Mazmure 68 - ጌሻ ማፃፋ

ፆሳይ ባ ሞርከታ ላላና

ዛማረታ ሀላቃስ የፀትዳ ዳዊታ ማዝሙረ

¹ ፆሳይ ደንዶ፤ እያ ሞርከት ላለቶ፤ እያ እፀይሳት እያ ስንፈ ባቃቶ።

² ጩያይ ጫርኮራ ደንድድ ይስያ መላ፥ ሙቃድ ታማን ትልኤይሳዳ፥ ኢታት ፆሳ ስንፈ ዮ።

³ ሽን ፅሎት ሀሹ ጎ፤ ፆሳ ስንን ኡፋይቶ፤ ኡፋይሳን እልሎ።

⁴ ፆሳስ የፅተ፤ እያ ሱን ሳቢተ፤ ሻራን በይሳስ ኦገ ከስተ፤ እያ ሱንይ ጎዳ፤ እያ ስንን ኡፋይትተ።

⁵ ፆሳይ ባ ደእያ ጌሻ በሳን፥ ይኦታስ አዋ፤ አምኤታስ ዳይና።

⁶ ፆሳይ ብዛታስ ሶ አስ እሜስ፤ ቃሾ ኬን ደኤይሳታ ብርሽድ፥ ዱረተን ዎስ፤ ሽን ማካላንቾት ቃቃ ቢታን ደኦሶና።

⁷ አቤት ፆሳዉ፥ ኔኒ ነ አሳ ካለዳ ዎደ፥ ነ ኤንታራ መላ ቢታ ካንዳ ዎደ፥ ሳላሀ

⁸ ሲና ፆሳ ዩሳንነ፥ እስራኤለ ፆሳ ቆንጨን ቢታይ ቃፅስ፤ ሳሎይ እራ እሚስ።

⁹ አቤት ፆሳዉ ኔኒ እራ ዳርሳዳ ቡክሳዳሳ፤ ላድዳ ቢታ ዛራዳ ኦራሳ።

¹⁰ ነ አሳይ ያን ዱሱ ኦይክስ፤ አቤት ፆሳዉ፥ ነ ኬሀተን ማንቆታስ ኮሽያባ ጊግሳዳ እማዳሳ።

¹¹ ጎዳይ ኪትስ፤ ዳሮ ማጫሳት ሄ ኪታ ማርካትዶሶና።

¹² ካዎትነ ኤንታ ኦላንቾት ባቃትድ ጉየ ስምዶሶና፤ ሶን አትዳ ማጫሳት ድኦ ሻከትዶሶና።

¹³ ጶልያ ዎርቃ ቀፈራ ደእያ፥ ብራፐ መትዳ ሆለ ምስለ ድእድ ደምያ ዎደ ህንተ ዶርሳ ከለን አይስ ዝንእደት?

