Medhetethi 10 - ጌሻ ማፃፋ

ኖሄ ሼሻ

¹ ኖሄ ናይታ፥ ሴማ፥ ካማነ ያፈታ የለተይ ሀይሳፈ ካልድ ፃፈትዳይሳ። ዮ ሃፈ ጉየ፥ ኤንታዉ አደ ናይት የለትዶሶና።

² ያፈታ አደ ናይት፥ ጎመራ፥ ማጎገ፥ ማዳያ፥ ያዋና፥ ቱባላ፥ ሞሳሀነ ትራሳ።

³ ጎመራ አደ ናይት፥ አስካናዛ፥ እርፋታነ ቶጋርማ።

⁴ ያዋና አደ ናይት፥ ኤልሻ፥ ታርሰሳ፥ ክፅማነ ሮዳ።

⁵ ሀይሳቲ ዩሾይ አባን ተቀትዳ ቢታን ደእያ ያፈታ ሼሻታስ ማይዛታ። ኤንቲ ባንታ ቢታን ቢታን፥ ባንታ ዶናን ዶናንነ ባንታ ካዎተን ካዎተን ሻከትድ ደእያ ደረታ።

⁶ ካማ አደ ናይት፥ ኩሻ፥ ግብፀ፥ ሊበነ ካናነ።

⁷ ኩሻ አደ ናይት፥ ሳባ፥ ሀውላ፥ ሳብታ፥ ራእማነ ሳብታካ። ራእመ አደ ናይት፤ ሳባነ ደዳና።

⁸ ኩሽ ናምሩደ የልስ፤ ናምሩደይ ሀ ሳአን ኮይሮ ዎልቃማ ኦላንቾ ግድስ።

⁹ ጎዳ ማደን ዎልቃማ ሻንካንቾ ግድስ። አሳይ፥ “ናምሩደዳ ጎዳይ ነና ዎልቃማ ሻንካንቾ ከሶ” ግድ አንጀይ ሄሳ ግሾሳ።

¹⁰ እያ ካዎተስ ኮይሮ ካታማት ሳናኦራ ቢታን ደእያ ባብሎነ፥ ኤረካ፥ አርካዳነ ካልነ።

¹¹ እ ሄ ቢታፈ አሶረ ብድ፥ ናናወ፥ ረሆቦታነ ካላሀ ኬፅስ።

¹² ቃስ ናናወፐነ ካላሀ ካታማፐ ግዶን ረሴና ኬፅስ።

¹³ ምፅራይም፥ ሉደታ፥ አናምመታ፥ ላሀበታ፥ ናፍቱሄታ፥

¹⁴ ፓትሮሳታነ ፍልስፄመ ኮቻ የልዳ ካስሉሄማታነ ቃፍቶረታ ማይዛ።

¹⁵ ካናነይ ባ ባይራ ናአ ስዶናነ ሄታ የልስ።

¹⁶ ቃስ ካናነ ሼሻት ያቡሰታ፥ አሞረታ፥ ገርገሰታ፥

¹⁷ ህወታ፥ አርከታ፥ ሲናታ፥

¹⁸ አርዋደታ፥ ፃማራታነ ሀማታታ የልስ። ሄሳፈ ጉየ፥ ካናነ ሼሻት ዱማ ዱማ በሲ ላለትዶሶና።

¹⁹ ካናነ ቢታ ዛዋይ ስዶናፐ ዶምድ፥ ጋራራነ ጋዛራ ጋክድ፥ ሶዶመነ ጋሞራ፥ አዳማነ ፃቦይማ ብድ፥ ላሻአ ጋክ ኤቅስ።

²⁰ ሀይሳቲ ካማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተ ደኤስ።

²¹ ሴማስ ናይት የለትዶሶና። እ ያፈታስ ባይራ እሻነ ኤቦራ ናይታ ኡባስ ማይዛ።

²² ሴማ አደ ናይት፥ ኤላማ፥ አሶረ፥ አርፋክሳደ፥ ሉደነ አራመ።

²³ አራመ አደ ናይት፥ ኡፃ፥ ሁላ፥ ገተራነ ማሸካ።

²⁴ አርፋክሳድ ሳላ የልስ። ሳል ኤቦራ የልስ።

²⁵ ኤቦራስ ናምኡ አደ ናይት የለትዶሶና። ሳአን ደእያ አሳይ እያ ዎደ ሻከትዳ ግሾ እሱዋ ፐለጋ ግድ ሱንስ። እያ እሻ ሱንይ ዮቅፃና።

²⁶ ዮቅፃና ሼሻት ሀይሳታ። ኤንትካ አልሞዳዳ፥ ሳለፋ፥ ሀሰርሞታ፥ ያራሀ፥

²⁷ ሀዶራማ፥ ኡዛላ፥ ድቅላ፥

²⁸ ኦባላ፥ አብማላ፥ ሳባ፥

²⁹ ኦፍራ፥ ሀውላነ ዮባባ። ሀይሳቲ ኡባይ ዮቅፃና ሼሻታ።

³⁰ ኤንቲ ደእዳ ሄራይ ሜሳፐ ብድ ዶሎሀ ባጋራ ደእያ ደረይ ዳርያ ሳፋራ ቢታ ጋኬስ።

³¹ ሀይሳቲ ኡባይ ሴማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተ ደኤስ።

³² ሀይሳቲ ኡባይ ባንታ ሼሻን ሼሻንነ ባንታ ካዎተን ካዎተን ፃፈትዳ ኖሄ ናይታ። ዮ ሃፈ ጉየ ካዎተት ሀይሳታፐ ሳአ ኡባ ላለትዶሶና።