Mazmure 78 - ጌሻ ማፃፋ

ካልያ የለተስ ኦዳ

አሳፍ አኬካን ፃፍዳ ግንፆ

¹ ታ አሳዉ፥ ታ ትምርትያ ስእተ፤ ታ ዶናፐ ከይያ ቃላ ሀይዝድ ስእተ።

² ታኒ ታ ዶና ሌምሶን ዶያና፤ በንፐ ጌምዳ ፁራ ቆንጭሳና።

³ ኑኒ ስእዳይሳነ ኤርዳይሳ፥ ኑ አዋት ኑስ ኦድዳይሳታ ኦዳና።

⁴ ሄሳታ ኑኒ ኤንታ ናይታፐ ቆሶኮ፤ ጎዳስ በሲያ ጋላታ፥ እያ ዎልቃነ ማላልስያ እያ ኦሱዋ፥ ያና የለታስ ኦዳና።

⁵ እ ያይቆባ ዘረስ ኪታ፥ እስራኤለ አሳስ ህግያ እሚስ። ካሰ ኑ አዋት ባንታ ናይታ ሄ ህግያ ታማርሳና መላ ኪትስ።

⁶ ካልያ የለታይ ሄሳ ኤራና መላ፥ ኤንታ ናይትካ ባንታ ናይታስ ቡሮ የለታና ናይታስ ኤርሳናሳ።

⁷ ሄ ዎደ ኤንቲ ፆሳን አማነተና፤ እ ኦዳባ ባሎኮና፤ እያ ኪታ ናጋና።

⁸ ኤንቲ ካሰ ባንታ አዋታዳ ዎዛና ሙመ የለታ፥ ጌላነ አማነቶና የለታ፥ ፆሳን ምንድ ኤቀና የለታ ግዶኮና።

⁹ ኤፍሬማ አሳይ ዶንገ ዳንጭኮካ፥ ኦላ ጋላስ ጉየ ስምዶሶና።

¹⁰ ኤንቲ ፆሳ ጫቁዋ ናግቦኮና፤ እያ ህግያን ሄመቶና እፅዶሶና።

¹¹ ኤንቲ እ ኦዳ ኦሱዋነ እ በስዳ ማላታ ዶግዶሶና።

¹² እ ኤንታ አዋታ ስንን ግብፀ ቢታን፥ ፆኣነ ደንባን ማላታ ኦስ።

¹³ አባ ሻክድ ግዶራ ኤንታ ፕንስ፤ ሃ ሻክድ ያን ሀን ጎዳዳ ኤስስ።

¹⁴ እ ኤንታ ጋላስ ሻራን፥ ቃማ ታማ ፖኦን ካለስ።

¹⁵ እ መላ ቢታን ዛላ ጳልቅድ፥ አባዳ ዳሮ ሃ ኤንታ ኡሽስ።

¹⁶ ዛላፈ ሃ ፑልትስድ፥ ሻፋ ሃዳ ጎግስስ።

¹⁷ ሽን ኤንቲ እያ ቦላ ናጋራ ጉጅድ ኦዶሶና፤ ኡባፈ ቃ ፆሳ ቦላ መላ ቢታን ማካልዶሶና።

¹⁸ ባንታ አሞትዳ ካ ኦይችድ፥ ፆሳ ኤርሸ ፓጭዶሶና።

¹⁹ ኤንቲ ፆሳ ቦላ ሀይሳዳ ያግድ ሃሳይዶሶና፤ “መላ ቢታን ፆሳይ ኑስ ካ ጊግሳናዉ ዳንዳኢ?

²⁰ ዛላ ሾጭን ፑልቶይ ከይድ ሻፋ ሃ ጎግስ፤ ሽን እ ኑስ ካ እማናዉ ዳንዳኢ? ዎይኮ ባ አሳስ አሾ እማናዉ ዳንዳኢ?” ያግዶሶና።

