Mazmure 74 - ጌሻ ማፃፋ

ፆሳዉ ነ ግሾ ሞተታ

አኬካን ፃፍዳ ግንፆ

¹ ፆሳዉ ኔኒ ኑና አይስ መርናዉ አጋዲ? ነ ቆሩዋን ደእያ ነ ዶርሳታ ቦላ ነ ሀንቆይ አይስ ኤፅዴ?

² ኔኒ በን ዶርዳ አሳ፥ ነዉ ቡዞ ኦዳ ዎዝዳ ኮቻታ ሀሳያ፤ ኔኒ ደእዳ ፅዮነ ዙማ ቆፓ።

³ ላለትዳ ነ ኬ ያዳ ፄላ፤ ሞርከት ያን ደእያባ ኡባ ይስዶሶና።

⁴ ነ ሞርከት ነ ኬን፥ “ኑ ፆንዳ” ያግድ ገሬርዶሶና። ፆኖ ማላታ ግድዳ ባንታ ባንድራ ኤስዶሶና።

⁵ ኤንቲ ም ቃንፃናዉ ዎራ ግዶን ኤቅድ፥ ባንታ ካልታ ደንዳ አሳታ ዳኖሶና።

⁶ ኤንቲ ኩሸ ሂላን አሌቅዳ ኦሶታ ኡባ፥ ባንታ ካልታንነ ናርቃን መንረዶሶና።

⁷ ነ ኬ ታማን ፁግድ ይስዶሶና፤ ነ ሱንይ ፄገትያ በሳ ቱንስዶሶና።

⁸ ባንታ ዎዛናን፥ “ኑ ኩመ ይሳና” ያግዶሶና፤ ቢታን ደእያ አስ ፆሰ ጎይንያ በሳታ ታማን ፁግዶሶና።

⁹ ሄ ዎደ ማላት ኑስ እመተና፤ ናበይካ ዴና። ሄስ አዉደ ጋካናዉ ጋምአነኮ፥ ኤርያ አስ ኑ ግዶን ባዋ።

¹⁰ ፆሳዉ፥ ነ ሞርከት አዉደ ጋካናዉ፥ ነ ቦላ ቀልቅሳኔ? ኤንቲ ነ ሱን መርናዉ ጫያኔ?

¹¹ ነ ኡሻቻ ኩሽያ አይስ ሺሻ ኤካይ? ነ ኡሻቻ ኩሽያ ነ አፍላ ግዶፈ ከሳዳ ኤንታ ይሳ።

¹² ግዶሽን፥ አቤት ፆሳዉ፥ ኔኒ በንፐ ታ ካዋ፤ ነ ዳሮ ዎደ አሻዳሳ።

¹³ ነ ግታ ዎልቃን አባ ሻካዳሳ፤ እያ ግዶን ደእያ ዶኣ ሁጰታ ዶንጫዳሳ።

¹⁴ ሌዋታነ ጌተትያ ዳውያ ሁጰታ ዶንጫዳ፥ እያ አሹዋ ባዞን ደእያ መተታስ ካ ኦዳ እምዳይ ነና።

¹⁵ ኔኒ ፑልቶታ ዶያ የዳዳሳ፤ ኡባ ዎደ ጎግያ ሻፋታ መልሳዳሳ።

¹⁶ ጋላሳይ ነባ፤ ቃማይካ ነባ፤ አዋነ አጌና ኤንታ በሳን ዎዳይ ነና።

¹⁷ ቢታስ ዛዋ ዎዳይ፥ ባልጎነ ቦነ መዳይ ነና።

¹⁸ አቤት ጎዳዉ፥ ነ ሞርከት ነና ዋት ቀልቅስዳኮ፥ ኤያ አሳት ነ ሱን ዋት ጫይዳኮ ሀሳያ።

¹⁹ ነ ሆልያ ሸምፑዋ ዶኣስ አዳ እሞፋ፤ መቶታንቾታ መርናዉ ዶጎፓ።

²⁰ ኑ ቢታን ደእያ ማ በሲ ኡባይ ማካላንቾታን ኩምዳ ግሾ፥ ነ ኑስ ጫቅዳ ጫቁዋ ቆፓ።

²¹ ቆሄትዳይሳታ ዬላዮፓ፤ ማንቆትነ መቶታንቾት ነ ሱን ጋላቶ።

²² አቤት ፆሳዉ፥ ደንዳ፤ ሞተታ፤ ጋላስ ኩመ ኤያት ነና ቀልቅሰይሳ ሀሳያ።

²³ ነ ሞርከት ነ ቦላ ዋስያ ዋሱዋነ ነና እፀይሳት ጬቀትያ ጬቁዋ አኬካ።