥ ገራራ ዛንጋራ ብድ ዱንካነ ቶክድ ያን ደእስ።

¹⁸ ይሳቅ ባ አዋ አብራሃመ ዎደ ቦከትዳ ሃ ኦላታ፥ አብራሃመይ ሀይቅዳፐ ጉየ፥ ፍልስፄመት ኩንዳይሳታ ዛር ቦክ ከስድ፥ እያ አዋይ ሱንዳ ሱንን ፄግስ።

¹⁹ ይሳቃ አይለት ሄ ዛንጋራን ሃ ኦላ ቦክድ ያን ሎኦ ፑልቶ ሃ ደምዶሶና።

²⁰ ሽን ገራራ ሄንንቾት ይሳቃ ሄንንቾታራ፥ “ሃይ ኑባ” ያግድ ኦየትዶሶና። ኤንቲ ፓላመትዳ ግሾ፥ ይሳቅ ሄ ሃ ኦላ “ኤሴቃ” ግድ ሱንስ።

²¹ ሄሳፈ ጉየ፥ ኤንቲ ሀራ ሃ ኦላ ቦክዶሶና። ሽን ኤንቲ ሄ ሃ ኦላ ጌዶንካ ኦየትዶሶና። ሄሳ ግሾ፥ ይሳቅ ሄ ሃ ኦላ “ሲፅና” ግድ ሱንስ።

²² ሄሳፈ ጉ ስን ሺቅድ ሀራ ሃ ኦላ ቦክስስ። እያ ጋሶን ኦንካ ኦየትቦና ግሾ፥ “ፆሳይ ሀእ ኑስ ዳልግስስ ኑኒ ሀ ቢታን ዳራና” ግድ ሄ በሳ ረሆቦታ ግድ ሱንስ።

²³ ሄሳፈ ደንድድ ፑደ በርሳበ ከይስ።

²⁴ ሄ ብዳ ጋላስ ቃማ ጎዳይ እያዉ ቆንጭድ፥ “ታኒ ነ አዋ አብራሃመ ፆሳ፥ ታኒ ኔራ ደእያ ግሾ፥ ባቦፋ። ታ አይልያ አብራሃመ ግሾ ታኒ ነና አንጃና፥ ነ ሼሻካ ዳርሳና” ያግስ።

²⁵ ይሳቅ ያን ያርሾ በሲ ጊግስድ ጎዳ ሱን ፄግስ። ያን እ ባ ዱንካንያ ቶክስ፥ እያ አይለት ያን ሃ ኦላ ቦክዶሶና።

²⁶ ሄሳፈ ጉየ፥ አብመለከይ ባና ዞርያ አሁዛነ ቶራ ሞጮና ፍኮላ ኤክድ፥ ገራራፐ ይሳቃኮ ይስ።

²⁷ ይሳቅ ኤንታኮ፥ “ህንተ ካሰ ታና እፅድ፥ ህንተ ቢታፈ ከስ የድቤከቲ? ሀእ ታኮ አይ ኤካናዉ ይደቲ?” ያግስ።

²⁸ ኤንቲ፥ “ጎዳይ ኔራ ደኤይሳ ኑኒ ጌሽ ኤርዳ። ሄሳ ግሾ፥ ሳሮተ ጫቆይ ኑ ግዶንነ ነ ግዶን ዳናዉ ኮሼስ።

²⁹ ኑኒ ነና ቦችቦኮ፥ ነዉ ኬሀተ ፃላላ ኦድ፥ ነና ሳሮተን ሞይዝድ የድዳ። ሄሳዳካ ኔኒ ኑ ቦላ ኢታባ ኦና መላ፥ አነ ኔራ ጫቆስ። ቱማካ ሀእ ነና ጎዳይ አንጅስ” ያግዶሶና።

³⁰ ሄ ዎደ ይሳቅ ኤንታዉ ግብራ ጊግስን ምዶሶና፥ ኡይዶሶና።

³¹ ዎንተ ጋላስ ዎንታ ጉራ ደንድድ ኤንቲ እሶይ እሱዋራ ጫቅዶሶና። ይሳቅ ኤንታ ሞይዝን፥ ኤንቲ ሳሮ ሻከትድ ብዶሶና።

³² ሄ ጋላስ ይሳቃ አይለት ይድ፥ “ኑኒ ሃ ደምዳ” ያግድ ባንታ ቦክዳ ሃ ኦላባ እያዉ ኦድዶሶና።

³³ እ ሄ ሃ ኦላ ሳበ (ጫቆ) ግድ ሱንስ። ሄሳ ግሾ፥ ሄ ካታማ ሱንይ ሀች ጋካናስ በርሳበ (ጫቆ ሃ ኦላ) ጌተቴስ።

³⁴ ኤሳዌስ ላይ ኦይታማ ግድዳ ዎደ ህተ አድያ ብኤራ ናእዉ ዮድቶነ ህተ አድያ ኤሎና ናእዉ ባሰማቶ ማችስ።

³⁵ ኤንቲ ይሳቃነ እርብቃ አዛንሸ ደእዶሶና።