Mazmure 7 - ጌሻ ማፃፋ

መቶ ዎደ ፅሎ አሳ ዎሳ

ብንያመ ኮቻ ኩዛባ ዳዊታ ጎዳስ የፅዳ ማዝሙረ

¹ አቤት ጎዳዉ ታ ፆሳዉ፥ ታ ነናን ቆሰታይስ፤ ታና የደያ ኡባፈ ታና አሻ።

² ኔኒ ታና አሾናባ ግድያኮ፥ ኤንቲ ታና ጋሞዳ ዛዛና፤ አሽያ አስ ባይና መንረናሽን።

³ አቤት ጎዳዉ ታ ፆሳዉ፥ ታ ሀይሳ መላባ ኦዳባ ግድኮ፥ ታኒ አሰ ናቅዳባ ግድኮ፥

⁴ ታ ላገታስ ሎኦ ግሾ ኢታ ዛርዳባ ግድኮ፥ ጋሶይ ባይና ታ ሞርክያ ቦንቅዳባ ግድኮ፥

⁵ ታ ሞርከይ ታና የደድ ኦይኮ፤ ታና ሳአን የግድ የ፤ ታና ባናን ጎንዶርስድ ካዉሾ። ሳላህ

⁶ አቤት ጎዳዉ፥ ነ ሀንቁዋን ደንዳዳ፥ ኤፅያ ታ ሞርከታ ሀንቁዋ ቦላ ኤቃ፤ ታ ፆሳዉ፥ ታ ግሾ ባርካ፤ ኔኒ ፅሎ ፕርዳ ኮያሳ።

⁷ አሳይ ነ ዩሾን ሺቆ፤ ኔኒ ኤንታፈ ቦላራ ሃራ።

⁸ ጎዳይ ካዎተታ ቦላ ፕርዴስ፤ አቤት ጎዳዉ፥ ታ ፅሎተዳነ ታ ሱረተዳ ፕርዳ።

⁹ ቆፋነ ዎዛና ሻካዳ ኤርያ ፅሎ ፆሳዉ፥ ኢታታ ጌላ ሀኖታ ኔኒ ተቃ፤ ሽን ፅሉዋ ሳሮን ናጋ።

¹⁰ ዎዛና ሱረታ አሽያ፥ ፆሳይ ታዉ ጎንዳለ።

¹¹ ፆሳይ ፅሎ ፕርደይሳ፤ እ ኡባ ዎደ ኢታታ ቦላ ሀንቀትያ ፆሳ።

¹² ኢታት ባንታ ኢታተፈ ስሞና እፅኮ፥ ፆሳይ ባ ማሻ ሌፈስ፤ ባ ዶንግያ ጊግሴስ።

¹³ እ ባ ዎያ ኦላ ሚሸታ ጊግሴስ፤ ላፅያ ባ ዶንገ ቶራ ፕቴስ።

¹⁴ ኢታት ቆሆ ቃንትድ፥ ገነ ዎደፅድ፥ ዎርዶ የሎሶና።

¹⁵ ሀራ አሳስ ኦላ ቦክዳ አስ ባ ቦክዳ ኦላን ባዉ ኩንዴስ።

¹⁶ እያ ገነይ እያ ሁጰን ስሜስ። እያ ጌላተይ እያ ሜስ።

¹⁷ እያ ፅሎተ ግሾ ታኒ ጎዳ ሳባና፤ ኡባፈ ቃ ጎዳ ሱንስ ታኒ ጋላታ ማዝሙረ የፃና።