Mazmure 86 - ጌሻ ማፃፋ

ፆሳ ሲቆይ ግታ

ዳዊታ ዎሳ

¹ ጎዳዉ፥ ታኒ ማንቆነ መቶታንቾ ግድያ ግሾ፥ ታ ዎሳ ስአዳ ታና አላ።

² ታ ነዉ ዱማትዳ አስ ግድያ ግሾ፥ ታና ደኦን ዎ፤ ነናን አማነትያ ታና፥ ነ አይልያ አሻ፤ ኔኒ ታ ፆሳ።

³ ጎዳዉ፥ ጋላስ ኩመ ታ ኔኮ ዋስያ ግሾ፥ ታዉ ቃታ።

⁴ ጎዳዉ፥ ታ ሸምፖይ ኔኮ ዋስያ ግሾ፥ ታና፥ ነ አይልያ ኡፋይሳ።

⁵ ጎዳዉ፥ ኔኒ ኬሀነ አቶ ገይሳ፤ ነና ፄግያ ኡባስ ነ ሲቆይ ዳሮ።

⁶ አቤት ጎዳዉ፥ ታ ዎሳ ስአ፤ ታ ዋሱዋ ሀይዛ።

⁷ ነ ታ ዎሳስ ዛሮ እምያ ግሾ፥ ታ መቱዋ ጋላሳን ታ ኔኮ ዋሳና።

⁸ ጎዳዉ፥ ፆሳታ ግዶን ነ መል ባዋ፤ ነ ኦሱዋራ ግነይ ባዋ።

⁹ ጎዳዉ፥ ኔኒ መዳ ካዎተት ይድ፥ ነ ስንን ጉልባታና፤ ነ ሱን ቦንቻና።

¹⁰ ኔኒ ግታ፤ ነ ማላልስያ ኦሶ ኦያ ግሾ ፆሲ ነ ፃላላ።

¹¹ ጎዳዉ፥ ታ ነ ቱማን ሄመታና መላ፥ ታና ነ ኦግያ ታማርሳ። ታኒ ነ ሱንስ ያያና መላ፥ ታዉ እስ ዎዛና እማ።

¹² ጎዳዉ ታ ፆሳዉ፥ ታኒ ነና ታ ኩመ ዎዛናን ጋላታና፤ ነ ሱን መርናዉ ቦንቻና።

¹³ ነ ሲቆይ ታዉ ዳሮ፤ ታና ዱፎፐ አሻዳሳ።

¹⁴ ፆሳዉ፥ ኦቶራንቾት ታ ቦላ ደንድዶሶና፤ ኢታ አሳታ ጩጋይ ታና ዎናዉ ኮዬስ፤ ኤንቲ ነና ዉዳ ጎኮና።

¹⁵ ሽን አቤት ጎዳዉ፥ ኔኒ ቃትያነ ማርያ ፆሰ። ኔኒ ሀንቀታናዉ ጋምኣሳ፤ ሲቆይነ አማነተ ዳርዳይሳ።

¹⁶ ታኮ ስማዳ ታዉ ቃታ፤ ነ አይልያስ ዎልቃ እማ፤ ነ ጋንደ ናኣ ታና አሻ።

¹⁷ ጎዳዉ፥ ነ ኬሀተ ማላታ ታና በሳ፤ ነ ታና ማደይሳነ ምንይሳ በእያ ዎደ፥ ታ ሞርከት ዬላታና።