Medhetethi 13 - ጌሻ ማፃፋ

አብራመነ ሎፀ ሻከተ

¹ አብራመይ ባአ ማቺው ሶራነ ባዉ ደእያባ ኡባ ኤክድ ግብፀፈ ነገበ መላ ቢታ ብስ። ሎፀይካ እያራ ዎላ ብስ።

² አብራመይ ሄ ዎደ መሄን፥ ብራንነ ዎርቃን ዳሮ ዱረትስ።

³ አብራመይ ናገበፐ ደንድድ በሳፈ በሰ አሸ ቤተለ ጋካናዉ ብስ። ቤተለፐነ ጋየፐ ግዶን እ ኮይሮ ዱንካንያ ቶክዳ በሳነ

⁴ ጎዳስ ካሰ ያርሾ ያርሽዳ በሳ ጋክድ፥ ያን አብራመይ ጎዳ ሱን ፄግስ።

⁵ አብራመራ ዎላ ሄመትያ ሎፀስካ ዳሮ ዶርሳት፥ ዴሻት፥ መሄት፥ ሶ አሳትነ አይለት ደኦሶና።

⁶ ሄ ዎደ አብራመስነ ሎፀስ ዳሮ መሄይ ደእያ ግሾ ኤንቲ ባንታ መሄታ ሄምያ በሳይ ፁምስ።

⁷ ሄሳ ግሾ፥ አብራመ መሄታ ሄመይሳታ ግዶንነ ሎፀ መሄታ ሄመይሳታ ግዶን ካች ከይስ። ሄ ዎደ ካናነ አሳትነ ፓርዘ አሳት ሄ ቢታን ደኦሶና።

⁸ ሄሳ ግሾ፥ አብራመይ ሎፀኮ፥ “ኑኒ እሻንታ ግድያ ግሾ ኑ ግዶን ዎይኮ ኑ መሄታ ሄመይሳታ ግዶን ካች ዳናዉ በሰና።

⁹ ቢታይ ዳልጋ ግድያ ግሾ ኑ ዎልፐ ሻከታና። ነ ሀድርሳ ባጋ ቢኮ ታኒ ኡሻቻ ባጋ ባና፤ ኔኒ ኡሻቻ ባጋ ቢኮ ታኒ ሀድርሳ ባጋ ባና” ያግስ።

¹⁰ ሎፀይ ቢታ ዩይ አድ ፄልያ ዎደ ዮርዳኖሰ ዛንጋራይ፥ ጎዳ ጋናትያዳ ዎይኮ ዞኣረ ባጋራ ደእያ ግብፀ ቢታ መላ ሃ ኩምዳይሳ በእስ። ሄስካ፥ ሀንዳይ ጎዳይ ሶዶመነ ጋሞራ ጌተትያ ካታማታ ይሳናፐ ስን።

¹¹ ሄሳ ግሾ፥ ሎፀይ ዮርዳኖሰ ዛንጋራ ኡባ ባዉ ዶርድ ዶሎሀ ባጋ ብስ። ሄሳዳ ሀንድ እሶይ እሱዋፈ ሻከትዶሶና።

¹² አብራመይ ካናነ ቢታን ደእስ። ሽን ሎፀይ ዛንጋራን ደእያ ካታማታ ግዱዋን ሶዶመ ማታን ባ ዱንካንያ ቶክስ።

¹³ ሄ ዎደ ሶዶመ አሳይ ዳሮ ኢታነ ጎዳ ስንን ናጋራንቾታ።

¹⁴ ሎፀይ አብራመፐ ሻከትዳፐ ጉየ፥ ጎዳይ አብራመኮ፥ “ነ ደእያ በሳፈ ፑደ ቁ ጋዳ ፑደሀ ባጋነ ዱገሀ ባጋ፥ ዶሎሀ ባጋነ ዉሎሀ ባጋ የዳ ፄላ።

¹⁵ ሄ ኔኒ በእያ ቢታ ኡባ ታኒ መርናዉ ነዉነ ነ ሼሻስ እማና።

¹⁶ ታኒ ነ ሼሻ ቢታ ባናዳ ዳርሳና። ኦንካ ቢታ ባና ታይባናዉ ዳንዳኦናይሳዳ ነ ሼሻይካ ታይበተና።

¹⁷ ታኒ ሀ ቢታ ነዉ እማና ግሾ ደንዳዳ ቢታ አዱሳተንነ ዳልጋተን ስመረታ።”

¹⁸ ሄሳ ግሾ፥ አብራመይ ባ ዱንካንያ ሾድድ ከብሮናን ደእያ ማምረ ግታ ምታ ማታን ደአናዉ ብስ። ያን ጎዳስ ያርሾ በሲ ጊግስስ።