Medhetethi 15 - ጌሻ ማፃፋ

ፆሳይ አብራመራ ጫቅዳ ጫቁዋ

¹ ሄሳፈ ጉየ፥ ጎዳይ አብራመስ አሙሆን ቆንጭድ፥ “አብራመ ባቦፋ፥ ታኒ ነዉ ጎንዳለ፥ ነ ዎይቶይ ግታ” ያግስ።

² ሽን አብራመይ፥ “አቤት ኡባ ሃርያ ጎዳዉ፥ ኔኒ እምያ ዎይቶይ ታዉ አይሴ? ታዉ የሎይ ባዋ፤ ቡሮ ታና ላታናይ ዳማስቆ ኤልአዛራ ግደኔ?

³ አብራመይ፥ ኔኒ ታዉ የሎ እማቦና ግሾ ታ ኬን ደእያ ታ አይለይ ታና ላታና” ያግስ።

⁴ ጎዳይ እያኮ፥ “ሀ አይለይ ነና ላተና፥ ሽን ነ ጉልባታፐ ከያና ነ ናአይ ነና ላታና” ያግስ።

⁵ ያግ ስሚድ እያ ካረ ከስድ፥ “ፑደ ሳሎ ፄላ፥ ኔኒ ፆልንቶታ ፓይዳናዉ ዳንዳእኮ ፓይዳ፥ ህዛ ነ ሼሻይካ ሄሳዳ ግዳና” ያግስ።

⁶ አብራመይ ጎዳ አማንስ፤ ጎዳይ እያዉ ሄሳ ፅሎተ ኦድ ኤክስ።

⁷ ቃስካ ጎዳይ እያኮ፥ “ኔኒ ሀ ቢታ ላታና መላ ካልዳወታ ቢታፈ ኡረ ካታማፐ ነና ከስዳ ጎዳይ ታና” ያግስ።

⁸ ሽን አብራመይ እያኮ፥ “አቤት ኡባ ሃርያ ጎዳዉ ሀ ቢታ ታ ላታናይሳ አይብን ኤሮ?” ያግስ።

⁹ ጎዳይ እያኮ፥ “ሄ ላይ ግድዳ እስ ኡስ፥ እስ ዴሽ፥ እስ ዶርሰነ ሄሳዳካ ሆለነ ጎርለ ታዉ ኤካዳ ያ” ያግስ።

¹⁰ አብራመይ ሄሳታ ኡባ ፆሳስ ኤህድ ካፎት አትሽን፥ ሀራታ ቃንፅድ ናምኡ ከስ ሻክድ እሱዋ እሱዋ ግናን ዎስ።

¹¹ አንኮት ሄ አሹዋ ማናዉ ቦላፈ ዎዶሶና፤ ሽን አብራመይ ኤንታ ጎድስ።

¹² አው ዉላና ሀንያ ዎደ አብራመ ዎልቃማ ስኮይ ሾጭ የግስ። ዳጋንያ ዎልቃማ ም እያ ቦላ ዎስ።

¹³ ጎዳይ አብራመኮ፥ “ነ ሼሻይ አላጋ ቢታን በተ አስ ግድድ ዳናይሳ ሎይዳ ኤራ፤ ኤንቲ አይለተን ኦይዱ ፄቱ ላይ ናቀት ሃረታና።

¹⁴ ሽን ኤንታና አይለተን ሃርያ ደርያ ታ ፕርዳና፤ ኤንቲ ሄ ቢታፈ ከይሸ ዳሮ ሻሎ ኤክድ ከያና።

¹⁵ ነና ግድኮ፥ ኔኒ ነ ማይዛታኮ ሳሮተን ባና። ኔኒ ዳሮ ጭማዳ ሞገታና።

¹⁶ ነ ሼሻይ ቡሮ ኦይዳን የለተን ሀ ቢታ ስማና። አይስ ጊኮ፥ አሞረታ ናጋራይ ፕርደታና ልክያ ቡሮ ጋክቤና” ያግስ።

¹⁷ አው ዉልን ሳእ ማ ልንፅ ግን፥ ጮጨ ታማ ጩይነ ታማ ላጮይ በንትድ ሻከትዳ አሹዋ ግዶራ አስ።

¹⁸ ሄ ጋላስ ጎዳይ አብራመስ፥ “ግብፀ ሻፋፐ ዶምድ ኤፍራፂሳ ሻፋ ጋካናዉ ደእያ ቢታ ኡባ ታኒ ነ ሼሻስ እማና።

¹⁹ ሄ ቢታይ ቄናታ ቢታ፥ ቀነዛታ ቢታ፥ ቃድሞነታ ቢታ፥

²⁰ ህተታ ቢታ፥ ፓርዘታ ቢታ፥ ራፋይመታ ቢታ፥

²¹ አሞረታ ቢታ፥ ካናነታ ቢታ፥ ገርገሰታ ቢታነ ያቡሰታ ቢታ” ያግድ ጫቅስ።