²¹ ጎዳይ ሄሳ ስእዳ ዎደ ዳሮ ሀንቀትስ፤ ያይቆባ ኮቻታ ቦላ ታም ኤፅስ፤ እስራኤለ ቦላ እያ ሀንቆይ ዳርስ።

²² ሄስካ ኤንቲ ፆሳን አማንቦኮና፤ ዎይኮ እያ አሹዋን አማነትቦኮና።

²³ ግዶሽን፥ ቃ ሳሉዋ ኪትስ፤ ሳሎ ፐንግያ ዶይስ።

²⁴ ኤንታ ሙዛናዉ ማና ቡክስስ፤ ሳሎ ካ ኤንታዉ እሚስ።

²⁵ ኪታንቾታ ካ አሳይ ምስ፤ ፆሳይ ኤንታዉ ምያባ ዳርስድ እሚስ።

²⁶ ዶሎሀ ጫርኮይ ጫርካና መላ ኦስ፤ ባ ዎልቃን ዱገሀ ጫርኩዋ ደንስ።

²⁷ እ አሳስ አሾ ቢታ ከስስ፤ ፓልያ ካፎታ አባ ጋፃ ሻፈዳ ቡክስስ።

²⁸ ኤንቲ ደእያ በሳን፥ ዱንካንያ ዩሾን ዎስስ።

²⁹ ኤንቲ አሞትዳይሳ ኤንታዉ እሚስ፤ ምድ ባንታ ጋንጅያ ጋዶሶና።

³⁰ ሽን ኤንቲ ባንታ አሙዋ አና ደእሽን፥ አሾይ ኤንታ ዶናን ቡሮ ደእሽን፥

³¹ ፆሳ ሀንቆይ ኤንታ ቦላ ዎስ፤ ኤንታ ግዶፈ ዎልቃማ አሳታ ዎስ፤ እስራኤለፐ ናአተታ ክስ።

³² ሄ ኡባይ ሀንንካ ናጋራ ኦሶ አግቦኮና፤ ዳሮ ማላታ ኦንካ አማንቦኮና።

³³ ሄሳ ግሾ፥ እ ኤንታ ጋላሳታ ሀዳ ኦስ፤ ኤንታ ላይታ ዳጋማን ኦንግስ።

³⁴ ፆሳይ ኤንታፈ ባጋ ዎያ ዎደ እያ ኮይዶሶና፥ ባንታ ናጋራ ፓፅድ እያኮ ስምዶሶና።

³⁵ ፆሳይ ኤንታ ዛላ ግደይሳ፥ ኡባፈ ቃ ፆሳይ ኤንታ ዎዘይሳ፥ ግደይሳ ሀሳይዶሶና።

³⁶ ሽን ኤንቲ ባንታ እንፃርሳን ዎርዶትዶሶና፤ ባንታ ዶናን ጭምዶሶና።

³⁷ ኤንታ ዎዛናይ ፆሳን ምንድ ኤቀና፤ እያ ጫቁዋስ አማነቶኮና።

³⁸ ሽን እ ኤንታ ማርስ ኤንታ ናጋራ አቶ ግስ፤ ኤንታ ይስቤና። ዳሮ ዎደ ባ ሀንቁዋ ተቅስ፤ ባ ጋዱዋ ኩመ ኤንታ ቦላ የድቤና።

³⁹ ኤንቲ ሀይቅያ አሾ ግደይሳነ ከይድ ስሞና ሸምፖ ግደይሳ አኬክስ።

⁴⁰ ኤንቲ መላ ቢታን እያ ቦላ አፑን ቶሆ ማካልዶና! መላ ቢታን እያ አፑን ቶሆ ላንጭስዶና!

