Mazmure 79 - ጌሻ ማፃፋ

ጎዳዉ፥ አዉደ ጋካናሴ?

አሳፋ ማዝሙረ

¹ ፆሳዉ፥ አይሁደ ግዶና አሳይ፥ ነ ቢታ ቦላ ደንድዶሶና፤ ነ ጌሻ ኬ ቱንስዶሶና፤ የሩሳላመ ላልዶሶና።

² ነ አይለታ አሀ ሳሎ ካፎታስ፥ ነ ጌሻታ አሹዋ ሳአ ዶአታስ እምዶሶና።

³ ኤንታ ሱ የሩሳላመ ዩሾን ሃዳ ጉስዶሶና፤ ኤንታ አሀ ሞግያ አስ ይስ።

⁴ ኑ ሾሮታስ ኑኒ ሚቻስ፥ ኑ ሄራን ደእያ አሳስ ቀልቅሰስ አትዳ።

⁵ ጎዳዉ፥ ሄስ አዉደ ጋካናዉ ሀናኔ? ኔኒ ኑ ቦላ መርናዉ ሀንቀታዲ? ነ ሀንቆይ ታማዳ ኤፅሸ ዳነዬ?

⁶ ነና ኤሮና ደረታ ቦላ፥ ነ ሱን ፄጎና ካዎተታ ቦላ ነ ሀንቁዋ ዛራ።

⁷ ሄስካ ኤንቲ ያይቆባ ምዳ ግሾነ ኤንቲ ደእያ በሳ ይስዳ ግሾሳ።

⁸ ኑኒ ዳሮ መቶትዳ ግሾ፥ ኑ ማይዛታ ኢታተ ኑ ቦላ ታይቦፓ፤ ኤሶን ነ ማሮታ ኑስ ኪታ።

⁹ አቤት ኑና አሽያ ፆሳዉ፥ ነ ቦንቾ ሱን ግሾ ኑና ማዳ። ነ ሱን ግሾ ኑና አሻ፤ ኑ ናጋራ አቶ ጋ።

¹⁰ ደረት፥ “ኤንታ ፆሳይ አዉን ደኢ?” አይስ ጋኔ? ነ አይለታ ሱ ኤንቲ ጉስዳ ግሾ፤ ኔኒ ሀሎ ከየይሳ ኑ ፄልሽን፥ ኤንታ ግዶን ቆንጭሳ።

¹¹ ቃሾ አሳ ኦለይ ነ ስን ጋኮ፤ ሀይቆ ፕርደትዳይሳታ ነ ዎልቃ ግታተን አሻ።

¹² ጎዳዉ፥ ኑ ሾሮት ነና ቶችዳ ግሾ፥ ላፑን ኩሸ ሀሎ ከያዳ ኤንታ ክኦን እድን።

¹³ ሄ ዎደ ኑኒ ነ አሳይ፥ ነ ዶርሳት፥ መርናዉ ነና ጋላታና። የለተፈ የለተ ጋካናዉ፥ ነ ፔሻ ኦዳና።