Mazmure 65 - ጌሻ ማፃፋ

ፆሳይ ታ አቶተ

ዛማረታ ሀላቃስ የፀትዳ ዳዊታ ማዝሙረ

¹ አቤት ፆሳዉ፥ ፅዮነን ነዉ ጋላት በሴስ፤ ኑኒ ኑ ቃንገ ነዉ ጋና።

² ኔኒ ዎሳ ስእያ ግሾ፥ አሳ ኡባይ ኔኮ ዮሶና።

³ ኑ ናጋራይ ኑና ሙክዳ ዎደ፥ ነ ኑስ አቶተ እማዳሳ።

⁴ ነ ዶርዳይሳትነ ነ ዳባባን ዳና መላ ኔኮ ሺሽዳ አስ አንጀትዳይሳ። ኑኒ ነ ሶን፥ ነ ጌሻ ዱንካንያን ደእያ ሎኦባን ካሎስ።

⁵ አቤት ኑ አቶተዉ፥ ማላልስያ ነ ፅሎ ኦሱዋን ኑስ ዛራ። ሳኣ ጋፃፐ ጋፃ ጋካናዉ፥ ሃሆን ደእያ ኡባስ ነ ኡፋይስ።

⁶ ኔኒ ነ ዎልቃን ደረታ ምንዳሳ፤ ነ ዎልቃ ዳንጫዳሳ።

⁷ ኔኒ አባ ግርሳነ ቤታ ጉን ስእ ኦሳ፤ ያርክያ አሳ ዋሱዋ እርፅሳሳ።

⁸ ነ ኦዳ ማላታ ግሾ፥ ሳኣ ጋፃ ጋካናዉ ደእያ አሳ ኡባይ ነዉ ያያና፤ ዶሎሀፐ ዉሎሀ ጋካናዉ ደእያ አሳ ኡባ ኡፋይሳዳሳ።

⁹ ነ እራ እማዳ ቢታ ናጋሳ፤ ዳሮ ዱረያሳ፤ አሳስ ካይ ዶላና መላ ፆሳ ሻፋይ ሃን ኩምዳይሳ፤ ሄሳዳ ኦዳ ነ ጊግሳዳሳ።

¹⁰ ጎሻስ ሃ እማሳ፤ ቢታ ሹግሳዳ ኦላ ኩንሳ። ነ እራን ዛራዳ እርፅሳሳ፤ ካይ ዶላና ድጫና መላ አንጃሳ።

¹¹ ላይ ካሎ ላይ ኦሳ፤ ነ አያ በሳ ኡባይ ኩምድ ፓላሀና።

¹² ሄን በሳታ ማታን ኩንሳ፤ ዙማታ ኡፋይስ ማይዛሳ።

¹³ ነ ሄን በሳታ ዶርሳታ ኩንሳ፤ ዛንጋራ ቢታን ካ ኩንሳ፤ ኤንቲ ኡፋይሳን እልልሸ የፆሶና።