Mazmure 35 - ጌሻ ማፃፋ

ብፃትዳ አሳ ዎሳ

ዳዊታ ማዝሙረ

¹ ጎዳዉ፥ ታራ ባፀተይሳታራ ነ ባፀታ፤ ታና ኦለይሳታ ነ ኦላ።

² ጎንዳለነ ቶራ ኦይካዳ፥ ታና ማዳናዉ ደንዳ።

³ ታና ጎደይሳታ ቦላ ነ ቶራነ ማሻ ደን፤ ታኮ “ታ ነና አሸይሳ” ያጋ።

⁴ ታ ሸምፑዋ ዎናዉ ኮየይሳት፥ ዬላቶ፤ ካዉዮ። ታ ቦላ ኢታባ ማቀተይሳት፥ ካዉይድ ጉየ ስሞ።

⁵ ጎዳ ኪታንቾይ ኤንታ የደያ ዎደ፥ ኤንቲ ጫርኮን ላለትያ ሱላዳ ሀኖ።

⁶ ጎዳ ኪታንቾይ ኤንታ ጎድያ ዎደ፥ ኤንታ ኦገይ ማነ ሀል ግዶ።

⁷ ጋሶይ ባይና ታና ኦይካናዉ ፅሄ ዎሶና፤ ታና ኩንድሳናዉ ኦላ ቦኮሶና።

⁸ ኤሮና ደእሽን ኤንታ ቦላ ዮይ ዮ፤ ኤንቲ ዎዳ ፅሄይ ኤንታ ኦይኮ፤ ኤንቲ ቦክዳ ኦላን ኩንድድ ዮ።

⁹ ሄ ዎደ ታኒ ጎዳን ኡፋይታና፤ እ አሽዳ ግሾ ሀሹ ጋና።

¹⁰ ታ ኩመ አሳተይ ነና፥ “ጎዳዉ፥ ነ መል ኦኔ? ማንቁዋ ዎልቃማ ኩሽያፐ ከሳ ኤካሳ፤ መቶታንቹዋነ ኡንኤትዳይሳ፥ ቦንቀይሳታ ኩሸፐ አሻሳ” ያጋና።

¹¹ ዎርዶ ማርካተይሳት ታ ቦላ ደንዶሶና፤ ታ ኤሮናባን ታና ሞቶሶና።

¹² ታ ሎኦ ኦዳ ግሾ ኢታ ዛርዶሶና፤ ታና ብዛ ኦዶሶና።

¹³ ሽን ኤንቲ ሀርግዳ ዎደ ታኒ ካዮ ማኦ ማአስ፤ ታ አሳተ ፆማን ዳቡርሳስ፤ ታ ዎሳይ ዛሮ ደሞና አትስ።

¹⁴ ታና ካዉሻዳ ዳቦስ ዎይኮ እሻስ ዬከይሳዳ ዬካስ። እስ አስ ባ አየስ ካዮተይሳዳ ታ ሁጵያ ኦይካዳ ዬካስ።

¹⁵ ሽን ታኒ በትዳ ዎደ ኡፋይትድ ሺቅዶሶና፤ ጋሶይ ባይና ታና ዋድ፥ አጎና እፅዶሶና።

¹⁶ ኢታ አሳት ኦይሳዳ ኤንቲ ታና ቀልቅስዶሶና፤ ይሎትድ ባንታ አቻ ጋርጭዶሶና።

¹⁷ ጎዳዉ፥ ኔኒ አዉደ ጋካናዉ፥ ስእ ጋዳ ፄላይ? ኤንታ ኢታ ኦሱዋፐ ታና አሻ፤ ታ አልኦ ሸምፑዋ ሀ ጋሞታፐ ዎስሳ ኤካ።

¹⁸ ሄ ዎደ ግታ ሺቆን ታ ነና ጋላታና፤ ዳሮ አሳይ ደእያ በሳን ነና ቦንቻና።

¹⁹ ጋሶይ ባይና ታና ሞርከይሳት ኡፋይቶፎ፤ ታና ጮ እፀይሳት ታ ቦላ ቃምኦቶፖ።

²⁰ ኤንቲ ሳሮባ ሃሳዮኮና፤ ስእ ግድ ደእያ አሳ ቦላ ኦዳ ፃፆሶና።

²¹ ኤንቲ ባንታ ዶና ታ ቦላ ዶይድ፥ “ሀይሳ በአ፥ ነ ኦዳይሳ ኑኒ ኑ አይፈን በእዳ” ያጎሶና።

²² ጎዳዉ፥ ኔኒ ሄሳ በአዳሳ፤ ስእ ጎፓ። ጎዳዉ፥ ታፐ ሃኮፋ።

²³ ታ ፆሳዉ፥ ታ ጎዳዉ ታ ግሾ፥ ደንዳ፤ ባርካ፤ ታ ዶና ግዳዳ ሞተታ።

²⁴ ታ ጎዳዉ፥ ታ ፆሳዉ፥ ፅሎተን ታዉ ፕርዳ፤ ታ ሞርከታ ኡፋይሶፋ።

²⁵ ኤንቲ ባንታ ዎዛናን፥ “ሀሹ፥ ኑ አሞይ ፖለትስ፤ ኑኒ እያ ምትዳ” ጋና መላ ኦፋ።

²⁶ ታ ዋያን ኡፋይተይሳት፥ ዬላቶ፥ ካዉዮ፤ ታ ቦላ ጬቀተይሳት ዬላነ ካዉሸ ማኦ።

²⁷ ታ ፆኑዋ ዶሰይሳት ኡፋይቶ፤ እልሎ፤ ሀሹ ያጎ። “ኡባ ዎደ ባ አይልያ ሳሮተን፥ ኡፋይትያ ጎዳይ ቁ ቁ ጎ” ያጎ።

²⁸ ታ እንፃርሳይ ነ ፅሎተነ ነ ጋላታ፥ ጋላሳ ኩመን ኦዴስ።