Mazmure 85 - ጌሻ ማፃፋ

ኑና ዛራዳ ደን

ዛማረታ ሀላቃስ ፃፈትዳ ቆረ ናይታ ማዝሙረ

¹ ጎዳዉ፥ ኔኒ ነ ቢታስ ኬሀዳሳ፤ ያይቆባ ኮቻ ድኦፐ ጉየ ዛራዳሳ።

² ነ አሳ ናቁዋ አቶ ጋዳሳ፤ ኤንታ ናጋራ ኡባ ካማዳሳ። ሳላሀ

³ ነ ይሉዋ አጋዳሳ፤ ሱልያ ነ ሀንቁዋፈ ስማዳሳ።

⁴ አቤት ኑና አሽያ ፆሳዉ፥ ኑና ጉየ ዛራ፤ ኑ ቦላ ላንጭዳይሳ አጋ።

⁵ ኔኒ ኑ ቦላ መርናዉ ሸነታዬ? ነ ሀንቁዋፈ ስምክዬ?

⁶ ኑኒ ነናን ኡፋይታና መላ፥ ኑና ዛራዳ ኦራክዬ?

⁷ አቤት ጎዳዉ፥ ነ መርና ሲቁዋ ኑና በሳ፤ ኑና አሻ።

⁸ ጎዳ ፆሳይ ኦድያባ ታኒ ስአና፤ ኤንቲ ባንታ ኤያ ኦግያኮ ስሞና እፅኮ፥ እ ባ ጌሻ ደርያስ ሳሮተ ኦዴስ።

⁹ እያ ቦንቾይ ኑ ቢታን ዳና መላ፥ ፆሳ ያየይሳታ አሻናዉ እ ማታን ደኤስ።

¹⁰ ሲቆይነ ቱማተ ጋሄትዶሶና፤ ፅሎተነ ሳሮተ እድመትዶሶና።

¹¹ ቱማተ ሳኣፐ ፑደ ከዬስ፤ ፅሎተ ሳሎፐ ዱገ ፄሌስ።

¹² ፆሳይ ሎኦባ ኑስ እማና፤ ኑ ቢታይ ዳሮ ካ አይፋና።

¹³ ፅሎተ ጎዳ ስንን ሄመታና፤ እያ ኦግያ ጊግሳና።