Mazmure 80 - ጌሻ ማፃፋ

ፆሳዉ፥ ኑና ኦራ

“ጪሻ ጩ” ጌተትያ ማርካተ ማዝሙረ

¹ ዮሰፋ ዶርሳ ዉደዳ ካለይሶ፥ እስራኤለ ሄንንቹዋዉ ኑና ስአ። ክሩበታ ቦላ ደእያ አራታን ኡትዳይሶ፥ ነ ፖኡዋን ቆንጫ።

² ኤፍሬማ፥ ብንያመነ ምናሰ ስንን በንታ፤ ነ ዎልቃ ቃዳ ኑና አሻናዉ ሃያ።

³ ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።

⁴ ኡባፈ ዎልቃማ ጎዳዉ ፆሳዉ፥ ነ አሳ ዎሳ ቦላ አዉደ ጋካናዉ ሸነታይ?

⁵ ኔኒ ኤንታ ዬሆ ካዳ ሙዛዳሳ፤ አፉ ሃዳ ኡሻዳሳ።

⁶ ኑ ሾሮት ኑ ቢታ ኤካናዉ ባንታ ግዶን ኦያና መላ ኦዳሳ፤ ኑ ሞርከት ኑ ቦላ ሚጭዶሶና።

⁷ ኡባፈ ዎልቃማ ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።

⁸ ግብፀፈ ዎይነ ኤሀዳሳ፤ ካዎተታ የደዳ፥ ኤንታ ቢታን እያ ቶካዳሳ።

⁹ ኔኒ ቢታ ቄፃዳሳ፤ እ ፃጶ የድድ፥ ዳይድ ቢታ ጋክስ።

¹⁰ ደረት እያ ኩያን፥ ልባኖሰ ዝጋት እያ ታሽያን ካመትዶሶና።

¹¹ ባ ታሸታ መደትራነ አባ ጋካናዉ፥ ባ ፄራታ ኤፍራፂሳ ሻፋ ጋካናዉ የድስ።

¹² ያትን፥ ኦገራ አያ ኡባይ እያ አይፍያ ዱናዳ፥ እያ ዩሾን ደእያ ግምብያ አይስ ላላዲ?

¹³ ባዞ ጉዱንይ እያ ቦላ ጉፕስ፤ ዎራ ዶአት እያ ምዶሶና።

¹⁴ ኡባፈ ዎልቃማ ፆሳዉ ኑኮ ስማ፤ ሳሎራ ዱገ ፄላዳ፤ ሀ ዎይንያ ናጋ።

¹⁵ እ ነ ኡሻቻ ኩሸይ ቶክዳ ፃጶ፤ ኔኒ ነዉ ድችዳ ፑተ።

¹⁶ ነ ሞርከት ነ ዎይንያ ቃንፅዶሶና፤ ታማን ፁግዶሶና፤ ኤንታ ነ ሀንቁዋን ይሳ።

¹⁷ ነ ኩሸይ ነ ኡሻቻን ደእያ አሳ፥ ኔኒ ነዉ ድችዳ አሳ ናጎ።

¹⁸ ህዛ ኑኒ ጉየ ስሞኮ፤ ኑና ፓፃ ዎ፤ ነ ሱን ጋላታና።

¹⁹ ኡባፈ ዎልቃማ ጎዳዉ ፆሳዉ፥ ኑና ዛራ፤ ኑ አታናዳ ነ ሶምኡዋ ኑስ ፖእሳ።