Medhetethi 12 - ጌሻ ማፃፋ

አብራመ ፄገተ

¹ ጎዳይ አብራመኮ፥ “ነ ቢታፈ፥ ነ ደርያፐ፥ ነ ሶ አሳፐ፥ ሻከታዳ ታ ነና በሲያ ቢታ ባ።

² ታ ነና ዎልቃማ ደረ ኦና፥ ነና ታ አንጃና ነ ሱን ግታ ከሳና፤ ነ ሀራታስ አንጆ ግዳና።

³ ታኒ ነና አንጀይሳታ አንጃና፤ ነና ባደይሳታ ባዳና፥ ቢታ ቦላ ደእያ ደረ ኡባይ ነ ጋሶራ አንጀታና” ያግስ።

⁴ ሄሳ ግሾ፥ አብራመይ ፆሳይ እያ ኪትዳይሳዳ ከይስ። ሎፀይ እያራ እስፈ ብስ። አብራመይ ካራነፐ ከይያ ዎደ እያዉ ላይ ላፑን ታማነ እቻሻ።

⁵ አብራመይ ባ ማችዉ ሶራ፥ ባ እሻ ናአ ሎፀ፥ ካራነን ደእሸ ሺሽዳ ሻሉዋነ ባ አይለታ ኡባ ኤክድ ካናነ ቢታ ብድ ጋክዶሶና።

⁶ አብራመይ ሴከማን ደእያ ሞረ ጌተትያ ግታ ምኮ ጋካናዉ ካንድ ብስ። ሄ ዎደ ካናነ አሳት ሄ ቢታን ደኦሶና።

⁷ ፆሳይ አብራመስ ያን ቆንጭድ፥ “ሀ ቢታ ታኒ ነ ሼሻስ እማና” ያግስ። እካ ባ ቆንጭዳ ጎዳስ ሄ በሳን ያርሾ በሲ ጊግስስ።

⁸ ሄ በሳፈ ደንድድ ቤተለፐ ዶሎሀ ባጋራ ደእያ ዙማኮ ብስ። ያን ቤተለ ዉሎሀ ባጋን፥ ጋየ ዶሎሀ ባጋን አግድ፥ ባ ዱንካንያ ቶክስ፤ ያን ጎዳስ ያርሾ በሲ ጊግስድ ጎዳ ሱን ፄግስ።

⁹ ሄሳፈ ጉየ፥ አብራመይ በሳፈ በሰ አሸ ነገበ ጋክስ።

አብራመይ ግብፀ ቢታን

¹⁰ ሄ ዎደ ካናነ ቢታን ኮሽ ከይስ። ኮሻይ ምንዳ ግሾ ጉ ዎደ ያን ዳናዉ አብራመይ ግብፀ ቢታ ብስ።

¹¹ ግብፀ ገላናዉ ማትያ ዎደ አብራመይ ባ ማቸ ሶራኮ፥ “ኔኒ ማላ ሎኦ ግደይሳ ታኒ ኤራይስ፤

¹² ግብፀ አሳት ነና በእድ፥ ‘ሀና እያ ማችዉ’ ያግድ ታና ዎድ ነና አጋጋና።

¹³ ሄሳ ግሾ፥ ነ ግሾ ግድ ታዉ ሎኦባ ኦና መላነ ታ ሸምፕያ አታና መላ ‘ታ እያዉ ምቾ’ ያጋ” ያግስ።

¹⁴ አብራመይ ግብፀ ቢታ ጋክዳ መላ ግብፀ አሳት ሶራ ማላ ሎኦ ማጫስ ግዶይሳ በእዶሶና።

¹⁵ ግብፀ ፓሮና ሞርናት እዮ በእድ ዳሮ ናሽድ ካዋ ፋሮናስ ኦድዶሶና፥ እዮካ ካዋ ስን ኤፍዶሶና።

¹⁶ እ ጋሶን ካዎይ አብራመ ቦንችድ ሞክስ። ጉጅድካ ዶርሳታ፥ ሚዛታ፥ ሀረታ፥ ግማለታ፥ አደ አይለታነ ማጫ አይለታ እያዉ እሚስ።

¹⁷ ሽን ጎዳይ አብራመ ማቸ ሶራ ጋሶን ግብፀ ካዋነ እያ ኬ ጋዶ ሀርገን ሾጭስ።

¹⁸ ሄሳፈ ጉየ፥ ካዎይ አብራመ ፄግስድ፥ “ነ ታ ቦላ ኦዳባይ ሀይስ አይቤ? እያ ነ ማቾ ግደይሳ አይስ ታዉ ኦዳብኪ?

¹⁹ አይስ ታ ምቾ ጋዳ ዎርዶታዲ? ታ እዮ ማቾ ኦዳ ኤካስ፥ ሽን አትስ፤ ነ ማችያ ሀናሹ ኤካ ባ” ያግስ።

²⁰ ሄሳፈ ጉየ፥ አብራመነ እያ ማችዉ እያዉ ደእያባ ኡባራ ከስ የዳና መላ ካዎይ ባ አሳታ ኪትስ።