Mazmure 88 - ጌሻ ማፃፋ

ቃማነ ጋላስ ኔኮ ዋሳይስ

እዝራኤላ አድያ ኤማና ማዝሙረ

¹ ጎዳዉ፥ ታና አሽያ ፆሳዉ፥ ታኒ ጋላስ ኔኮ ዋሳይስ፤ ቃማ ነ ስንን ዬካይስ።

² ታ ዎሳይ ነ ስን ጋኮ፤ ነ ሀይይ ታ ዋሱዋ ስኦ።

³ ታ ሸምፖይ መቶ ካልዳ ግሾ፥ ታ ደኦይ ዱፎኮ ማትስ።

⁴ ዱፎ ገልያ አሳራ ታይበታስ፤ ዎልቅ ባይና አስ ግዳስ።

⁵ ታኒ አሀታ ግዶን የገትዳ አሳ መላ፤ ሀይቅድ ዱፎን ዝንእዳ አሳ መላ። ህዛፐ ኔኒ ሀሳዮና አስነ ኔፐ ዱፅዳ አሳ መላ ግዳስ።

⁶ ኔኒ ታና ጪሞን፥ ማ ኦላን የጋዳሳ።

⁷ ነ ሀንቆይ ታና ዴፄስ፤ ነ ሀንቁዋ ቤታይ ታና ሙክስ። ሳላሀ

⁸ ኔኒ ታ ዳቦታ ታፐ ሃሳዳሳ፤ ኤንቲ ታና ሻተታና መላ ኦዳሳ። ታና ተቅዶሶና፤ ከሳ ኤካናዉ ዳንዳእከ።

⁹ ጎዳዉ፥ አዛኖን ታ አይፈይ ተልጁምስ፤ ኡባ ጋላስ ታኒ ኔኮ ዋሳይስ፤ ታ ኩሽያ ኔኮ ምጫስ።

¹⁰ ሀይቅዳይሳታስ ነ ማላልስያባ ኦዬ? ኤንቲ ደንድድ ነና ጋላቶናዬ? ሳላሀ

¹¹ መርና ነ ሲቆይ ዱፎን፥ ነ አማነተይ ዮ በሳን ኦደትዬ?

¹² ነ ማላልስያ ኦሶይ ማን፥ ነ ፅሎተይ ዶገትዳ ቢታን ኤረትዬ?

¹³ ጎዳዉ፥ ታ ኔኮ ዋሳይስ፤ ዎንታ ዎንታ ታ ዎሳይ ነ ስን ጋኬስ።

¹⁴ ጎዳዉ፥ ነ ታና አይስ እፃይ? ነ ሶምኡዋ ታፐ አይስ ገንይ?

¹⁵ ናአተፈ ዶማዳ ታኒ ኡንኤታስ፤ ሀይቆስ ማታስ፤ ነ ታና ዳጋንን ኡፋይስ ቃንፃስ።

¹⁶ ነ ሱልያ ሀንቆይ ታ ቦላ ኡሽስ፤ ነ ዳጋንይ ታና ይስስ።

¹⁷ ኤንቲ ጋላስ ኩመ ድኦዳ ታና ተቅዶሶና፤ እስፈ ሺቅድ ታና ኦይክዶሶና።

¹⁸ ታ ላገታነ ታዉ ማታ አሳታ ታፐ ሃሳዳሳ፤ ታዉ ዳቦይ ማ ፃላላ።