Mazmure 92 - ጌሻ ማፃፋ

ፆሳ ኦሶይ ግታ

ሳምባታ ጋላሳ ማዝሙረ

¹ ጎዳ ጋላቶይ ሎኦ፤ ኡባፈ ቃ ፆሳዉ፥ ነ ሱን ሳቦይ ሎኦ።

² ዎንታ ዎንታ ነ ሲቁዋ ኦዶይ፥ ቃማ ነ አማነተ አዋጆይ ሎኦ።

³ ታሙ ሻያን ዋፀትዳ ዲን ማስንቆ ካእሸ ነና ጋላቶይ ሎኦ።

⁴ ታኒ ነ ኦሱዋን ኡፋይትዳ ግሾ፥ ነ ኩሸ ኦሱዋ ግሾ ነና ጋላታይስ።

⁵ ጎዳዉ፥ ነ ኦሶይ አይ መላ ግተ! ነ ቆፋይ አይ መላ ጪሞ!

⁶ ኤያ አስ ኤራናዉ ዳንዳኤና፤ ዎዛን ባይና አስ አኬካናዉ ዳንዳኤና።

⁷ ኢታት ማታዳ ድጭኮካ፥ ኢታ ኦይሳት ዳይኮካ፥ ኤንቲ መርናዉ ያና።

⁸ ሽን አቤት ጎዳዉ፥ ኔኒ መርናዉ ኡባፈ ቃ።

⁹ አቤት ጎዳዉ፥ ቱማ ነ ሞርከት ያና፤ ኢታ ኦያ ኡባይ ፕስክ ጋና።

¹⁰ ታ ካጭያ መን ካጨዳ ቁ ኦዳሳ፤ ሎኦ ዛይተ ታ ሁጰን ትያዳሳ።

¹¹ ታ ሞርከት ፆነትሽን ታ አይፈን በአስ፤ ታና ኡንኤይሳት ዋስሽን ታ ሀይን ስአስ።

¹² ፅሎት ዛምባዳ ድጫና፤ ልባኖሰ ዝጋዳ ዳያና።

¹³ ኤንቲ ጎዳ ኬን ቶከትዳ ም መላ፤ ኤንቲ ኑ ፆሳ ዳባባን ዳና።

¹⁴ ኤንቲ ጬግድካ አይፋና፤ ኤንቲ እርፃነ ጭልኦ ግድድ ዳና።

¹⁵ ኤንቲ፥ “ጎዳይ ሱረ፤ እ ታ ዛላ፤ እያን ኢታተ ባዋ” ያጋና።