Mazmure 9 - ጌሻ ማፃፋ

ኢታታ ቦላ ያና ፕርዳ

“ናአ ሀይቆን” ጌተትያ ጩን የፀትያ ማዝሙረ

¹ አቤት ጎዳዉ፥ ታ ነና ታ ኩመ ዎዛናፐ ጋላታና፤ ኔኒ ኦዳ ማላልስያ ኦሶ ኡባ ኦዳና።

² ታኒ ነናን ኡፋይታና ሀሹ ጋና። ኡባፈ ቃ ፆሳዉ፥ ታኒ ነ ሱንስ ጋላታ ማዝሙረ የፃና።

³ ታ ሞርከት ጉየ ስምያ ዎደ፥ ነ ስንፈ በትድ ያና።

⁴ ነ አራታን ኡታዳ ታዉ ፅሎ ፕርዳሳ፤ ታ ሞቱዋ ነ ፅሎተን ኦይካዳሳ።

⁵ ኔኒ ካዎተታ ሴራዳሳ፤ ኢታታ ይሳዳሳ። ኔኒ ኤንታ ሱን መርናዉ ቁቻዳሳ።

⁶ ሞርከት መርናዉ ይዶሶና፤ ኤንታ ካታማታ ኩመ ላላዳሳ፤ ኤንቲ ኩመ ዶገትዶሶና።

⁷ ሽን ጎዳይ መርናዉ ካዎትድ ደኤስ፤ እ ባ አራታ ፕርዳስ ጊግስስ።

⁸ ሀ ሳኣ ፅሎተን ፕርዳና፤ ደረታ ሱረተን አይሳና።

⁹ ጎዳይ ኡንኤትዳይሳታስ አትያ በሲ፤ መቶ ዎደ ገልድ አትያ ቆታ።

¹⁰ ነና ኤረይሳት ነናን አማነቶሶና፤ ጎዳዉ፥ ነና ኮየይሳታ የጋ አጋካ።

¹¹ ፅዮነን ካዎትዳ ጎዳ ጋላትተ፤ እ ኦዳ ኦሱዋ አሳ ኡባስ ኦድተ።

¹² ሀሎ ከይያ ፆሳይ ጉክዳ ፅሎ ሱ ዶገና፤ ቦረትዳይሳታ ዋሱዋ ቀል ጌና።

¹³ አቤት ጎዳዉ፥ ታዉ ቃታ፤ ታ ሞርከት ታ ቦላ ኤህያ መቱዋ በአ፤ ሀይቆፐ ታና አሻ።

¹⁴ ፅዮነ አሳ ግዶን ታኒ ኤቃዳ፥ ነ ጋላታ ኦዳና፤ ነ አቶተን ኡፋይታና።

¹⁵ ካዎተት ባንታ ቦክዳ ኦላን ባንታዉ ኩንድዶሶና፤ ኤንቲ ዎዳ ፅሄይ ኤንታ ቶሁዋ ኦይክስ።

¹⁶ ጎዳይ ባ ፅሎ ፕርዳን ኤረትስ፤ ኢታ አሳይ ባንታ ኢታ ኦሱዋን ኦይከትዶሶና። ሳላህ

¹⁷ ኢታት ዱፎ ባና፤ ፆሳ ዶግያ ካዎተት ኡባይ ኤንታዳ ሀናና።

¹⁸ ማንቆይ ኡባ ዎደ ዶገትድ አተና፤ መቶታንቹዋ ኡፋይሳይ መርናዉ የና።

¹⁹ አቤት ጎዳዉ ደንዳ፤ አስ ፆኖፖ! ካዎተት ነ ስንን ፕርደቶ።

²⁰ አቤት ጎዳዉ ኤንታ ኔኒ ያሽሳ፤ ካዎተት አሰ ግደይሳ ኤሮ። ሳላሀ።