Medhetethi 25 - ጌሻ ማፃፋ

አብራሃመ ሀይቁዋ

¹ አብራሃመይ ኬፁራ ጌተትያ ሀራ ማቾ ኤክስ።

² እያ ዝምራና፥ ዮቅሳና፥ ማዳነ፥ ምድያመ፥ ያስቦቃነ ስዋ እያዉ የላሱ።

³ ዮቅሳን ሳባነ ደዳና የልስ። ደዳን አሾረታ፥ ለፁሰታነ ለኡማታ የልስ።

⁴ ምድያመ ናይት ገፈራ፥ ኤፈራ፥ ሄኖሀ፥ አብዳነ ኤልዳ። ሀይሳቲ ኡባይ ኬፁራ ሼሻታ።

⁵ አብራሃመይ ባባ ኡባ ይሳቃ ላትስስ።

⁶ ሽን እ ፓፃ ደእሸ፥ ሀራ ማቸታፐ የልዳ ናይታ ባዉ ደእያባፐ ዎይትስ። ባ ናአ ይሳቃፐ ኤንታ ሻክድ፥ ዶሎሀ ባጋ ቢታ የድስ።

⁷ አብራሃመይ ኩመ እስ ፄታነ ላፑን ታማነ እቻሹ ላይ ደእስ።

⁸ አብራሃመይ ዳሮ ዎደ ደእድ፥ ሎኦ ጭምድ፥ ሀይቅድ ባ ማይዛታን ጋሄትስ።

⁹ እያ ናይት ይሳቅነ እስማኤል እያ ማክፌላ ጌተትያ ጎንጎሎ ዱፉዋን ሞግዶሶና፤ ሄ ጎንጎሎይ ማምረ ማታን፥ ህተ አድያ ፆሃራ ናአ ኤፍሮና ጋድያን ደኤስ።

¹⁰ ሄስ አብራሃመይ ህተታፐ ሻምዳ ጋድያ። አብራሃመይ ባ ማችያ ሳራ ሞገትዳ ዱፉዋን ሞገትስ።

¹¹ አብራሃመይ ሀይቅዳፐ ጉየ፥ ፆሳይ እያ ናአ ይሳቃ አንጅስ። ሄ ዎደ ይሳቅ፥ ቤር-ላይ-ሮእ (ታና በእያ ደኦ ፆሳ ፑልቶ) ጌተትያ ፑልቱዋ ማታን ደኤስ።

እስማኤላነ እያ ናይታ

¹² ሳራ አይልያ፥ ግብፀፈ ይዳ አጋራ፥ አብራሃመስ የልዳ ናአ እስማኤላ የለተይ ሀይሳፈ ካልድ ፃፈትዳይሳ።

¹³ እስማኤላ ናይት ባንታ ሱንንነ ባንታ የለታ ማራን ሀይሳታ፤ ኤንትካ፥ ናባዮታ፥ ቀዳረ፥ አድቤላ፥ ምብሳማ፥

¹⁴ ምስማ፥ ዱማ፥ ማሳ፥

¹⁵ ኩዳነ፥ ቴማ፥ እፁራ፥ ናፍሳነ ቀድማ።

¹⁶ እስማኤላ ናይት ሀይሳታ፤ ኤንታ ሱንይ ኤንታ ሞንነ ደእያ በሳን ሀይሳ። ኤንቲ ባንታ ያራንካ ታማነ ናምኡ ሀላቃታ።

¹⁷ እስማኤል ኩመ ፄታነ ሀስታማነ ላፑን ላይ ደእድ፥ ሀይቅድ ባ ማይዛታን ጋሄትስ።

¹⁸ እስማኤላ ኮቸት ግብፀፈ ዶሎሀ ባጋን ደእያ ሀውላፐነ ሱራፐ ግዱዋን፥ አሶረ ኤፍያ ኦግያ ማታን ደእዶሶና። ኤንቲ ባንታ እሻታ ኡባራ ሞርከተን ደእዶሶና።

