Mazmure 90 - ጌሻ ማፃፋ

ኦይዳን ማፃፋ ( ማዝ 90—106 ) መርናዉ ደእያ ፆሳ

ፆሳ አስ ግድዳ ሙሰ ዎሳ

¹ ጎዳዉ፥ ኔኒ የለታፐ የለታ ጋካናዉ፥ ኑኒ ደእያ በሲ ግዳዳሳ።

² ደረት መታናፐ ካሰ፥ ሳእ ኦሰታናፐ ካሰ፥ መርናፐ መርና ጋካናዉ ነ ፆሰ።

³ ኔኒ፥ “አሳ ናይቶ፥ ጉየ ቢታኮ ስምተ” ያጋዳ፥ ኤንታ መትዳ ቢታኮ ጉየ ዛራሳ።

⁴ ሙኩሉ ላይ ዝነ አዳ ጋላሳ መላ፤ ዎይኮ እስ ቃማ ግዶን እስ ሳተ መላ።

⁵ ኔኒ አሳ ቆፖና ድኦዳ ኤፋሳ፤ ኤንቲ አሙሆ መላ፤ ዎንታ ዎንታ ዶልያ ማታ መላ።

⁶ ማት ዎንታ ድጭድ ጭዬስ፤ ኦማርስያ ዎደ ሹልድ መሌስ።

⁷ ኑኒ ነ ይሉዋን ዉርዳ፤ ነ ሀንቁዋ ሱሎን ዳጋምዳ።

⁸ ኑ ኢታ ኦሱዋ ነ ስንን ዎዳሳ፤ ኑ ጌምዳ ናጋራ ነ ሶምኡዋ ፖኡዋን ዎዳሳ።

⁹ ኑ ጋላሳ ኡባይ ነ ሀንቁዋን አስ፤ ኑ ላይ ኦለን ዉርሶስ።

¹⁰ ኑ ደኦ ላይይ ላፑን ታማ፤ ዎይኮ ዳርኮ ሆስፑን ታማ። ሄስካ መቶይነ ዋየይ ኩምዳይሳ፤ ኑ ላይይ ኤሶን ዉሬስ፤ ኑካ ኤሶን አኦስ።

¹¹ ነ ሀንቁዋ ዎልቃ ኤረይ ኦኔ? ነ ሀንቁዋ ሱሎይ ዎልቃማ።

¹² ኑ ላይ ማራ ኦገን ኑ ጎኤታና መላ፥ ኑና ጭንጫተ ታማርሳ።

¹³ ጎዳዉ፥ ነ ሀንቆይ አዉደ ጋካናሴ? ሀያና ነ አይለታስ ቃታ።

¹⁴ ኑ ላይ ኡባን ኑ ኡፋይታናዳነ የፃናዳ፥ ዎንታ ዎንታ ነ ሲቁዋ ኑና ካልሳ።

¹⁵ ነ ኑና መቶዳ ጋላሳታ ኬና፥ ኑኒ ኡንኤትዳ ላይታ ኬና ኑና ኡፋይሳ።

¹⁶ ኑስ ነ አይለታስ ነ ኦሶይ ቆንጮ፤ ነ ቦንቾይ ኤንታ ናይታስ በንቶ።

¹⁷ ጎዳ ኑ ፆሳ ኬሀተይ ኑ ቦላ ግዶ፤ ኑ ኩሸ ኦሶ ኡባ ኑስ አይፍሳ፤ ኤ፥ ኑ ኩሸ ኦሶ ኡባ አይፍሳ።