Medhetethi 22 - ጌሻ ማፃፋ

አብራሃመ ፓጨተ

¹ ሄሳፈ ጉየ፥ ፆሳይ አብራሃመ ፓጭስ፤ እ እያ፥ “አብራሃመ” ያግድ ፄግስ። እ፥ “ዬ” ግድ ኮይስ።

² ፆሳይ፥ “ኔኒ ዶስያ ነ እስ ናአ ይሳቃ ኤካዳ፥ ሞርያ ቢታ ባ። ያን ታኒ ነና በሲያ እስ ደረ ቦላ እያ ፁሳ ያርሾ ኦዳ ታዉ ያርሻ” ያግስ።

³ ዎንተ ጋላስ አብራሃመይ ጉራ ደንድድ፥ ባ ሀርያ ጫንስ። ባ አይለታፐ ናምአታነ ባ ናአ ይሳቃ ባራ ኤክድ፥ ፁሳ ያርሹዋስ ግድያ ም ቀር ኤክድ፥ ፆሲ እያ በሲያ በሲ ባናዉ ደንድስ።

⁴ ሄን ጋላስ አብራሃመይ ቁ ግድ፥ ሄ በሳ ሃሆራ በእስ።

⁵ አብራሃመይ ባ አይለታ፥ “ህንተ ሀርያራ ሀይሳን ደእሽተ። ታራ ታ ናኣራ ያ ብድ ፆሰ ጎይንድ፥ ህንተኮ ስማና” ያግስ።

⁶ አብራሃመይ ያርሹዋ ም ደንድ፥ ባ ናአ ይሳቃ ቶስስ። እ ባዉ ታማነ ማሸ ኦይክስ። ኤንቲ ናምአይ እስፈ ብሽን፤

⁷ ይሳቅ ባ አዋ አብራሃመ፥ “ታ አዋዉ” ያግስ። አብራሃመይ፥ “ዬ፥ ታ ናአዉ” ያግስ። ይሳቅ፥ “ታማይነ ምይ ሀይስሽ፤ ሽን ፁሳ ያርሾ ኡርገ ዶርሳይ አዉኔ?” ያግስ።

⁸ ያትን አብራሃመይ፥ “ታ ናአዉ፥ ፁሳ ያርሾ ኡርገ ዶርሳ ፆሳይ ባዉ እማና” ያግስ። ያግን ኤንቲ ናምአይ እስፈ ብዶሶና።

⁹ ኤንቲ ፆሳይ እያዉ ኦድዳ በሳ ጋክዳ ዎደ፥ አብራሃመይ ያን ያርሾ በሲ ጊግስድ፥ ም ሂፅስ። ባ ናአ ይሳቃ ቃችድ፥ ሄ ም ቦላ ዝንእስስ።

¹⁰ አብራሃመይ ባ ናአ ሹካናዉ ባ ኩሽያ የድድ ማሸ ኤክስ።

¹¹ ሽን ጎዳ ኪታንቾይ ሳሎፐ፥ “አብራሃመ፥ አብራሃመ” ያግድ ፄግስ። እ፥ “ዬ” ያግድ ኮይስ።

¹² ኪታንቾይ፥ “ናአ ቦላ ነ ኩሽያ ዎፋ፤ እያ አይብባካ ኦፋ። ኔኒ ነ እስ ናኣ ታና ድጎና ግሾ፥ ኔኒ ፆሳስ ያየይሳ ታኒ ኤራይስ” ያግስ።

¹³ አብራሃመይ ቁ ግድ ፄልስ፤ ሄኮ ካጨይ ቱራን ቃፀትዳ እስ ዶርስ ደኤይሳ በእስ። አብራሃመይ ብድ ሄ ዶርሳ ኤክድ፥ ባ ናአ በሳን ፁሳ ያርሾ ኦድ ያርሽስ።

¹⁴ ሄሳ ግሾ፥ አብራሃመይ፥ “ጎዳይ እማና” ግድ ሄ በሳ ሱንስ። ሀች ጋካናስ ሄስ፥ “ጎዳ ዙማ ቦላ እመታና” ጌተቴስ።

¹⁵ ጎዳ ኪታንቾይ ሳሉዋፐ ናምአን አብራሃመ ፄግድ፥

¹⁶ “ታኒ ጎዳይ፥ ሀይሳዳ ጋዳ ታኒ ታ ሁጰን ነዉ ጫቃይስ፤ ኔኒ ሀይሳ ኦዳ ግሾነ ነ እስ ናኣ ታና ድጎና ግሾ፥

¹⁷ ታኒ ነና ቱማ አንጃና። ነ ዘረ ታኒ ሳሎ ፆልንቶ መላነ አባ ጋፃን ደእያ ሻፈ መላ ኦና። ነ ዘረት ባንታ ሞርከታ ካታማታ ላታና።

¹⁸ ኔኒ ታዉ ኪተትዳ ግሾ፥ ሀ ሳአ ካዎተት ኡባይ ነ ዘረ ባጋራ አንጀታና” ያግስ።

¹⁹ ሄሳፈ ጉየ፥ አብራሃመይ ባ አይለታኮ ጉየ ስምን፥ ኤንቲ ኡባይ እስፈ ደንድድ ባርሳበ ብዶሶና። አብራሃመይ ባርሳበን ደእስ።

ናኮራነ እያ ናይታ

²⁰ ሄሳፈ ጉየ፥ አብራሃመስ፥ “ምልካ ነ እሻ ናኮራስ ናይታ የላሱ፤

²¹ ኤንትካ ባይራይ ኡፃ፤ ኡፃ እሻት ቡዛ፥

²² አራመ አዋ ቃሜላ፥ ከሳዳ፥ ሃዞ፥ ፕልዳሻ፥ ይድላፋነ ባቱኤላ ጌተቶሶና” ያግስ።

²³ ሀ ሆስፑን ናይታ ምልካ አብራሃመ እሻ ናኮራስ የላሱ። ባቱኤል እርብቃ የልስ።

²⁴ ረኡማ ጌተትያ እያ ናምአን ማጫስያ ቃስ ፀባ፥ ጋሃማ፥ ታሀሳነ ማካ የላሱ።