ያይቆባነ ኤሳዌ

¹⁹ አብራሃመ ናአ ይሳቃ የለተይ ሀይሳፈ ካልድ ፃፈትዳይሳ፤ አብራሃመይ ይሳቃ የልስ።

²⁰ ይሳቃስ ላይ ኦይታማ ግድን፥ እርብቃ ኤክስ፤ እያ ማሰጰፆመን ደእያ አራመ አድያ ባቱኤላ ናእዉነ ላባ ምችዉ።

²¹ ይሳቅ ባ ማችያ ማይን ግድዳ ግሾ፥ እዉ ጎዳ ዎስስ፤ ጎዳይ እያ ዎሳ ስእስ። ያትን እያ ማችያ እርብቃ ቃንታሱ።

²² ሽን እ ኡሎን ደእያ ናይት መንተ ግድ ኡትድ፥ እሶይ እሱዋራ ሱገትዶሶና፤ እያ፥ “ሀይስ ታዉ አይስ ሀኒ?” ያጋሱ። ሄሳ ግሾ፥ ጎዳ ኦይቻናዉ ባሱ።

²³ ጎዳይ እዮ፥ “ነ ኡሎን ናምኡ ካዎተ ደኤስ፤ ቃስ ነ ግዶን ደእያ ናምኡ ደረ አሳት እሶይ እሱዋፈ ሻከታና፤ እስ ደረ አሳት ሀንኮታፐ ምናና፤ ቃስ ባይራይ ካሉዋስ ኪተታና” ያግስ።

²⁴ እው የሎ ዎደይ ጋክን፥ እ ኡሎን መንተ አደ ናይት ደኦሶና።

²⁵ ኮይሮ የለትዳይስ አርሰ፤ እያ ቦላ ኡባ እክሰይ ማእስ፤ ሄሳ ግሾ፥ ኤንቲ እያ ኤሳዌ (እክሳማ) ግድ ሱንዶሶና።

²⁶ ሄሳፈ ጉየ፥ እያ እሻይ የለትስ። እ ባ ኩሽያን ኤሳዌ ግንድያ ኦይክድ ከይስ፥ ሄሳ ግሾ፥ እያ ያይቆባ (ግንደ ኦይከይሳ) ግድ ሱንዶሶና። እርብቃ ኤንታ የልዳ ዎደ ይሳቃስ ኡሱፑን ታሙ ላይ ግድስ።

²⁷ ናይት ድጭዶሶና፤ ኤሳዌይ ሻንካ ሂላ ኤርያ ባዞ አሰ ግድስ። ሽን ያይቆብ ዱንካነን ደእያ ዎፓ አሰ ግድስ።

²⁸ ይሳቅ ኤሳዌ ዶስስ፤ አይስ ጊኮ፥ እ ሻንካተይሳፈ ማናዉ ዶሴስ፤ ሽን እርብቃ ያይቆባ ዶሳዉሱ።

²⁹ እስ ዎደ ያይቆብ ዎፀ ካሽን፥ ኤሳዌይ ኮሽ ዎን ባዞፈ ይስ።

³⁰ ኤሳዌይ ያይቆባ፥ “ታና ሀ ዞኦ ዎፅያፐ ሙዛ፥ ታና ኮሽ ዎስ” ያግስ። (ሄሳ ግሾ፥ ቃስ እያ ሱንይ ኤዶመ (ዞኦ) ጌተትስ)።

³¹ ያይቆብ እያ፥ “ኮይሮ ታዉ ነ ባይራተ ባይዛ” ያግስ።

³² ያትን ኤሳዌይ፥ “ሄኮ፥ ታኒ ሀይቃና ሀናይስ፥ ሀ ባይራተይ ታና አይ ማዲ?” ያግስ።

³³ ያይቆብ ዛሪድ፥ “አነ ታዉ ኮይሮ ጫቃ” ያግስ። እ ጫቅስ፥ ባ ባይራተ ያይቆባስ ባይዝስ።

³⁴ ያይቆብ ኤሳዌስ ኡይነ ምስረ ዎፀ እምን ምስ ኡይስ። ሄሳፈ ጉየ ደንድድ ብስ። ኤሳዌይ ባ ባይራተ ሀይሳዳ ካስ።