Mazmure 57 - ጌሻ ማፃፋ

ነ ቦንቾይ ሳአ ኡባን ግዶ

“ይሶፋ” ጌተትያ ዲ ጩን የፀትዳ ዎሳ

¹ ታና ማራ፤ አቤት ፆሳዉ፥ ታና ማራ፤ ታ ኔኮ ባቃታይስ። ዮይ አና ጋካናዉ፥ ነ ቀፍያ ጋርሳን ቆሰታይስ።

² ታኒ ኡባፈ ቃ ፆሳኮ፥ ባ ቆፋ ኦያ ፆሳኮ ዋሳይስ።

³ ፆሳይ ሳሎፐ ማዶ ኪትድ ታና አሻና፤ ታና የይሳታ ካዉሻና፤ ፆሳይ ባ ሲቁዋነ ባ አማነተ ታዉ ኪታና። ሳላሀ

⁴ ታኒ ታ ሞርከታፐ ግዶን፥ አሰ ምያ ጋሞታፐ ግዶን ደአይስ። ኤንታ አቻይ ቶራነ ዶንገ ቶራ መላ፤ ኤንታ እንፃርሳይ ቃራ ማሻ መላ።

⁵ አቤት ፆሳዉ፥ ነ ሳሎፐ አዳ ቁ ቁ ጋ፤ ነ ቦንቾይ ሳአ ኡባ ካሞ።

⁶ ኤንቲ ታ ቶሁዋስ ፅሄ ዎዶሶና፤ ታኒ ኡንኤታዳ ሆካስ። ኤንቲ ታ ኦግያን ኦላ ቦክዶሶና፤ ሽን ሄ ኦላን ባንታዉ ኩንድዶሶና። ሳላሀ

⁷ ታ ዎዛናይ ምኖ፤ አቤት ፆሳዉ፥ ታ ዎዛናይ ምኖ፤ ታኒ ነና ማዝሙረን ሳባና።

⁸ ታ ሸምፐ፥ ባርካ፤ ዲነ ማስንቆይ ደንድተ፤ ታኒ ጉራ ባርካና።

⁹ አቤት ጎዳዉ፥ ታ ነና አሳ ግዶን ጋላታና፤ ካዎተታ ግዶን ነና ሳባና።

¹⁰ ነ ሲቆይ ሳሎታፐ ቃ፤ ነ አማነተይ ሻራፐ ቦላ።

¹¹ አቤት ፆሳዉ፥ ነ ሳሎፐ አዳ ቁ ቁ ጋ፤ ነ ቦንቾይ ሳአ ኡባ ካሞ።