Mazmure 75 - ጌሻ ማፃፋ

ፆሳይ ሱረ ፕርዳና

አሳፍ ዛማረታ ሀላቃስ፥ “ይሶፋ” ጌተትያ ዲ ጩን የፅዳ ማዝሙረ

¹ አቤት ፆሳዉ፥ ነዉ ጋላታ እሞስ፤ ነ ሱንይ ማታ ግድያ ግሾ ነና ጋላቶስ፤ አሳይ ነ ማላልስያ ኦሱዋ ኦዶሶና።

² ፆሳይ ሀይሳዳ ያጌስ፤ “ታኒ ፕርዳ እምያ ዎደ ዶራስ፤ ሱረ ፕርደይ ታና።

³ ቢታይነ እያን ደእያ ኡባይ ቃፅኮካ፥ እያ ቱሳ ምን ኤሰይ ታና። ሳላሀ

⁴ ታኒ ኦቶራንቾታ፥ ‘ኦቶርቶፍተ’፤ ኢታታ፥ ‘ህንተ ካጭያ በሶፍተ።’

⁵ ‘ህንተ ካጭያ ሳሎ ደንፍተ፤ ቆ ቃድ ሃሳዮፕተ’ ” ያጋና።

⁶ ቦንቾይ ዶሎሀፐ ዎይኮ ዉሎሀፐ ዎይኮ መላ ቢታፈ ዬና።

⁷ ሽን ሱረ ፕርደይ ፆሳ፤ እ እሱዋ ቦላ ፕርዴስ፤ ሀንኩዋ ሻትንስ።

⁸ ፆሳ ኩሸን እስ ዋንጭ ደኤስ፤ ሄ ዋንጫይ ፆሳ ሀንቆ ዎይነ ኡሻን ኩምድ ኡትስ። እ ሄ ኡሻፈ ትግን፥ ሳአን ደእያ ኢታ አሳት ሄሳ ኡያና፤ ኤንቲ ኦርጩዋ አሾና ፂጵድ ኡያና።

⁹ ሽን ታኒ ያይቆባ ፆሳባ ኦዳና፤ እያ መርናዉ ሳባና።

¹⁰ እ፥ ኢታ አሳታ ካጭያ መንና፤ ሽን ፅሎታ ካጨይ ቁ ቁ ጋና።