Mazmure 38 - ጌሻ ማፃፋ

ፆሳዉ ታና አጎፋ

ዳዊቲ ፃፍዳ ቆፍሶ ማዝሙረ

¹ አቤት ጎዳዉ፥ ነ ሸንያን ታና ሴሮፓ፤ ነ ይሉዋን ታና ሀንቆፋ።

² ነ ዶንገ ቶራይ ታና ጫድስ፤ ነ ኩሸይ ታና ዴፅስ።

³ ነ ሀንቅዳ ግሾ ታ አሳተይ ቆሄትስ፤ ታ ናጋራ ጋሶን ታ መቀይ ሊቅስ።

⁴ ታ ባላይ ታና ሙክስ፤ ደንዶና ግታ ቶሆዳ ታና ዴፄስ።

⁵ ታ ኤያተን ኦዳ ናጋራ ግሾ፥ ታ ማዱንይ ፅንቅስ።

⁶ ታ ሳአ ፄላስ፤ ሆካስ፤ ጋላስ ኩመ አዛናሸ ፔአስ።

⁷ ታ አሾይ ፁጌስ፤ ታ አሳተይ ፓፃ ግደና።

⁸ ታ ዳቡራስ፤ ሊቃስ፤ ታ ዎዛናይ ድርግያ ግሾ ኦላስ።

⁹ አቤት ጎዳዉ፥ ታ ዎዛና አሞ ኡባ ኤራሳ፤ ታ ኦለይ ኔፐ ጌምቤና።

¹⁰ ታ ዎዛናይ ድርጌስ፤ ታ ዎልቃይ ህት ግስ፤ ታ አይፍያ ፖኦይ ይስ።

¹¹ ታ ማዱን ጋሶን ታ ሾሮትነ ታ ላገት ሃክድ ኤቅዶሶና፤ ታ ዳቦት ታፐ ሃክዶሶና።

¹² ታና ዎናዉ ኮየይሳት ባንታ ፅህያ ታዉ የጎሶና። ታና ቆሀናዉ ኮየይሳት፥ “ኑ ነና ደማና” ያግድ ማንዶሶና ጋላስ ኩመ ታ ቦላ ቶቦሶና።

¹³ ታ ቱለ አሳ መላ ስእከ፤ ሙመ አሳ መላ ዶና ፖግከ።

¹⁴ ቱማ ሀይ ስኦና አስ፥ እንፃርስ ኦድድ ዛሮና አስ ግዳስ።

¹⁵ ጎዳዉ፥ ታ ነና ኡፋይሳን ናጋይስ፤ ታ ጎዳዉ፥ ፆሳዉ ነ ታዉ ዛሮ እማ።

¹⁶ ታኒ፥ “ታ ቶሆይ በትን፥ ኤንቲ ሀሹ ጋናዳነ ታ ቦላ ጬቀታናዳ ኦፋ” ያጋስ።

¹⁷ ታ ኩንዳና ሀናይስ፥ ታ ሳኮይ ታና አጎና እፅስ።

¹⁸ ታ ናጋራ ፓፃይስ፤ ታ ናቁዋ ጋሶን አዛናይስ።

¹⁹ ታ ሞርከት ግታነ ዎልቃማ፤ ታና ጮ እፀይሳት ዳሮ።

²⁰ ታኒ ሎኦባ ኦን ኢታ ዛረይሳት፥ ታ ሎኦባ ካልያ ግሾ ታራ ኤቀቶሶና።

²¹ ጎዳዉ፥ ታና የጎፋ፤ ታ ፆሳዉ፥ ታፐ ሃኮፋ።

²² ታና አሽያ ታ ጎዳዉ፥ ታና ማዳናዉ ኤለሳ።