Mazmure 81 - ጌሻ ማፃፋ

ሻቃራ ባኣለ ዎደ የፅያ ሳባ

ዛማረታ ሀላቃስ ፃፈትዳ ሱሱልኤን የፀትያ አሳፋ ማዝሙረ

¹ ኑስ ዎልቃ ግድዳ ፆሳስ ኡፋይሳን የፅተ፤ ያይቆባ ፆሳስ እልልተ።

² የ ዶምተ፤ ካራቦ ባቅተ፤ ዲንነ ማስንቆን የፅተ።

³ አጌን ፄርያ ዎደ፥ ቃስ ማ ኡትያ ዎደ፥ ባኣለ ጋላሳን ሞይዘ ፑንተ።

⁴ ሄስ እስራኤለ ቢታን ህገ፤ ያይቆባ ፆሳይ እምዳ ዎጋ።

⁵ እ ግብፀ ቢታ ሾጭዳ ዎደ፥ ዮሰፋ ኮቻስ ሀ ዎጋ አዋጅስ። ኤሮና ዶናን ሀይሳዳ ያግሽን ስአስ፤

⁶ “ህንተ ሀሽያ ቶሆፐ፥ ህንተ ኩሽያ ኬሸፐ ሸምፕሳስ።

⁷ ህንተ መቱዋን ታና ፄግደታ፤ ታ ህንተና አሻስ፤ ታኒ ደችያ ሻራ ግዶፈ ህንተና አላስ፤ ማርባ ፑልቱዋ ማታን ታ ህንተና ፓጫስ።” ሳላሀ

⁸ “ታ አሳዉ፥ ታ ህንተና ሴረይሳ ስእተ፤ እስራኤለ አሳዉ ህንተ ታና ስእኮ አይቤ?

⁹ ህንተ ግዶን አላጋ ፆሲ ደኦፖ፤ ሀራ ፆሰ ጎይኖፍተ።

¹⁰ ግብፀ ቢታፈ ህንተና ከስዳ፥ ታኒ ጎዳ ህንተ ፆሳ፤ ነ ዶና ሎይዳ ሀካንካ፤ ታኒ እያን ኩንና።

¹¹ “ሽን ታ አሳይ ታና ስእቦኮና፤ እስራኤለይ ታዉ ኪተትቤና።

¹² ሄሳ ግሾ፥ ኤንቲ ባንታ ቆፋ ካላና መላ፥ ስሞና ኤንታ ዎዛናስ አዳ እማስ።

¹³ ታ አሳይ ታና ስእዳኮ አይበ፤ እስራኤለይ ታ ኦግያ ካልዳኮ አይብ ደእ፤

¹⁴ ታኒ ኤንታ ሞርከታ ኤሶን ፆናናሽን፤ ኤንታ እፀይሳታ ቦላ ታ ኩሽያ ደንናሽን።

¹⁵ ጎዳ እፀይሳት እያ ስንን ሆካና፤ ኤንታ ሴራይ መርናዉ ግዳና።

¹⁶ ታኒ ህንተና ሎኦ ግስተ ሙዛና፤ ዛላፈ ከይያ ኤሳን ህንተና ካልሳና።”