Mazmure 58 - ጌሻ ማፃፋ

ፆሳይ ሳአ ኡባ ፕርዳና

“ይሶፋ” ጌተትያ ዲ ጩን የፀትዳ ዎሳ

¹ ደርያ ሃረይሳቶ፥ ቱማ ህንተ ልከ ኦደቴቲ? አሳ ኡባስ ፅሎ ፕርዴቲ?

² ግደና፥ ህንተ ዎዛናን ኢታባ ሀልቼታ፤ ህንተ ኩሸይ ቢታ ቦላ ጌላባ ኦስ።

³ ኢታ አስ አየ ኡሎፐ ዶምድ ሀሌስ፤ የለትዳ ጋላሳፐ ዶምድ፥ ባሌስነ ዎርዶ ኦደቴስ።

⁴ ኤንቲ ሾሻዳ ዪሻራ ደኦሶና፤ ኤንቲ ቱለ ጎፐዳ ስኦኮና።

⁵ ብተይስ አይ ጭንጫ ግድኮካ፥ ጎፐይ እያ ፄስ ስኤና።

⁶ አቤት ፆሳዉ፥ ጋሞ አች ዳንያ ኤንታ አቻ መን፤ ጎዳዉ ኤንታ ሳክልያ ካ።

⁷ ኤንቲ ጉክዳ ሃ ግዶ፤ ባንታ ዶንግያ ዱክያ ዎደ፥ ዶንገ ቶራ አይፈይ ዮ።

⁸ ኤንቲ ማይድ ይያ  ሳሶዳ ሀኖ፤ አየ ኡሎፐ ሀይቅድ ዎያ፥ አዋ ፖኦ በኦና ቦሻዳ ሀኖ።

⁹ ኤንቲ አጉን ግድድ ዳያናፐ ካሰ፥ ኤንቲ ቡሮ ፑቶ ግድድ ደእሽን፥ ኤንታ ባ ሀንቁዋን ይሳና።

¹⁰ ናጋራንቾታ ቦላ ሀሎ ከይያ ዎደ ፅሎት ኡፋይታና፤ ኢታታ ሱን ባንታ ቶሁዋ ሜጨታና።

¹¹ ሄ ዎደ አሳይ፥ “ቱማ ፅሎታስ ዎይቶይ ደኤስ፤ ሳአ ቦላ ፕርድያ ፆሲ ደኤስ” ያጋና።