Mazmure 83 - ጌሻ ማፃፋ

ፆሳዉ ስእ ጎፓ

አሳፋ ማዝሙረ

¹ አቤት ፆሳዉ፥ ስእ ጎፓ፤ ፆሳዉ ስርጵ ጎፓ፤ ሙሞፓ።

² ነ ሞርከት ነ ቦላ ደንደይሳ፥ ነና እፀይሳት ነ ቦላ ማካለይሳ በአ።

³ ኤንቲ ነ አሳ ቦላ ጌማን ዱላቶሶና፤ ኔኒ ዶስያ አሳ ቦላ ማቀቶሶና።

⁴ “ሃይተ፥ ኤንታ ካዎተ ይሶስ፤ እስራኤለ ጌተትያ ሱንይ መርናዉ ሀሳየቶና መላ ኦስ” ያጎሶና።

⁵ ኤንቲ እስ ዎዛናን ግድድ ማቀቶሶና፤ ነ ቦላ ደንዳናዉ ጫቅዶሶና።

⁶ ኤንቲ፥ ኤዶመነ እስማኤላ አሳ፥ ሞአበነ አጋር ኮቻታ፤

⁷ ገባላነ አሞነ አሳ፥ አማለቃ፥ ፍልስፄመነ ፅሮሳ አሳ።

⁸ አሶረት ኤንታራ ጋሄትዶሶና፤ አሶረት ሎፀ አሳስ ዎልቃማ ማዶ ግድዶሶና። ሳላሀ

⁹ ኔኒ፥ ምድያመ፥ ስሳራነ ያብና ቦላ ቅሶና ሻፋን ኦዳይሳዳ ኤንታ ቦላ ኦ።

¹⁰ ኤንቲ ኤንዶራን ይዶሶና፤ ኤንታ አሀይ ደንባን ዎቅድ አትስ።

¹¹ ኤንታ ሀላቃታ ኦሬባነ ዘባዳ ኦ፤ ኤንታ ሃረይሳታ ዛብሄላነ ስልማናዳ ይሳ።

¹² ኤንቲ፥ “ኑኒ ፆሳ አሳ ላታ ኑስ ቡዞ ኦና” ያግዶሶና።

¹³ ታ ፆሳዉ፥ ኤንታ ባናዳ ላላ፤ ጫርኮይ ኤፍያ ሱላዳ ኦ።

¹⁴ ታም ዎራ መይሳዳ፥ ታማ ላጮይ ደርያ ፁገይሳዳ፥

¹⁵ ነ ኡሹዋን ኤንታ የደ፤ ነ ጎትያን ኤንታ ዳጋን።

¹⁶ ጎዳዉ፥ አሳይ ነ ሱን ኮያና መላ፥ ኤንታ ሶምኡዋ ዬላ ማይዛ።

¹⁷ ኤንቲ መርናዉ ዬላቶ፤ ህርጎ፤ ካዉይድ ዮ።

¹⁸ ነ ሱንይ ጎዳ ግድዳ ነ ፃላል፥ ኡባፈ ቃ ፆሳይ፥ ሳአ ኡባ ሃረይሳ ኤንቲ ኤሮ።