Medhetethi 16 - ጌሻ ማፃፋ

አጋሮነ እስማኤላ

¹ አብራመ ማችያ ሶራ እያዉ ናአ የላቡኩ። ሽን እዉ ግብፀፈ ይዳ አጋሮ ጌተትያ ጋንዶይ ደአዉሱ።

² ሶራ አብራመኮ፥ “ታኒ ናአ የሎና መላ ጎዳይ ታና የሎ ድግስ። ኔኒ ባዳ ታ አይለራ አቃ፤ ታኒ እ ባጋራ ናአ ደማነኮነ ኦን ኤር” ያጋሱ። አብራመይ እ ቆፋ ኤክስ።

³ አብራመይ ካናነ ቢታን ታሙ ላይ ደእዳፐ ጉየ፥ እያ ማችያ ሶራ ግብፀፈ ይዳ ባ አይልዉ አጋሮ ባ አዝናስ ማቾ ኦዳ እማሱ።

⁴ አብራመይ አጋሮ ኤክስ፥ እያካ ቃንታሱ። እያ ባዉ ቃንትዳይሳ ኤርዳ ዎደ ባ ጎዳትዉ ካሱ።

⁵ ሶራ አብራመኮ፥ “ሀ ቆሁዋስ ታና ጋዳይ ነና፤ ታኒ ታ አይልዉ ነዉ እምን፥ እያ ቃንትድይሳ በአዳ ታና ካዉሱ። ነባነ ታባ ጎዳይ ፕርዶ” ያጋሱ።

⁶ አብራመይ ሶራኮ፥ “ሀኖ በአ ነ አይልዉ እያ ነ ኩሸና፤ ነና ሎእዳባ ኦ” ያግስ። ሄሳፈ ጉየ፥ ሶራ አጋሮ ኡንኤን ያፐ ከያዳ ባቃታሱ።

⁷ ጎዳ ኪታንቾይ አጋሮ መላ ቢታን፥ ፑልቶ ሃ ማታን ደምስ፤ ሄ ፑልቶይ ሹራ ቢታ ኤፍያ ኦግያ ማታን ደኤስ።

⁸ ኪታንቾይ አጋሮ፥ “ሶራ አይለተ፥ አጋረ፥ አዉፐ ያዲ? አዉ ባይ?” ያግድ ኦይችስ። አጋራ ዛራዳ፥ “ታኒ ታ ጎዳተ ሶራፐ ባቃታስ” ያጋሱ።

⁹ ጎዳ ኪታንቾይ ኢኮ፥ “ነ ጎዳተኮ ስማ ባዳ እዉ ሃረታ” ያግድ ኦድስ።

¹⁰ ጉጅድካ ጎዳ ኪታንቾይ ኢኮ፥ “ነ የለተ ኦንካ ታይባናዉ ዳንዳኦናዳ ኦዳ ዳርሳና” ያግስ።

¹¹ ቃስካ ጎዳ ኪታንቾይ እዮ፥ “ሄኮ ኔኒ ቃንታዳሳ፥ ኔኒ አደ ናአ የላና። ፆሳይ ነ ዋሱዋ ስእዳ ግሾ እያ ኔኒ እስማኤላ ጋዳ ሱንና

¹² እ ባዞ ሀረ መላ ግዳና፥ እ ባ ቀስያ አሳ ኡባ ቦላ ደንና፥ ቃስ አሳ ኡባይካ ባንታ ቀስያ እያ ቦላ ደንና። እ ባ እሻታ ኡባራ እፆን ደአና” ያግስ።

¹³ አጋራ ባራ ኦደትዳ ጎዳ፥ “ኔኒ ታና በእያ ፆሳ” ያጋዳ ፄጋሱ። “ታኒ ታና በኤይሳ በአስ” ያጋሱ።

¹⁴ ሄሳፈ ደንዶይሳን ሄ ፑልቶ ሃይ፥ “ታና በእያ ደኦ ፆሳ ፑልቱዋ” ጌተትድ ፄገትስ። ሄ ሃ ፑልቶይ ቃደሳፐነ ባሬዳፐ ግዶን ደኤስ።

¹⁵ አጋራ አብራመስ አደ ናአ የላሱ፤ አብራመይ የለትዳ ናአ እስማኤላ ግድ ሱንስ።

¹⁶ አጋራ አብራመስ እስማኤላ የልያ ዎደ አብራመስ ላይ ሆስፑን ታማነ ኡሱፑና።