Mazmure 48 - ጌሻ ማፃፋ

ፅዮነይ ኑ ፆሳ ዙማ

ቆረ ናይታ ማዝሙረ

¹ ጎዳይ ግታ፤ ኑ ፆሳ ካታማን እያ ጌሻ ዙማ ቦላ ግታ ጋላት እያዉ በሴስ።

² ቢታ ኡባ ኡፋይስ ግድዳ፥ ፑደሀ ባጋራ ደእያ ፅዮነ ደረይ፥ ቃነ ሎኦ፤ እ ግታ ካዋ ካታማ።

³ ፆሳይ ሄ ግምብያ ግዶና፤ እካ እያዉ ገሸ ግደይሳ ኤርስስ።

⁴ ካዎት ባንታ ቶራንቾታራ ሺቅዶሶና፤ ፅዮነ ኦላናዉ ይዶሶና።

⁵ እያ በእድ ዳጋምዶሶና፤ ጉየ ስሚድ ባቃትዶሶና።

⁶ ኤንቲ ያን ደእሸ ያሻን ኮኮርዶሶና፤ እቀ ኦይክዳ ማጫሳዳ እንፃፅዶሶና።

⁷ ዶሎሀ ባጋ ዎልቃማ ጫርኮን መቅያ ታርሰሳ ማርካበታ መላ ግድዶሶና።

⁸ ኑ ስእዳይሳዳ፥ ኡባፈ ዎልቃማ ጎዳ ካታማን፥ ኑ ፆሳ ካታማን እ ኦዳባ በእዳ፤ ፆሳይ ሄ ካታማ መርናዉ ምንድ ናጌስ። ሳላሀ

⁹ አቤት ፆሳዉ፥ ነ ኬን መርና ነ ሲቁዋ ቆፖስ።

¹⁰ አቤት ፆሳዉ፥ ነ ሱንዳ ነ ጋላታይ ሳኣ ጋፃ ጋክስ፤ ነ ኡሻቻ ኩሸይ ፅሎተን ኩምዳይሳ።

¹¹ ነ ፕርዳ ጋሶን ፅዮነ አሳይ ኡፋይቶ፤ ይሁዳ ኩመይ ኡፋይሳን እልሎ።

¹² ፅዮነ ዩሹዋን ሄመትተ፤ እ ድርሳ ዩይተ እ ሻኮታ ታይብተ።

¹³ ያ የለታስ ኦዳና መላ እያ ግምብያ አኬክተ፤ ሚፃታ ዎችተ።

¹⁴ ህንተ፥ “መርናዉ ፆሳይ ኑ ፆሳ፤ እ ኑና ሀይቃና ጋካናዉ ካለና” ያግድ ኦድተ።