⁴¹ ኤንቲ ዛር ዛሪድ ፆሳ ፓጭዶሶና፤ እስራኤለ ጌሻ ይሎይዶሶና።

⁴² ኤንታና ሞርከታ ኩሸፐ አሽዳ ጋላሳ፥ ኡንኤያ አሳፐ ዎዝዳ ዎልቃ ዶግዶሶና።

⁴³ እ ግብፀን ኦዳ ማላታ፥ ፆኣነ ደንባን ኦዳ ማላልስያ ኦሱዋ ሀሳይቦኮና።

⁴⁴ ኤንታ ሻፋ ሃታ ሱ ላምስ፤ ሄሳ ግሾ፥ ግብፀ አሳይ ሻፋታፐ ኡያናዉ ዳንዳእቦኮና።

⁴⁵ ኤንታ ዋይስያ ኡዱንፀታነ ኤንታ ቢታ ይስያ ሾታ ኪትስ።

⁴⁶ ዶልዳ ካ ዱጎስ፥ ኤንቲ ዳቡርዳ አይፍያ ቦለስ እሚስ።

⁴⁷ ኤንታ ዎይንያ ሻቻን፥ ኤንታ ባላስያ ጫርኮን ይስስ።

⁴⁸ ኤንታ መሄታ ሻቻን ዎስ፤ ኤንታ ዶርሳታ ዳዳን ዉርስስ።

⁴⁹ ይስያ ኪታንቾ ጩጋራ፥ ባ ሱልያ ሀንቁዋ፥ ይሉዋ፥ እፁዋነ ጋዱዋ ኤንታ ቦላ የድስ።

⁵⁰ ባ ሀንቁዋስ ኦገ ጊግስስ፤ ኤንታ ዮስ አድ እሚስ፤ ኤንታ ሀይቆፐ አሽቤና።

⁵¹ ግብፀ ባይራ ናይታ ኡባ ሾጭስ፤ ካማ ዱንካነን ኮይሮ ናይታ ዎስ፤

⁵² ሽን ባ አሳ ዶርሳዳ ከስስ፤ ዉደዳ መላ ቢታን ሄምስ።

⁵³ እ ኤንታ ሳሮ ካለዳ ግሾ ባብቦኮና፤ ሽን ኤንታ ሞርከታ አባይ ምትስ።

⁵⁴ እ ኤንታ ባ ጌሻ ቢታ፥ ባ ኡሻቻ ኩሸን ፆንድ ኦይክዳ ዙማ ቦላ ኤህስ።

⁵⁵ እ ኤንታ ስንፈ ካዎተታ ጎድስ፤ ኤንታ ቢታ እስራኤለ ኮቻታስ ላታ ኦድ ሻክስ፤ ባ አሳስ ኤንታ ኬ እሚስ።

⁵⁶ ግዶሽን፥ ኡባፈ ቃ ፆሳ ቦላ ማካልዶሶና፤ እያ ፓጭዶሶና፤ እያ ህግያ ኪተትቦኮና።

⁵⁷ ኤንቲ ባንታ አዋታዳ ጌላታነ ምንድ ኤቆና አስ ግድዶሶና፤ ዎበ ቶራዳ ዎራ ዎዶሶና።

⁵⁸ ቃ ጎይኖ በሳታን እያ ይሎይዶሶና፤ ባንታ ኤቃታራ እያ ቃናትስዶሶና።

⁵⁹ ፆሳይ ሄሳ ስእዳ ዎደ ሸነትስ፤ እስራኤለ ኡባ ካስ።

⁶⁰ ሴሎን እ ደእያ ባ በሳ፥ አሳ ግዶን እ ደእያ ባ ዱንካንያ አግስ።

⁶¹ ፆሳ ዎልቃስነ ቦንቹዋስ ማላታ ግድዳ ታቦትያ ሞርከታ ኩሸን አድ እሚስ።

⁶² እ ባ አሳ ቦላ ሸነትስ፤ ኤንታ ማሻስ አድ እሚስ።

⁶³ ናአተት ኡባይ ታማን ሜተትዶሶና፤ ጌላኦት አዝና ገሎና አትዶሶና።

⁶⁴ ኤንታ ካህነት ማሻን ዉርዶሶና፤ ኤንታ ማቸት ዬኮና መላ ድገትዶሶና።

⁶⁵ ጎዳይ ስኮፈ ባርክያ አሳዳ ደንድስ፤ ዎይነ ኡሻ ማይ አዳ አሳዳ ሀንስ።

⁶⁶ እ ባ ሞርከታ ጉየ ዛሪድ ሾጭስ፤ ኤንታ መርናዉ ዬላይስ።

⁶⁷ ዮሰፋ ዱንካንያ ካስ፤ ኤፍሬማ ኮቻ ዶርቤና።

⁶⁸ ሽን ይሁዳ ኮቻነ እ ዶስያ ፅዮነ ደርያ ዶርስ።

⁶⁹ ባ ኬ ሳሎዳ ቁ ኦድ ኬፅስ፤ ሳአዳ መርናዉ ኤስስ።

⁷⁰ ባ አይልያ ዳዊታ ዶርድ፥ ዶርሰ ሄምያ በሳፈ ኤክስ።

⁷¹ ዶርሰ ሄምያ በሳፈ ደንድ፥ ባ አሳ ያይቆባ፥ ባ ላታ እስራኤለ ሄንናዉ ኤህስ።

⁷² ዳዊቲ ኤንታ ሱረ ዎዛናን ሄምስ፤ ባ ጭንጫተን ካለስ።