Mazmure 98 - ጌሻ ማፃፋ

ፆሳስ ኡፋይሳን እልልተ

ማዝሙረ

¹ ጎዳይ ማላልስያባ ኦዳ ግሾ፥ እያዉ ኦራ ማዝሙረ የፅተ። እያ ኡሻቻ ኩሸይ፥ እያ ጌሻ ቀሰይ እያዉ ፆኖ እሚስ።

² ጎዳይ ባ ፆኑዋ ኤርስስ፤ ባ ፅሎተ ካዎተታስ ቆንጭስስ።

³ እ እስራኤለ አሳ ሲቀይሳነ ኤንታዉ አማነተይሳ ሀሳይስ። ሳኣ ጋፃ ጋካናዉ ደእያ አሳ ኡባይ ኑ ፆሳ አቶተ በእዶሶና።

⁴ ሳአ ቦላ ደእያ አሳዉ፥ ጎዳስ ኡፋይሳን የፅተ፤ ኡፋይሳን እልልሸ ሳቢተ።

⁵ ጎዳስ ዲ ዲፅተ፤ ዲንነ ማዝሙረን ጎዳ ሳቢተ።

⁶ ሱሱልኤነ ሞይዘ ፑንሸ፥ ኡፋይሳን ጎዳ ኑ ካዋ ስንን የፅተ።

⁷ አባይነ አባ ግዶን ኩምዳ ኡባይ ጉሞ፤ ሳአይነ ሳኣ ቦላ ደእያ ኡባይ የፆ።

⁸ ሻፋት ባንታ ኩሽያ ባቆ፤ ዙማት እስፈ ጎዳ ስንን ኡፋይሳን የፆ።

⁹ ጎዳይ ሳኣ ቦላ ፕርዳናዉ ዬስ፤ እ ሀ ሳኣ ቦላ ፅሎተን አሳ ቦላ ሱረተን ፕርዳና።