¹⁴ ኡባ ዳንዳእያ ፆሳይ ካዎታ ላልዳ ዎደ፥ ፃልሞና ዙማ ቦላ ሻቻ ቡክስስ።

¹⁵ ባሳነ ዙማዉ፥ ዳሮ ፄር ደእያ ባሳነ ዙማዉ፥

¹⁶ ዳሮ ፄራት ደእያ ዙማቶ፥ ፆሳይ ዶርዳ ዙማ ህንተ አይስ ቃናትድ ፄሌቲ? ጎዳይ እያን መርናዉ ዳና።

¹⁷ ፆሳ ኦላ ፓራ ጋረት ታሙ ሙኩሉ ቶሆ ታሙ ሙኩላን ታይበቴስ፤ ጎዳይ ሲና ዙማፐ ባ ጌሻ በሳ ይስ።

¹⁸ ድኤትዳ ዳሮታ ኤክድ፥ ቃ ከይስ፤ አሳፐ፥ ሀር አቶሽን ማካላንቾታፐ እሞ ኤክስ፤ ጎዳይ ፆሳይ ያን ዳና።

¹⁹ ጋላስ ጋላስ ኑ ቶሁዋ ቶክያ ጎዳይ ጋላተቶ፤ ፆሳይ ኑና አሸይሳ። ሳላሀ

²⁰ ኑ ፆሳይ ኑና አሽያ ፆሳ ግደኔ? ሀይቆፐ አሽያ ፆሳይ እያ።

²¹ ፆሳይ ቱማ ባ ሞርከታ ሁጵያ ትንቻና፤ ናጋራ ኦገን ሄመትያ አሳ፥ ብናናን ካመትዳ ኤንታ ሊጵያ መንና።

²² “ታኒ ህንተ ሞርከታ ባሳነፐ ዛራዳ ኤሀና፤ ታ ኤንታ ጪሞ አባፈ ከሳዳ ጉየ ኤሀና።

²³ ሄስካ፥ ነ ሞርከታ ሱ ነ ቶሆይ የና መላነ ነ ካናትካ ሞርከ ሱፈ ባንታ ግሹዋ ላጫና መላሳ” ያጌስ ጎዳይ።

²⁴ አቤት ፆሳዉ፥ ነ ሳልፐይ፥ ታ ፆሳይ ታ ካዎይ ሳልፐይ፥ ፆሳ ኬ ገልያ ዎደ ኡባስ በንቴስ።

²⁵ የፀይሳት ስንና፤ ዲፀይሳት ጉየና፤ ቃስ ካራቦ ባቅያ ጌላኦት ግዶና።

²⁶ ህንተ “ፆሳ ግታ ሺቆን ጋላትተ፤ ህንተኖ፥ እስራኤለ አሳዉ፥ ጎዳ ጋላትተ” ያጎሶና።

²⁷ ሄ ሳልፕያን ኡባፈ ካሎ ግድዳ ብንያመ ኮቻይ ኮይሮ ታይበቶሶና። ካልድ ይሁዳ ሀላቃት ባንታ ጩጋን ደኦሶና፤ ዉርሰን ዛብሎና ሀላቃትነ ንፍታለመ ሀላቃት ታይበቶሶና።

²⁸ አቤት ፆሳዉ፥ ነ ዎልቃ ቆንጭሳ፤ ካሰ ነ ኑስ ኦዳይሳዳ፥ ነ ምኖተ በሳ።

²⁹ ሄሳ ግሾ፥ የሩሳላመን ደእያ ነ ኬ ካዎት ይድ፥ ነዉ እሞታ እማና።

³⁰ ዶአዳ ማቃ ግዶን ደእያ ግብፀ አሳታ ኔኒ ሴራ፤ ቦሩነ ማራ ዉደ ዳንያ ካዎተታ ነ ሀንቀታ። ኤንቲ ጉልባትድ፥ ባንታ ብራ ነዉ እማና ጋካናዉ፥ ኔኒ ኤንታ ሴራ፤ ኦለታናዉ ዬሞትያ አሳታ ላላ።

³¹ ኪተትዳ ሀላቃት ግብፀፈ ያና፤ ቶጰይ ባ ኩሽያ ፆሳኮ ምጫና።

³² ህንተኖ፥ ሳኣ ካዎተቶ፥ ፆሳስ የፅተ። ሳላሀ

³³ በንፐ ደእያ ሳሎታፐ ቦላራ በይሳስ፤ ባ ዎልቃማ ግርሳን ባ ጉን ስሰይሳስ የፅተ።

³⁴ ፆሳ ዎልቃባ አዋጅተ፤ እያ ግታተይ እስራኤለ ቦላና፤ እያ ዎልቃይካ ሳሎና።

³⁵ ፆሳይ ባ ጌሻ አሳ ቦላ ማላልሴስ፤ እስራኤለ ፆሳይ ባ አሳስ ምኖተነ ዎልቃ እሜስ። ፆሳይ ጋላተቶ።