Mazmure 31 - ጌሻ ማፃፋ

ታ ሸምፕዉ ነ ኩሸን ዎስ

ዛማረታ ሀላቃስ ፃፈትዳ ዳዊታ ማዝሙረ

¹ አቤት ጎዳዉ፥ ታ ኔኮ ባቃታይስ፤ አዉደካ ታና ዬላዮፓ፤ ነ ፅሎተን ታና አሻ።

² ነ ሀይ ታኮ ዛራ፤ ኤለሳዳ ታና አሻ። ኔኒ ታዉ ጌምያ ዛላ፤ ታና አሽያ ምኖ ሚፃ ግዳ።

³ ኤ፥ ነ ታዉ ዛላነ ሚፃ፤ ነ ሱን ግሾ ታና ካለ፤ ኦግያ በሳ።

⁴ ነ ታዉ ጌምያ በሰ ግድያ ግሾ፥ ኤንቲ ቆትድ ዎዳ ፅሄፐ ታና ናጋ።

⁵ አቤት ጎዳዉ፥ ቱማ ፆሳዉ፥ ታ ሸምፑዋ ነ ኩሸን ዎይስ፤ ነ ታና ዎዛ።

⁶ ፓና ኤቃታ ጎይነይሳታ ታ እፃይስ፤ ግዶሽን ታኒ ጎዳን አማነታይስ።

⁷ ታ መቱዋነ ታ ኡንአ ነ በእዳ ግሾ ታኒ መርናዉ ነ ሲቁዋን ኡፋይታና።

⁸ ነ ታና ሞርከ ኩሸን አዳ እማባካ፤ ታ ቶሆታ ዳልጋ በሳን ኤሳዳሳ።

⁹ አቤት ጎዳዉ፥ ታኒ መቶን ገልዳ ግሾ ታዉ ቃታ፤ ታ ዳሮ አዛንዳ ግሾ ታ አይፈይ ሙልጫትስ፤ ታ አሾይነ ታ ሸምፖይ ዳቡርስ።

¹⁰ ታ ደኦይ አዛኖን፥ ታ ላይይ ኦለን ዉርስ፤ ዋየ ዳሮተን ታ ዎልቃይ ዉርስ፤ ታ መቀት አርጋጭዶሶና።

¹¹ ታ ሞርከታ ኡባስ ቅስ አታስ፤ ታ ሾሮታስ ዬላ ግዳስ። ታ ላገታስ ዳጋንያባ ግዳስ፤ ታና በኤይሳት ታፐ ሃክዶሶና።

¹² ታ ሀይቅዳ አሳዳ ዶገታስ፤ መቃ ሚሸዳ ዎራ የገታስ።

¹³ ታኒ ዳሮታ ካልካሻ ስአስ፤ ኡባ በሳራ ዳጋም ደኤስ። ኤንቲ ታ ቦላ ቶቦሶና፤ ታና ዎናዉ ማቀቶሶና።

¹⁴ ሽን ጎዳዉ፥ ታ ነናን አማነታና፤ ኔኒ ታ ፆሳ።

¹⁵ ታ ደኦ ላይይ ነ ኩሽያና፤ ታና የደያ ታ ሞርከታ ኩሸፐ አሻ።

¹⁶ ነ አይልያ ቦላ ነ ሶምኡዋ ፖእሳ፤ ነ ማሮተን ታና አሻ።

¹⁷ አቤት ጎዳዉ፥ ታ ነና ፄግያ ግሾ፥ ታና ዬላዮፓ። ሽን ኢታት ዬላቶ፤ ዱፎን ገልድ ስእ ጎ።

¹⁸ ኦቶሮንነ ቦረን ፅሎታ ቦላ ምንድ ሃሳያ ግሾ፥ ኤንታ ዎርዶ እንፃርሳ ስእ ኦ።

¹⁹ ነና ያየይሳታስ ነ ምንጅዳ፥ ኔኮ ባቃተይሳታስ ነ ጊግስዳ፥ ኬሀተይ አይ መላ ዳሮ!

²⁰ ኔኒ ኤንታ ነ ስንን፥ ጌማ በሳን ገን ዎዳሳ፤ አሳ ኢታ ማቁዋፈ አሻሳ፤ ኢታ እንፃርሳፈ ነ ዱንካንያን ቆሳዳሳ።

²¹ ሞርከይ ተቅዳ ካታማ ግዶን፥ ማላልስያ ባ ማሮተ ታና በስዳ፥ ጎዳይ ጋላተቶ።

²² ታ ዳጋማዳ፥ “ነ ስንፈ ሃካስ” ጋስ፤ ሽን ታ ማዶ ኮያዳ ኔኮ ዋስዳ ዎደ፥ ታ ዋሱዋ ነ ስአዳሳ።

²³ ህንተኖ፥ ፆሳ አሳዉ፥ ጎዳ ዶስተ፤ ጎዳይ አማነተይሳታ ናጌስ፤ ሽን ኦቶራንቾታስ ኤንታ ጋትያ ቃንፄስ።

²⁴ ህንተኖ፥ ጎዳን ኡፋይስ ኦይሳቶ፥ ምንተ፤ ገንጭተ።